Guerra de Corea

De Uiquipedia
Saltar a: navegación, buscar
Uiquipedia:Wikipedia:Llista d'artículos que toa Wikipedia tien que tener/Archivu
Semeyes de la Guerra de Corea.

La Guerra de Corea foi una guerra ente Corea del Sur, sofitada pola Organización de les Naciones Xuníes (ONU), y Corea del Norte, sofitada pola República Popular China, con ayuda de material militar de la Xunión Soviética. La guerra foi el resultáu de la división de Corea por un alcuerdu de los victoriosos Aliaos de la Segunda Guerra Mundial tres la conclusión de la Guerra del Pacíficu a la fin de la Segunda Guerra Mundial. La península de Corea permaneciera ocupada por Xapón dende 1910 hasta'l final de la Segunda Guerra Mundial. Tres la rindición incondicional del Imperiu del Xapón, los estaunidenses dixebraron la península pol Paralelu 38, el norte del cual quedó ocupáu por tropes soviétiques y el sur por tropes estaunidenses.

El fracasu de la celebración d'eleiciones llibres en tola península en 1948 acentuó la división ente dambes partes, y el norte afitó un gobiernu comunista. El paralelu convirtióse inda más nuna frontera política ente dambes Corees. Anque les negociaciones pa la reunificación siguieron nos meses anteriores a la guerra, la tensión intensificóse con amarraces tresfronterices ya incursiones nel Paralelu 38. La xuba de tensión dexeneró nuna guerra abierta cuando Corea del Norte invadió Corea del Sur el 25 de xunu de 1950, no que suponía'l primer conflictu armáu seriu de la Guerra fría.

Les Naciones Xuníes, y particularmente los Estaos Xuníos, foron n'ayuda de Corea del Sur pa repeler la invasión, pero en namái dos meses el defensores foron emburriaos al Perímetru Pusan, un área pequeña nel estremu sur de la península, enantes de que detuvieren a los norcoreanos. Una rápida contraofensiva de les Naciones Xuníes devolvió a los norcoreanos más allá del Paralelu 38, casi hasta'l ríu Yalu, y entós entró nel conflictu la República Popular China del llau del Norte. Los chinos llanzaron una ofensiva que forzó a les Naciones Xuníes a volver al otru llau del Paralelu 38, pa lo que la Unión Soviética ayudó con material militar a los exércitos chinu y norcoreanu. En 1953 la guerra cesó con un armisticiu que restauró la frontera ente les Corees cerca del Paralelu 38 y creó la Zona desmilitarizada de Corea, una franxa de 4 km d'anchor ente dambos países. Anguaño, siguen asocediendo rebrotes de llucha de xemes en cuando.

Coles dos Corees auspiciaes por potencies estranxeres, la Guerra de Corea foi una guerra subsidiaria. Dende'l puntu de vista de la ciencia militar, combinó estratexes y táutiques de la Primera y la Segunda guerres mundiales: empezó con una campaña móvil de rápidos ataques d'infantería siguíos por incursiones de bombardeos aéreos, pero convirtióse nuna guerra estática de trincheres dende xunetu de 1951.