Santiago Carrillo

De Uiquipedia
Saltar a: navegación, buscar
Carrillo en 2007

Santiago Carrillo Solares nació en Xixón el 18 de xineru de 1915 y morrió en Madrid el 18 de setiembre de 2012. Foi un políticu que llegó a convertise en Secretariu xeneral del PCE ente 1960 y 1982.

Fiu del dirixente socialista Wenceslao Carrillo, marchó a vivir a Madrid cuando a so padre ficiéronlu responsable nacional nel PSOE y na UXT nel añu 1924. La familia instalóse nel barriu obreru de Cuatro Caminos y ellí ingresa nel Grupo Escolar Cervantes, dependiente de la Institución Llibre d'Enseñanza, hasta completar los estudios primarios. Les dificultaes económiques de la familia impíden-y cursar el Bachilleratu y abandona los estudios, entamando a trabayar como aprendiz nuna imprenta, ingresando nel PSOE a los 13 años, cuando yá llevaba dellos años viviendo en Madrid. Entamó trabayando nel periódicu El Socialista cubriendo les sesiones del Congresu de los Diputaos. Siendo unu de los dirixentes de les xuventúes del partíu, asistió a la unificación cola mesma organización del PCE convirtiéndose nes Xuventúes Socialistes Unificaes en 1934. En 1936 les JSU pasaron a les files comunistes, convirtiéndose Carrillo nel cabezaleru de la organización. En payares d'esi mesmu añu durante la Guerra civil española, ante la inminente cayída de Madrid en manes rebeldes, y la fuxida del Gobiernu a Valencia, formose la Junta de Madrid u Carrillo yera Conseyeru d'Orde Públicu.

Tres de la guerra esilióse primero na Unión Soviética pero por órdenes de la III Internacional fexo un viaxe a Estaos Uníos y Cuba, desembarcando n'Arxelia coles tropes norteamericanes en 1943. Treslladáu a Francia ordenó en 1944 el fin de la Operación Reconquista: la invasión del valle d'Arán. Mentanto los dirixentes del Partíu taben en Moscú él dirixía la seición del Partíu en Francia supervisando les operaciones guerrilleres.

Oficialmente algamó la Secretaría xeneral del partíu en 1960 magar que según la so propia autobiografía, en realidá yá dirixía la organización dende 1956. Dolores Ibárruri convirtióse na Presidente del PCE, un cargu simbólicu. Dende entós ufrió a la derecha española la Reconciliación Nacional (idega tomada de los comunistes italianos de los años 1930), pa tresformar la dictadura franquista nuna Democracia pa lo que s'acercó a tolos grupos de la oposición incluyíos la derecha de Gil Robles. En 1968 condergó la invasión de Checoslovaquia, distanciándose de Moscú.

En 1976 tornó a España por primera vegada dende 1939, siendo arrestáu y puestu en llibertá pocos díes dempués. Nun mitin en Madrid el 2 de marzu de 1977 xunto con Georges Marchais del PCF y Enrico Berlinguer del PCI, proclamó l'Eurocomunismu rompiendo rellaciones cola Unión Soviética y renunciando al Marxismu-leninismu pa favorecer el camín a la normalidá democrática. Aceutando la Monarquía, el PCE foi llegalizáu el 9 d'abril de 1977.

Nes eleiciones desi añu llogró un escañu nel Congresu de los Diputaos revalidándolu en 1979 y 1982, pero la perda de votos fizo que dimitiese al día siguiente de conocese'l resultáu eleutoral. Nel Congresu del PCE el 6 de payares foi sustiyíu pol tamién asturianu Gerardo Iglesias, pero les diferencies polítiques ficieron que fuera espulsáu'l 15 d'abril de 1985, formando un añu más tarde el PTE-UC, pero el nulu ésitu de la nueva formación desembocó na so disolución el 27 d'ochobre de 1991 ingresando los sos miembros nel PSOE pero non Carrillo.

Anguaño vive en Madrid.

Llista d'obres[editar | editar la fonte]

  • "Adónde va el Partido Socialista? (Prieto contra los socialistas del interior)" (1959)
  • "Después de Franco, ¿qué?" (1965)
  • "Eurocomunismo y Estado" (1977)
  • "El año de la Constitución" (1978)
  • "Memoria de la transición: la vida política española y el PCE" (1983)
  • "Problemas de la transición: las condiciones de la revolución socialista" (1985)
  • "El año de la peluca" (1987)
  • "Problemas del Partido: el centralismo democrático" (1988)
  • "Memorias" (1993)
  • "La gran transición: ¿cómo reconstruir la izquierda?" (1995)
  • "Un joven del 36" (1996)
  • "Juez y parte: 15 retratos españoles" (1998)
  • "La Segunda República: recuerdos y reflexiones" (1999)
  • "¿Ha muerto el comunismo?: ayer y hoy de un movimiento clave para entender la convulsa historia del siglo XX" (2000)
  • "La memoria en retazos: recuerdos de nuestra historia más reciente" (2004)