Oeste d'Estaos Xuníos

De Wikipedia
L'Oeste de los Estaos Xuníos, según la definición de la Oficina del Censu.

L'Oeste d'Estaos Xuníos, tamién nomáu Oeste Americanu (American West), Llonxanu Oeste (Far West) o simplemente L'Oeste (the West), ye una de les cuatro rexones nes que la Oficina del Censu de los Estaos Xuníos divide, con propósitos estadísticos, el territoriu d'Estaos Xuníos[1]. Concretamente, la que compriende los trece estaos más occidentales de los Estaos Xuníos, los asitiaos ente los Montes Rocosos y la Gran Conca y l'océanu Pacíficu, amás del estáu insular pacíficu de Ḥawai. Esta rexón llenda al este col Mediu Oeste d'Estaos Xuníos y el Sur d'Estaos Xuníos, con Canadá al norte y con Méxicu al sur.

El significáu del términu L'Oeste foi camudando según la población d'Estaos Xuníos d'orixe européu diba desplazándose hacia l'oeste, nún procesu que llevó sieglos completar. Primero de 1800 los cumales de la cordelera de los Apalaches yeren consideraos la frontera occidental del país. Posteriormente la frontera moviose hacia l'oeste, y entamó a considerase que L'Oeste yeren les tierres asitiaes al oeste del ríu Mississippi.

L'Oeste compriende varios biomas principales: mesetes y llanures árides y semiárides, especialmente nel so suroeste; montañes viescoses, qu'inclúin dos cordeleres importantes, los Montes Rocosos y Sierra Nevada; l'ecosistema litoral de la costa pacífica d'Estaos Xuníos; y les viesques húmides de la so fastera noroccidental.

Subrexones[editar | editar la fonte]

La Oficina del Censu sodivide la rexón en dos subrexones: la de los Estaos de los Montes Rocosos (Montana, Wyoming, Colorado, Nuevu Méxicu, Idaho, Utah, Arizona y Nevada) y la de los Estaos del Pacíficu (Washington, Oregón, California, Alaska y Ḥawai).

Otres clasificaciones estremen la rexón en función de la llatitú de los estaos. Asina, considérase davezu que Arizona, Nuevu Méxicu, Nevada, Colorado y Utah formen el Suroeste de los Estaos Xuníos (the Southwest), solos o xunta con Texas y Oklahoma, pertenecientes a otres rexones de les establecíes pola Oficina del Censu. De la mesma manera considérase que Idaho, Montana, Oregón y Washington formen lo que se conoz como'l Noroeste (the Northwest o Pacific Northwest).

Finalmente, úsase'l términu Costa Oeste (West Coast) pa facer referencia a los estaos continentales que tienen costa nel océanu Pacíficu: California, Oregón, Washington y Alaska.

Referencies[editar | editar la fonte]


  1. Census Regions and Divisions of the United States, na web de la Oficina del Censu de los Estaos Xuníos.