Cinturón del Sol

De Wikipedia
Saltar a navegación Saltar a la gueta
El Cinturón del Sol, resaltáu en colloráu.

El Cinturón del Sol ye una rexón d'Estaos Xuníos. Magar que la so definición nun ta afitada, considerase que compriende los estaos del Sureste y Suroeste del país; otros defínenla como la fastera del país asitiada al sur del paralelu 36 norte. Compriende parte o tou el territoriu de los estaos d'Alabama, Arizona, Arkansas, California, Carolina del Norte, Carolina del Sur, Colorado, Florida, Georgia, Kansas, Louisiana, Mississippi, Nevada, Nuevu Méxicu, Oklahoma, Texas, Tennessee y Utah, que tienen una población conxunta de 144.460.016 habitantes (2016)[1].

El Cinturón del Sol tien aumentao de forma importante la so población de magar la década de 1960 per aciu de la llegada a elli de población en busca d'un clima más caldiu y soleyeru y de les crecientes oportunidaes económiques de la zona. El desarrollu de los sistemes d'aire acondicionáu permitió pasar de manera más confortable'l branu, y tamién la instalación d'empreses y fábriques. L'estilu arquitectónicu de la rexón ye modernu y abiertu, y bien de ciudaes de so nun se limiten al turismu estacional nel branu, sinón que tienen atracciones turístiques que les convierten en destinos turísticos permanentes[2]: Orlando, Tampa, Miami, San Diego, Los Angeles, Las Vegas, Phoenix o Nueva Orleans, ente más otres, tienen nesta industria ún de los pilancos de la so economía.

Definición[editar | editar la fonte]

El Cinturón del Sol compriende la fastera más meridional de los Estaos Xuníos: los estaos d'Alabama, Arizona, Florida, Georgia, Louisiana, Mississippi, Nuevu Méxicu, Carolina del Sur, Texas, dos tercios de California (los asitiaos al sur del Gran Sacramento) y partes de Carolina del Norte, Nevada y Utah. Cinco de los estaos (Arizona, California, Florida, Nevada y Texas) son tamién nomaos colectivamente los Estaos del Sable (Sand States) pola so abondancia d'arena, seya nes sos playes o nos sos desiertos[3].

El términu, usáu per primer vegada pol analísta políticu Kevin Philips nel so llibru de 1969 The Emerging Republican Majority[4], convirtióse, de magar l'entamu de la década de 1970, en sinónimu de "terciu meridional d'Estaos Xuníos". Nesta dómina, la primacía económica y política del país, tradicionalmente en manes de los estaos del Mediu Oeste y el Noreste, entamó a pasar a los estaos del Sur y l'Oeste. Dellos factores, como'l so clima bonal, l'abondancia de trabayadores emigrantes mexicanos y l'espoxigue de la industria agrícola, favorecieron el crecimientu económicu d'esta parte del país. El clima, amás, traxo a bien de xubilaos con bon nivel económicu a vivir a estes zones de clima caldiu, especialmente a Florida y Arizona. Delles industries, como la petrolífera, la de defensa y l'aeroespacial, sacaron ventaxa de la baxa implantación de los sindicatos na rexón, y tamién de la proximidá de les instalaciones militares que son ún de los principales consumidores de los sos productos. La industria petrolífera fizo prosperar a Texas y Louisiana, y el turismu medró enforma en Florida y la metá sur de California. Más recientemente, les industries tecnolóxiques y de la nueva economía contribuyeron enforma al crecimientu económicu de la rexón, y especialmente de California, Florida y Texas.

