Mississippi
Mississippi ye un estáu de los Estaos Xuníos, asitiáu al sur del país, na subrrexón Centru Sureste. L'estáu, que ye'l 32ᵘ mayor del país, llenda al norte con Tennessee, al este con Alabama, al sur col Golfu de Méxicu, y al oeste con Luisiana y Arkansas. La so población, según el censu de 2015, yera de 2.992.333 persones, que faen d'elli el 34ᵘ más pobláu del país. La so capital, y mayor ciudá, ye Jackson (160.628 habitantes en 2019[1]), y la so área metropolitana, conocida col nome de Greater Jackson, ye la mayor del estáu, con una población en 2019 de 594.806 habitantes[2].
Mississippi convirtióse, el 10 d'avientu de 1817, nel 20ᵘ estáu en ser almitíu na Xunión. Pa 1860 yera l'estáu del país que producía más algodón, y el 55% de la so población taba formada por esclavos[3] que trabayaben nes sos plantaciones. Mississippi separtose de la Xunión el 23 de marzu de 1861 y convirtióse nún de los siete Estaos Confederaos orixinales, que yeren los que teníen el mayor númberu d'esclavos del país. Tres de la guerra, reincorporose a la Xunión el 23 de febreru de 1870[4].
Hasta la Gran Migración, na década del 1930, la mayoría de la so población seguía siendo de raza negra. Y magar que'l so porcentaxe rellativu foi menguando, en 2010 entá'l 37,3% de los sos habitantes son afroestauxunidenses: esti ye'l mayor porcentaxe de cualisquier estáu del país.
Demientres la dómina del movimientu polos derechos civiles (1954-1968) asocedieron dellos fechos relevantes nel estáu, como los disturbios provocaos na Universidá de Mississippi en 1962 por estudiantes segregacionistes de raza blanca opuestos a la inscripción como alumnu d'una persona de raza negra, l'asesinatu en 1963 del activista afroamericanu Medgar Evers, o el secuestru y asesinatu, en 1964, de trés activistes afroestauxunidenses en Philadelphia.
L'estáu ye ún de los más probes del país[5], y aveza a tar nos llugares más baxos nos ránking que miden los niveles de salú[6], educación[7] y desarrollu de la so población.
Orográficamente asítiase na Llanada Costera del Golfu, y el so territoriu ye mayormente de llanadas, salpicaes de cuetos y colines de pocu altor. La fastera noroccidental del so territoriu ocúpala la rexón del delta del Mississippi, que ye parte de la Llanada Aluvial del Mississippi, creada por esti ríu al travesar de norte a sur siete estaos del país. El puntu más altu del estáu ye'l monte Woodall, con 246 m d'altor sobre'l nivel del mar, asitíau xuntu a la meseta de Cumberland; el más baxu ye'l golfu de Mexicu. El clima del estáu ye subtropical húmedu.
Enllaces esternos[editar | editar la fonte]
Referencies[editar | editar la fonte]
- ↑ U.S. Census Bureau Quickfacts: Jackson City, Mississippi, na web de la Oficina del Censu de los Estaos Xuníos.
- ↑ U.S. Census Bureau: County Population Totals: 2010-2019, na web de la Oficina del Censu d'Estaos Xuníos.
- ↑ Dattel ER, Cotton in a Global Economy: Mississippi (1800-1860), artículu na web Mississippi History Now.
- ↑ Richter WL, The A to Z of the Civil War and Reconstruction. Lanham, Scarecrow Press, 1942. ISBN 9780810863361
- ↑ State Median Household Income Patterns: 1990-2010.
- ↑ Mississippi nel America's Health Ranking Report 2020.
- ↑ Percent of People Who Have Completed High School (Including Equivalency) (most recent) by state (2004), na web statemaster.com.
| Control d'autoridaes |
|
|---|
Datos: Q1494
Multimedia: Mississippi (state)