Oficina del Censu de los Estaos Xuníos

De Uiquipedia
Saltar a: navegación, buscar
Sellu de la Oficina del Censu de los Estaos Xuníos

La Oficina del Censu de los Estaos Xuníos (n'inglés, United States Census Bureau) ye l'axencia gubernamental que s'ocupa, ente más coses, d'ellaborar el censu d'esi país. Forma parte del Departamentu de Comerciu y ye, amás, la meyor fonte pa obtener datos de la población y la economía estaunidense. El so director ye, dende'l 15 de xunetu de 2009, el sociólogu Robert M. Groves.

Esti departamentu, equivalente al Instituto Nacional d'Estadística español, fundose en 1903. Fai censos, como manda la constitución estaunidense, cada diez años. Esos censos valen pa determinar, ente más coses, el númberu de miembros na Cámara de Representantes que-y correspuenden a cada estáu. Lo avezao ye facelos nos años acabaos en 0, magar que la oficina fai tamién estimaciones y proyecciones ente recuentu y recuentu.

Sé central de la Oficina en Suitland (Maryland)

La sé de la oficina ta, dende 1942, en Suitland (Maryland). Ellí acabaron de construyise, en 2007, nueves instalaciones, nes que trabayen los sos 4.000 trabayadores. Amás d'ellí, hai doce oficines rexonales de la Oficina del Censu en Boston, Nueva York, Philadelphia, Detroit, Chicago, Kansas City, Seattle, Charlotte, Atlanta, Dallas, Denver y Los Ángeles, y un centru nacional de procesamientu de datos con sé en Jeffersonville (Indiana).

División de los Estaos Xuníos en rexones censales