Proyecciones demográfiques[editar | editar la fonte]

En 2005 la Oficina del Censu d'Estaos Xuníos proyectó que aprosimadamente'l 88% del crecimientu de población del país ente 2000 y 2030 produciríase nel Cinturón del Sol. Esperábase que California, Texas y Florida vieran medrar la so población en más de 12 millones d'habitantes neses décades, lo que los convertiría nos estaos más poblaos del país[5]. El pasar del tiempu, y la influyencia d'eventos como la crisis económica de 2008, ficieron revaluar la situación. La burbuya económico que llevó a la recesión afectó de forma perimportante a la rexón, y la importancia de l'abondancia de mano d'obra barata fízose menos relevante al xeneralizase la esternalización de la producción industrial a otros países. Amás, la rexón tien problemes específicos de gran importancia, como la escasez d'agua, estructural y que nun ha sinon agudizase a midida que la población de California, Texas, Georgia o Florida vaiga medrando. La población de la rexón, en fin, va medrando, pero más seliquino de lo previsto naquella proyección de 2005.

Población[editar | editar la fonte]

La llista que vien darréu inclúi la población y el productu interior brutu de les principales árees metropolitanes del Cinturón del Sol.

Principales árees metropolitanes
Ciudá principal Población

en millones

(2017)

PIB (2017)

(en miles

de millones

de dólares)

Los Angeles 13,3 $1.043
Dallas-Fort Worth 7,4 $535,5
Houston 6,9 $490,0
Miami 6,1 $344,8
Atlanta 5,8 $385,5
Phoenix 4,7 $242,9
San Francisco 4,7 $500,7
Riverside–San Bernardino 4,5 $157,9
San Diego 3,3 $231,8
Tampa 3,1 $146,3
Charlotte 2,5 $174,0
Orlando 2,5 $132,4
San Antonio 2,4 $129,3
Las Vegas 2,2 $112,2


Esta segunda inclúi les principales ciudaes del Cinturón, agrupaes por estáu.

Principales ciudaes (agrupaes por estáu)
Estáu Ciudaes
Alabama Birmingham, Huntsville, Mobile, Montgomery, Tuscaloosa
California Anaheim, Bakersfield, Fresno, Long Beach,

Los Angeles, Oakland, Riverside, Sacramento, San Bernardino, San Diego, San José, San Francisco

Nevada Las Vegas, Henderson, North Las Vegas, Reno
Arizona Phoenix, Tucson, Mesa, Chandler, Glendale, Scottsdale,

Gilbert, Tempe, Peoria, Surprise, Yuma, Prescott, Flagstaff, Nogales

Nuevu Méxicu Albuquerque, Las Cruces, Rio Rancho, Santa Fe
Texas Amarillo, Arlington, Austin, Beaumont, Corpus Christi, Dallas, El Paso,

Fort Worth, Houston, Irving, Laredo, Lubbock, Plano, San Antonio

Louisiana Baton Rouge, Lafayette, Nueva Orleans, Shreveport, Lake Charles, Alexandria, Monroe
Mississippi Jackson, Tupelo, Meridian, Gulfport, Southaven, Hattiesburg
Georgia Atlanta, Athens, Augusta, Columbus, Macon, Savannah
Tennessee Chattanooga, Clarksville, Knoxville, Memphis, Nashville, Murfreesboro
Utah St. George
Arkansas Fayetteville, Little Rock
Florida Cape Coral, Fort Lauderdale, Gainesville, Jacksonville, Miami,

Orlando, San Petersburgu, Sarasota, Tallahassee, Tampa, West Palm Beach

Carolina del Norte Asheville, Charlotte, Greensboro, Raleigh, Chapel Hill,

Cary, Winston-Salem, Durham, Carrboro, Fayetteville, Wilmington

Carolina del Sur Charleston, Columbia, Greenville, Myrtle Beach

Referencies[editar | editar la fonte]

  1. U.S. Census Bureau QuickFacts.
  2. Beinfeld K, Where Pittsburgh Has The Sun Belt Beat. Bloomberg CityLab.
  3. Olesiuk SM, Kalser KR, The Sand States: Anatomy of a Perfect Housing-Market Storm. FDIC Quarterly, 2009, vol. 3, nº 1, páxs. 30-32.
  4. Phillips K, How the GOP Became God's Own Party. Artículu de The Washington Post del 2 d'abril de 2006.
  5. Sun Belt Growth Shapes Housing's Future, artículu de la web allbusiness.com.

Enllaces esternos[editar | editar la fonte]