Emily Dickinson

Artículu destacáu
De Wikipedia
Emily Dickinson
Vida
Nacimientu Amherst[1]10 d'avientu de 1830[2]
Nacionalidá Bandera de Estaos Xuníos d'América Estaos Xuníos [1]
Residencia Amherst
South Hadley (es) Traducir
Llingua materna inglés
Muerte Amherst[3]15 de mayu de 1886[2] (55 años)
Sepultura Amherst West Cemetery (en) Traducir[1]
Causa de la muerte Enfermedad de Bright (es) Traducir[1]
Familia
Padre Edward Dickinson
Madre Emily Norcross
Casada con ensin valor
Hermanos/es
Familia
Estudios
Estudios Wilbraham & Monson Academy (en) Traducir
Amherst Academy (en) Traducir
(1840 - 10 agostu 1847)
Mount Holyoke College (es) Traducir
(1847 - 25 marzu 1848)
Llingües falaes inglés[4]
Oficiu escritorapoeta
Premios
Influyencies Ralph Waldo Emerson
Xéneru artísticu poesía
emilydickinson.org
Cambiar los datos en Wikidata

Emily Elizabeth Dickinson (10 d'avientu de 1830Amherst – 15 de mayu de 1886Amherst) foi una poeta d'Estaos Xuníos, cuya poesía apasionada la colocó nel reducíu panteón de poetes fundacionales estauxunidenses que güei comparte con Edgar Allan Poe, Ralph Waldo Emerson y Walt Whitman. Emily Dickinson pasó gran parte de la so vida recluida nuna habitación de la casa de so padre n'Amherst y, excepto cinco poemes (trés d'ellos asoleyaos ensin la so firma y otru ensin que l'autora lo supiera), la so inxente obra permaneció inédita y oculta hasta depués de la so muerte.

Entornu social y familiar[editar | editar la fonte]

Daguerrotipu panorámicu d'Amherst, la ciudá natal d'Emily, tomáu nel añu de la so muerte.

Emily Dickinson provenía d'una familia notable de Nueva Inglaterra. Los sos antepasaos llegaren a Estaos Xuníos na primera fola migratoria puritana, y la estricta relixón protestante que profesaben influyó sobre la obra de l'artista.

Abogaos, educadores y funcionarios políticos poblaben l'árbol xenealóxicu d'Emily: unu de los sos antepasaos foi secretariu del Ayuntamientu de Wethersfield, Connecticut en 1659; so güelu Samuel Fowler Dickinson foi a lo llargo de cuarenta años xuez del condáu de Hampton, Massachusetts, secretariu del Conceyu, representante na Corte Xeneral y senador nel Senáu Estatal.

El padre de la poeta, Edward Dickinson, abogáu pola Universidá de Yale, foi xuez n'Amherst, representante na Cámara de Diputaos de Massachusetts, senador na capital del Estáu y por último representante pol estáu de Massachusetts nel Congresu de Washington. Edward fundó la llinia ferroviaria Massachusetts Central Railroad y tamién (con so padre Samuel) l'Amherst College, entidá educativa intermedia ente una escuela secundaria y la Universidá que dio rellumu cultural a la so escaecida y pequeña aldea.

El sociu d'Edward Dickinson nel so bufete xurídicu yera primu de Ralph Waldo Emerson que, por esti motivu, siempre tuvo vinculáu al pueblu d'Amherst y influyó sobre la filosofía y la obra d'Emily.

La muyer d'Edward y madre de la poeta foi Emily Norcross Dickinson (18041882), qu'hacia'l fin de so vida tuvo encamada y a cargu de les sos fíes.

Emily Dickinson tuvo dos hermanos: el mayor, William Austin Dickinson (18291895), xeneralmente conocíu pol so segundu nome, casó con Susan Gilbert, amiga de la so hermana Emily, en 1856 y vivió na casa vecina a la de so padre.

La so hermana menor, Lavinia Norcross Dickinson (18331899), tamién conocida como Vinnie, foi la "descubridora" de les obres d'Emily depués de la so muerte y convirtióse na primera compiladora y editora de la so poesía.

Contestu históricu[editar | editar la fonte]

Emily Dickinson nació en tiempos anteriores a la Guerra de Sececión, cuando fuertes corrientes ideolóxiques y polítiques chocaben na sociedá media-alta estauxunidense.

