Oficina del Censu de los Estaos Xuníos

De Wikipedia
Saltar a: navegación, buscar
Sellu de la Oficina del Censu de los Estaos Xuníos

La Oficina del Censu de los Estaos Xuníos (n'inglés: United States Census Bureau) ye una axencia principal del U.S. Federal Statistical System (Sistema Estadísticu Federal de los Estaos Xuníos), ente gubernamental responsable de la producción de datos sobre la población y la economía estaunidenses. El so director ye, dende'l 8 d'agostu de 2013, l'estadísticu John H. Thompson. La oficina pertenez al Departamentu de Comerciu, y el so director ye nomáu directamente pol presidente del país.

Esti departamentu, equivalente al Institutu Nacional d'Estadística español, fundóse en 1903. Tien como misión principal la ellaboración decenal d'un censu, que s'usa pa determinar, ente más coses, el númberu de miembros na Cámara de Representantes que-y correspuenden a cada estáu. Lo avezao ye facelos nos años acabaos en 0, magar que la oficina fai tamién estimaciones y proyecciones ente recuentu y recuentu. Arriendes d'eso, la Oficina del Censu ellabora de contino estadístiques, censos y encuestes de temática variada, neto nel campu de la demografía que nel de la economía y el comerciu. Los sos datos úsense como base pal repartu añal d'hasta 400.000 millones de dólares en fondos federales, y permiten tomar decisiones razonaes y basaes en datos rigurosos a les autoridaes estatales y locales y a les empreses.

Sé central de la Oficina en Suitland (Maryland)

La sé de la oficina ta, dende 1942, en Suitland (Maryland). Ellí acabaron de construyise, en 2007, nueves instalaciones, nes que trabayen los sos 4.000 trabayadores. Amás d'ellí, hai doce oficines rexonales de la Oficina del Censu en Boston, Nueva York, Filadelfia, Detroit, Chicago, Kansas City, Seattle, Charlotte, Atlanta, Dallas, Denver y Los Angeles, y un centru nacional de procesamientu de datos con sé en Jeffersonville (Indiana).

Ver tamién[editar | editar la fonte]

- Llistáu de les rexones d'Estaos Xuníos según la Oficina del Censu