Mediu Oeste d'Estaos Xuníos

De Wikipedia
Saltar a navegación Saltar a la gueta
Midwest6.jpg

El Mediu Oeste d'Estaos Xuníos, conocíu n'inglés como Midwestern United States, American Midwest, Middle West o simplemente Midwest, ye una de les cuatro rexones nes que la Oficina del Censu de los Estaos Xuníos divide, con propósitos estadísticos, el territoriu estauxunidense[1]. La rexón, nomada oficialmente Rexón Central del Norte (North Central Region) hasta 1984[2], asitiase ente'l Noreste d'Estaos Xuníos y l'Oeste d'Estaos Xuníos, y llenda al norte con Canadá y al sur col Sur d'Estaos Xuníos.

La definición de la Oficina del Censu inclúi nella 12 estaos de la fastera centru-septentrional d'Estaos Xuníos: Dakota del Norte, Dakota del Sur, Illinois, Indiana, Iowa, Kansas, Michigan, Minnesota, Missouri, Nebraska, Ohio y Wisconsin. Xeográficamente la rexón compriende los estaos asitiaos na gran llanada interior esistente ente los montes Apalaches y les Montañes Rocoses. Los principales ríos de la rexón son, d'este a oeste, el Ohio, el Mississippi y el Misuri[3]. La población d'esta rexón en 2012, según la Oficina del Censu, yera de 65.377.684 habitantes. La rexón sodivídese en dos, que tomen como referencia el calce del ríu Mississippi: la División Centru Noreste, qu'inclúi a los estaos asitiaos na vera izquierda del ríu, esto ye, Illinois, Indiana, Michigan, Ohio y Wisconsin, estaos pertenecientes tamién a la rexón de los Grandes Llagos; y la División Centru Noroeste, qu'inclúi a los estaos de la vera derecha del ríu, esto ye, les dos Dakotes, Iowa, Kansas, Minnesota, Misuri y Nebraska.

La ciudá más poblada de la rexón, y tercera más poblada del país, ye Chicago. Les siguientes n'orde d´importancia según la so población son Columbus, Indianápolis, Detroit, Milwaukee, Kansas City, Omaha, Minneapolis, Wichita, Cleveland, St. Paul, St. Louis, Cincinnati, Madison y Des Moines. Chicago y los sos suburbios formen la mayor área estadística metropolitana, con 9,9 millones d'habitantes, siguida en tamañu poblacional por Metro Detroit, Minneapolis-St. Paul, el Gran San Louis, el Gran Cleveland, el Gran Cincinnati, l'área metropolitana de Kansas City y l'área metropolitana de Columbus.

Referencies[editar | editar la fonte]

  1. Census Regions and Divisions of the United States, na web de la Oficina del Censu de los Estaos Xuníos.
  2. History. Regions and Divisions, na web de la Oficina del Censu de los Estaos Xuníos.
  3. Hobbs JJ, World regional geography, p. 62. Cengage Learning, 2009. ISBN 978-0-495-38950-7