Kaus Medius

De Wikipedia
Saltar a navegación Saltar a la gueta
Kaus Medius
Kaus Medius A
Constelación Saxitariu
Ascensión reuta α 18h 20min 59,7s
Declinación δ -29º 49’ 41’’
Distancia 347 ± 7 años lluz
Magnitú visual +2,72
Magnitú absoluta -2,16
Lluminosidá 1180 soles
Temperatura 4300 K (aprox)
Masa 5 soles
Radiu 62 soles
Tipu espectral K3IIIa
Velocidá radial -20 km/s
Otros nomes HD 168454 / HR 6859
HIP 89931 / SAO 186681

Kaus Medius (δ Sagittarii / δ Sgr / 19 Sagittarii)[1] ye una estrella de magnitú aparente +2,72, la cuarta más brillosa na constelación de Saxitariu. Visualmente forma parte del arcu de Saxitariu, tando asitiada ente Kaus Australis (ε Sagittarii) y Kaus Borealis (λ Sagittarii). D'ende provién el so nome: Kaus del árabe «arcu» y medius del llatín, indicando la so posición entemedia nel arcu. Tamién ye conocida como Kaus Media y Kaus Meridionalis.

Kaus Medius ye una xigante naranxa de tipu espectral K3IIIa especialmente lluminosa, yá que relluma con una lluminosidá 1180 vegaes mayor que la lluminosidá solar. La so temperatura superficial de 4300 K ye averada, una y bones ésta nunca foi midida direutamente. Tamién destaca pol so tamañu, siendo'l so radiu 62 vegaes más grande qu'el radiu solar; asitiada nel llugar del Sol, estiéndese hasta 3/4 partes de la órbita de Mercuriu. Con una masa 5 vegaes mayor que la del Sol, nel so nucleu probablemente tien llugar la fusión nuclear de heliu en carbonu.[2] Tien una metalicidá similar a la solar ([Fe/H] = -0,01).[3]

Visualmente Kaus Medius tien trés compañeres tenues:[4]

  • Kaus Medius B, estrella de magnitú 14,5 a 29 segundos d'arcu de la estrella principal.
  • Kaus Medius C, estrella de magnitú 15,0 a 36 segundos d'arcu.
  • Kaus Medius D, estrella de magnitú 13,0 a 59 segundos d'arcu.

Nun se sabe con certeza si estes estrelles tán físicamente rellacionaes con Kaus Medius o a cencielles tán na mesma llinia de visión. Per otra parte, esiste cierta evidencia espectroscópica de que tamién puede esistir una compañera cercana, lo que pudiera tar rellacionáu cola so incierta clasificación como estrella de bariu «leve» —una estrella que foi contaminada con elementos pesaos procedentes d'una compañera yá evolucionada—.[2]

Kaus Medius alcuéntrase a 347 años lluz del Sistema Solar y dientro de 2,6 millones d'años va tener llugar el so máximu acercamientu a la Tierra —va tar a 245 años lluz—, momentu en qu'el so rellumu va algamar magnitú +1,96.[5]

Referencies[editar | editar la fonte]