Idaho
Idaho ye un estáu de los Estaos Xuníos. Asitiáu al noroeste del país, la Oficina del Censu, na so división rexonal, inclúilu dientro de los Estaos de los Montes Rocosos. Sicasí, ye vezu incluyilu na rexón xeográfica nomada Pacíficu Noroeste. Tien una estensión de 216.632 km² y una población (U.S. Census Bureau, 2020) de 1.839.106 habitantes. Llenda'l norte con Canadá (Columbia Británica), al este con Montana y Wyoming, al sur con Utah y Nevada, y al oeste con Oregón y Washington. La so capital, y tamién la ciudá más grande, ye Boise.
El so territoriu foi habitáu, demientres miles d'años, por delles tribus de nativos americanos, con predominiu de los Nez Percé nel norte y de los shoshone nel sur. A entamos del sieglu XIX el territoriu formaba parte del nomáu Oregon Country (el país d'Oregón), una faza de territoriu disputada ente los Estaos Xuníos ya l'Imperiu británicu: convirtiose, pol tratáu d'Oregón de 1846, en parte del territoriu estauxunidense. De magar, hasta 1863, les tierres d'Idaho formaron parte alternativamente del Territoriu d'Oregón y el Territoriu de Washington. En 1863 creose un Territoriu d'Idaho, que foi almitíu como estáu (el 43u) na Xunión el 3 de xunetu de 1890.
Nel territoriu d'Idaho, que forma parte de la rexón Pacíficu Noroeste (y la biorrexón asociada, Cascadia), estrémense distintes rexones xeográfiques y climátiques. El norte del estáu, viescosu, ye'l relativamente aislláu Idaho Panhandle (Mangu d'Idaho), que ta mui venceyáu social y económicamente a la fastera oriental del estáu de Washington, cola que comparte fusu horariu: pertenez al Tiempu del Pacíficu (Pacific Time Zone), mentantu que'l restu del estáu usa el Tiempu de la Montaña (Mountain Time Zone). El sur del estáu inclúi la llanada del ríu Snake, na que se concentra la mayor parte de la población y de la producción agrícola, y el suroeste forma parte de la Gran Conca. El territoriu, en xeneral, ye montunu, y inclúi dellos cordales de los Montes Rocosos. El Serviciu Forestal de los Estaos Xuníos xestiona'l 38% del territoriu, la mayor proporción de cualisquier estáu del país[1].
Ente les industries más importantes del estáu tán les venceyaes al sector primariu (agrícola, forestal, minera), amás de les manufactures y el turismu. Nos caberos tiempos tienen instalao les sos sedes o fábriques n'Idaho delles firmes de los campos científicu y tecnolóxicu, y n'Idaho Falls alcuéntrase'l Llaboratoriu Nacional d'Idaho, la mayor de les instalaciones del Departamentu d'Enerxía dedicaes a la investigación de tol país. Ente la bayura de cultivos que se producen nel estáu rescamplen les pataques: casi un 33% de la producción nacional colléchase nesti estáu. El nomatu oficial del estáu ye Gem State (l'estáu xoya), en referencia a la belleza natural del estáu[2].
Referencies[editar | editar la fonte]
- ↑ "Western States Data Public Land Acreage", wildlandfire.com. Datos de 13 de payares de 2011.
- ↑ Wells, Merle W. «Origins of the Name "Idaho" and How Idaho Became a Territory in 1863».
| |||
|
Alabama · Alaska · Arizona · Arkansas · California · Carolina del Norte · Carolina del Sur · Colorado · Connecticut · Dakota del Norte · Dakota del Sur · Delaware · Florida · Georgia · Ḥawai · Idaho · Illinois · Indiana · Iowa · Kansas · Kentucky · Louisiana · Maine · Maryland · Massachusetts · Michigan · Minnesota · Mississippi · Missouri · Montana · Nebraska · Nevada · New Hampshire · Nueva Jersey · Nueva York · Nuevu Méxicu · Ohio · Oklahoma · Oregón · Pennsylvania · Rhode Island · Tennessee · Texas · Utah · Vermont · Virxinia · Virxinia Occidental · Washington · Wisconsin · Wyoming |
