Billy Wilder

De Uiquipedia
Saltar a: navegación, buscar
Billy Wilder.

Samuel Wilder, más conocíu como Billy Wilder (Sucha, Austria, 22 de xunu de 1906 - Hollywood, Estaos Xuníos, 27 de marzu de 2002) foi un direutor de cine estaunidense d'orixe austriacu. Ñació en Sucha, nel entóncenes Imperiu Austruhúngaru.

Wilder pasó la so infancia y la so xuventú n'Austria. El so primer trabayu foi como cronista nel periódicu austriacu Juranek. Continuó trabayando como cronista en Berlín, teniendo qu'alternar esta ocupación con otres pa sobrevivir. Ellí aficionóse al cine, tres ver delles películes que lu impresionaron fonderamente. Una d'elles foi L'acorazáu Potemkin, de Sergei Eisenstein. Entró a trabayar pa la UFA onde conoció a los grandes direutores del momentu.

Tres l'ascensu al poder de Hitler, Wilder vióse obligáu a abandonar Berlín, debío a la so ascendencia xudía. So ma morrería nos campos de concentración d'Auschwitz. Tuvo en París y, dende ellí, en 1934 treslladóse a Estaos Xuníos, xunto al actor Peter Lorre. Wilder y Lorre compartieron apartamentu, fame y momentos perabegosos demientres una temporada. Ellí entamó a trabayar como guionista pa la Paramount, y tuvo la ocasión de collaborar con Ernst Lubitsch, el so gran mayestru. El día del so entierru dixo: "Quedamonos ensin Lubitsch. Peor entá, quedamonos ensin les películes de Lubitsch".

De magar llegó a Hollywood en 1933, Wilder siguió la so carrera como guionista. Convirtióse en ciudadanu estaunidense en 1934. El primer éxitu de Wilder foi Ninotchka, una collaboración con otru inmigrante alemán, Ernst Lubitsch. Estrenada en 1939, esta enlloquecida comedia tuvo como protagonista a Greta Garbo (xeneralmente conocida como una heroína tráxica nel cine melodramáticu), y foi aclamada pola crítica y el públicu. Nesa llinia, Garbo Laughs!, llevó la carrera de Garbo nuna nueva dirección. La película tamién supuso la primera nominación de Wilder a los Premios Oscar. Durante doce años Wilder co-escribió munches de les sos películes con Charles Brackett, dende 1938 a 1950. A Ninotchka, siguióla una riestra d'éxitos de taquilla, Hold Back The Dawn, Ball of Fire, asina como la so ópera prima como director, The Major and the Minor.

Como guionista, Wilder escribió 60 películes. Como direutor, realizó 26 películes. Foi galardonáu con siete Oscar tres ser nomináu en 21 ocasiones.

En 1981 dirixó la so cabera película, Equí, un collaciu. De magar entós les compañíes aseguradores yá nun queríen asegurar películes suyes debío a la so avanzada edá. Morrió 21 años más sero a la edá de 95 años na so residencia de Beverly Hills, por mor d'una neumonía.

Nuna entrevista espublizada en 1952 Wilder enumeró les sos diez películes favorites:

  1. L'acorazáu Potemkin (Sergei Eisenstein) (1925)
  2. Fuñeria (Erich von Stroheim) (1923)
  3. Varieté (Charles Dupont) (1925)
  4. La quimera l'oru (Charles Chaplin) (1924)
  5. Y el mundiu marcha (King Vidor) (1928)
  6. La gran ilusión (Jean Renoir) (1937)
  7. El delator (John Ford) (1935)
  8. Ninotchka (Ernst Lubitsch) (1939)
  9. Los meyores años de la nuesa vida (William Wyler) (1946)
  10. El lladrón de bicicletes (Vittorio de Sica) (1948)

Filmografía como direutor[editar | editar la fonte]