Kwame Nkrumah
Kwame Nkrumah (Francis Nwia Nkrumah) (21 de setiembre de 1909 - 27 d'abril de 1972) foi ún de los líderes políticos de la independencia de Ghana.
Formóse n'Europa y América, onde fundó diversos movimientos panafricanistes, sofitándose nes necesidaes de los sos collacios estudiantes y vindicando'l drechu de los países africanos a tener un estáu propiu.
Al so regresu a la denomada Costa d'Oru (anguaño Ghana) controlada polos británicos, fundó'l Partíu de la Convención del Pueblu ("Convention Peoples Party") p'algamar l'autodetermín demientres promocionaba fuelgues, revueltes y protestes masives de la población civil, polo que foi deteníu en delles ocasiones.
Creyía nun socialismu moderáu p'África, que nun ñegara dellos aspeutos del sistema de producción capitalista si bien siempres foi un firme oponente del imperialismu occidental. Proclamóse aliáu de la China de Mao. Como líder de la nueva República de Ghana favoreció la industrialización del país, aprovechando los beneficios del comerciu del cacáu.
Nos sos llibros la tema común yera la llucha de clases y el deber de los africanos a oponese a ser colonies de países foriatos.
Foi derrocáu, nun güelpe presuntamente orquestáu por Gran Bretaña, demientres s'alcontraba de viaxe per China y Vietnam el 24 de febreru de 1966. Nkrumah enxamás tornó a Ghana y vivió esiliáu en Guinea. Por embargu la muerte sosprendió-y demientres s'afayaba en Rumanía siguiendo un tratamientu médicu.
