Mao Zedong
De Uiquipedia
Mao Zedong 
(Pronunciación) (chinu simplificáu: 毛泽东 ; chinu tradicional: 毛澤東 ; pinyin: Máo Zédōng, Wade-Giles: Mao Tse-tung;
Nacíu en Shaoshan, Hunan, 26 de payares de 1893 - Pequín, 9 de setiembre de 1976, el so apellíu ye Mao, Zedong ye'l nome de pila. Foi el másimu dirixente del Partíu Comunista de China (PCCh) y de la República Popular China. Baxo'l so llideralgu, el Partíu Comunista fízose col poder na China continental en 1949, cuando se proclamó la nueva República Popular, tres la victoria na Guerra Civil escontra les fuercies de la República de China. La victoria comunista prevocó la fuxida de Chiang Kai-shek y los sos acólitos del Kuomintang a Taiwán y convirtió a Mao nel llíder másimu de China hasta la so muerte en 1976.
Nel planu ideolóxicu, Mao asumió los plantegamientos del marxismu-leninismu pero con xeitos propios sofitaos nes carauterístiques de la sociedá china, muy desemeyada de la europea. En particular, el comunismu de Mao da un papel central a la clase campesina como motor de revolución, plantegamientu que deseméyase del camientu tradicinal marxista-leninista de la Xunión Soviética, que veía a los campesinos como una triba d'escasa capacidá de movilización y axudicaba a los trabayaores urbanos el papel central na llucha de clases.
La etapa de gobiernu de Mao tuvo carauterizada por intenses campañes de reafirmación ideolóxica, que prevocaríen descomanaes conmociones sociales y polítiques en China, como'l Gran Saltu Alantre y especialmente la Revolución Cultural, intre nel que'l so poder algamó les cotes másimes al desendolcase un intensu cultu a la personalidá alrodiu de la so figura. Entá güei, el papel hestóricu de Mao ta arrodiáu d'una gran controversia.
Años dempues de la so muerte, en 1981, el Partíu Comunista de China asoleyó un analís oficial sobro la responsabilidá de Mao nos problemes sociales y económicos derivaos de les sos polítiques, nel que-y achacaben errores graves, entá cuando se-y reconocía el so papel como gran llíder revolucionariu y artífice de la xubida al poder del Partíu comunista. Dende entós, el Partíu Comunista de China caltien esta valoración hestórica de Mao como un gran llider, fonte de llexitimidá del propiu partíu, que sicasí, fizo dellos errores graves. Fuera de la República Popular, les valoraciones de Mao camudaren dende la visión bonal que lu amosaba como un llíder popular.
Esta visión fízose enforma popular n'Occidente gracies al llibru del estaunidense Edgar Snow Red Star over China ("Estrella roxa sobro China"), asoleyáu en 1939, hasta'l collumbramientu de la so etapa nel poder como un exemplu d'autoritarismu tiránicu y brutal. Chang y Halliday (2006) consideren a Mao un dictador tiránicu, que fuera responsable direutu de la muerte d'hasta 70 millones de chinos. Li Zhishui (1995), qu'afitaba ser el mélicu personal de Mao, amuesa a Mao como un llíder caprichosu osesionáu col poder.
La gran desemeyanza ente estes visiones opuestes de la figura de Mao, básense en cual foi el so nivel de responsabilidá nel fracasu de munches de les polítiques radicales que s'adoutaren demientres el so llideralgu, asina como a les cifres de muertos de mena direuta o indireuta d'eses campañes polítiques.
[editar] Notes
[editar] Bibliografía
- En castellanu
- Li Zhisui: La vida privada del presidente Mao, Planeta, Barcelona, 1995 (ISBN 84-08-01406-4)
- Chang, Jung y Halliday, Jon. Mao: la historia desconocida, Taurus ediciones, Madrid, 2006 (ISBN 84-30605-97-5).
- Fairbank, John King. China, una nueva historia, Editorial Andrés Bello, Barcelona, 1997 (ISBN 84-89691-05-3).
- N'inglés
- Short, Philip. Mao: A Life, John Murray, 2004 (ISBN 0719566762).
- Spence, Jonathan D. Mao Zedong, Penguin Books, 2006 (ISBN 0143037722).
- Clements, Jonathan, Mao Zedong (Life & Times) Haus Publishing Limited, 2006 (ISBN 1904950337).
- MacFarquhar, Roderick y Schoenhals, Michael, Mao's Last Revolution, The Belknap Press, 2006 (ISBN 0674023323).
- Sun Shuyun. The Long March, HarperCollins, 2006 (ISBN 0-007-19479-X).
- Jocelyn, Ed y McEwen, Andrew. The Long March, Constable, Londres 2006 (ISBN 1-84529-255-3).
- Spence, Jonathan D. The Search for Modern China, W. W. Norton and Company, Nueva York, 1999 (ISBN 0-393-30780-8).
- Hsü, Immanuel C. Y. The Rise of Modern China, 6th edition, Oxford University Press, Oxford, 1999 (ISBN 0-195-12504-5).
