Peter Lorre

De Uiquipedia
Saltar a: navegación, buscar
Peter Lorre, 1946, semeya de Yousuf Karsh

Ladislav (Lászlo) Löwnstein (Peter Lorre), (26 de xunu de 1904 - 23 de marzu de 1964) nació en Rózsahegy/Rosenberg, Austria-Hungría, anguañu Eslovaquia, nuna familia d'orixe xudío. El so determín pa trabayar como actor foi refugáu po la so familia, que teníen programáu pa él un futuru como emplegáu de banca. Asina, bien mozu, coló pa Suiza, col enfotu de trabayar na escena. Entamó la so carrera como actor bien mozo n'escenarios de Viena, Breslau (Alemaña) y Zürich (Suiza). Nesta etapa, trabayó en compañíes de vanguardia, especialmente na de Jakob Moreno en Viena. Foi'l propiu Moreno el que-y encamento emplegar Peter Lorre como nome artísticu, nunos años nos que Löwnstein entamara los sos primeros coqueteos cola morfina. Nos caberos años de la década de 1920 asitióse en Berlín, u trabayó col dramaturgu Bertolt Brecht. En 1931 algama popularidad col so primer trabayu cinematográficu comercial, al interpretar al atormentáu asesín de neños na película M, de Fritz Lang. La so carrera n'Alemaña francióse, como-y pasara al propiu Fritz Lang, cola llegada al poder del partíu Nazi, en 1933. Lorre, xudíu, fuxó a París y más sero a Londres. El réxime nazi utilizó una imaxe promocional de la película M pa un cartelu afalando l'odiu antisemita. Nel Reinu Uníu fexo dellos trabayos a les órdenes d'Alfred Hitchcock: (The Man Who Knew Too Much / L'home que sabía demasiao, o Secret agent / Axente secretu), ente otros trabayos. Neses primeres películes ya entamaba a encarnar el personax d'estranxeru peculiar que lu fexo conocíu na so etapa en Hollywood. El personax de detective xaponés, Mr. Moto, del que fexo una serie de seis comedies, dio-y popularidá abonda n'Estaos Uníos, pero la calidá de les películes siempres fexo que Lorre les refugara. En 1939 emigró a Estaos Uníos xunto al director austriacu Billy Wilder, convirtiéndose n'actor de repartu de la Warner. El papel d'estranxeru ye dalgo que nun pudo dexar nin les sos intervenciones nes mítiques The Maltese Falcon (L'halcón maltés) (1941) y Casablanca (1943). En 1941, algamó la nacionalidá estauxunidense. Tres de la Segunda Guerra Mundial, la carrera de Lorre en Hollywood entamó a cayer. Centróse entós nel so trabayu na radio y el teatru, asina como en películes más vanguardistes como la prestixosa cinta alemana Der Verlorene (El perdíu), de 1951, coescrita, dirixía y protagonizada por él mesmu. La popularidá qu'algamara n'Estaos Uníos fizo que los dibuxantes de la Warner crearen un personaxe basáu nos sos peculiares rasgos que protagonizó delles aventures xunto a Bugs Bunny. Nos caberos años de la so carrera, Lorre trabayó en delles producciones de cine y televisión nos Estaos Uníos, u'l so aspeutu físicu condergólu delles vegáes a personaxes patéticos o siniestros. Morrió d'un infartu en 1964, a los 59 años, en Hollywood.


Filmografía[editar | editar la fonte]

Enllaces esternos[editar | editar la fonte]