António Agostinho Neto

De Uiquipedia
Saltar a: navegación, buscar

António Agostinho Neto Kilamba (1922 - 1979) foi un poeta y políticu angolanu. Foi secretariu xeneral del Movimientu Popular de Lliberación d'Angola (MPLA) y convirtióse nel primer presidente del país tres la independencia.

Elementos biográficos[editar | editar la fonte]

António Agostinho Neto, fíu d'un pastor metodista y d'una profesora, nació'l 17 de setiembre de 1922 en Kaxicane (Bengo).

Estudió medicina en Coimbra y más tarde en Lisboa, onde, con otros compatriotes, formó parte de diversos movimientos nacionalistes y culturales angolanos. Foi nesta época cuando empezó a escribir poemes, de marcáu carácter social, nos que se describíen les dures condiciones de vida del pueblu angolanu.

N'acabando la carrera de medicina, volvió a Angola. Pola mor de la so oposición al colonialismu portugués metiéronlu presu en 1960. Pasó dos años na cárcel, primero en Cabu Verde y depués en Portugal, hasta que pudo escapar y esiliase en Marruecos. Dende esti país dirixó'l MPLA, movimientu anticolonialista y marxista angolanu.

En 1961 espublizó'l segundu llibru de poemes y en 1970 la conferencia d'escritores Afro-asiáticos otorgó-y el premiu Lotus.

Tres la Revolución de los claveles de 1974, el nuevu réxime portugués concedió la independencia a la mayoría de les sos colonies. Esti mesmu añu Agostinho Neto espublizó otru llibru de poemes, tituláu Sagrada Sperança.

Neto representó al MPLA nes negociaciones colos otros movimientos militares angolanos FNLA (sofitáu por Estaos Uníos y Francia) y UNITA (respaldáu pola República Surafricana). Estes conversaciones dieron llugar a un gobiernu de transición en xineru de 1975.

Sicasí, l'alcuerdu ente les tres organizaciones duró poco tiempu y ocho meses más tarde entamaba una guerra civil nel país, controlando cada movimientu una parte del país. La capital, Luanda, queda en manes del MPLA y el 10 de payares de 1975 Agostinho Neto proclámase presidente d'Angola, col apoyu de la URSS y de Cuba, qu'unvió un fuerte continxente de tropes al país.

Gravemente enfermu, tresladáronlu pa curalu a Moscú, onde morrió'l 10 de setiembre de 1979.

Obra[editar | editar la fonte]

  • Quatro poemas de Agostinho Neto (Cuatro poemes d'Agostinho Neto) (1957)
  • Poemas (Poemes) (1961)
  • Sagrada Esperança (Sagrada esperanza) (1974)
  • A Renúncia Impossível (La renuncia imposible) (1982)