Incluso nes families más acomodaes nun había agua caliente, los baños nun taben dientro de la casa y los trabayos de llimpieza y atención familiar suponíen una carga bien grande pa les muyeres (por más que la familia Dickinson pola so buena posición social disponía d'una sirvienta irlandesa), polo qu'Emily, esmolecida por algamar una buena educación, yera un casu raru na sociedá rural de la Nueva Inglaterra de la dómina.

La severa relixosidá puritana facíase presente en toles partes y práuticamente la única expresión artística aceptada yera la música del coru de la ilesia. La ortodoxa protestante de 1830 consideraba a les noveles lliteratura disipada, los xuegos de cartes y los bailles nun taben permitíos; nun había conciertos de música clásica nin representaciones teatrales. La Pascua y la Navidá nun se celebraben (polo menos hasta 1864 en que s'instaló la primera Ilesia Episcopal n'Amherst, qu'aportó los nuevos vezos) y nun se toleraben aconceyamientos de muyeres soles más que'l té diariu ente vecines.

Una vez fundáu pol güelu y el padre d'Emily l'Amherst College, la xunión ente esti y la ilesia entamó a formar misioneros que salieron d'Amherst pa propagar los ideales protestantes pelos requexos más remotos del planeta: l'ocasional regresu de dalgunu d'estos relixosos traxo nueves idees, visiones y conceptos na conservadora sociedá del pueblu, que d'esti mou entamó a tomar contautu col mundu esterior abandonando les vieyes costumes y creencies más rápido qu'otres zones de la rexón.

La so vida[editar | editar la fonte]

Neñez, adolescencia y estudios[editar | editar la fonte]

Los sos hermanos y cuñada[editar | editar la fonte]

Emily Dickinson nació nel llar familiar na medianueche del 10 d'avientu de 1830, dos años depués del casamientu. Mui apegada a los ideales y conceptos puritanos en boga, tardó munchos años n'entamar a rebelase, por más que nunca lo fizo de forma completa.

Emily práuticamente nun recordaba a los güelos nin a los tíos, pero de neña tuvo muncha rellación con dos pequeñes primes güérfanes, a les qu'ayudó a educar y incluso llegó a lleer en secreto dellos de los sos poemas a una d'elles, Clara Newman.

Ye imposible reconstruir dafechu la neñez de la poeta a partir de los datos que poseen los investigadores, polo ruinos y fragmentarios. Sábese ensin embargo que l'hermanu mayor d'Emily, William Austin Dickinson, un añu y mediu mayor qu'ella, nació'l 16 d'abril de 1829, educóse nel Amherst College y convirtióse n'abogáu —como so padre—, graduándose na Universidá de Harvard.

Austin Dickinson casó en 1856 con Susan Huntington Gilbert, ex-compañera d'estudios d'Emily na Academia d'Amherst, xoven guapa y intelixente que paez tener cumplío un importante papel na vida emocional de la escritora. Susan Gilbert, al treslladase con Austin a la casa contigua a la que vivía Emily, convirtióse n'amiga y confidente de la poeta, y consta pola correspondencia mantenida "alambrada per medio" que la so cuñada foi la segunda persona a la que-y enseñó les sos poesíes. Incluso atrevióse a suxerir a Emily dellos cambios y retoques —que nun fueron fechos nunca—. Arriendes d'ello, plantéase que foi la destinataria d'unos trescientos de los sos poemes d'amor, y qu'esti amor yera correspondíu.[6]

Lavinia Dickinson, la so hermana menor, nacida'l 28 de febreru de 1833, foi la so compañera y amiga hasta'l fin de la so vida. Les poques confidencies íntimes que se conocen d'Emily provienen de Lavinia. Muyer brillante y intelixente, Vinnie sentía una fondera adoración pola so hermana y pol so talentu poéticu. Ensin embargo, respetó hasta la muerte d'aquella la so decisión de nun asoleyar les sos obres, y protexó la so vida privada hasta onde-y foi posible facelo, creando y calteniendo l'ambiente de calma, aislamientu y soledá qu'Emily necesitaba pa dar forma a la so gran producción poética. La fe de Lavinia na importancia de la obra de la so hermana conservóla pa la posteridá, hasta la so primera publicación póstuma. Al decir del biógrafu d'Emily, George Frisbee Wicher, la devoción de Lavinia foi la responsable de facer comprender al mundu que "la poeta llírica más memorable d'Estados Xuníos viviera y morriera nel anonimatu".

Años de formación[editar | editar la fonte]

L'Academia de Amherst yera sólo pa varones; en 1838 abrióse por primer vez la inscripción de neñes, y foi ellí onde Edward Dickinson y la so muyer inscribieron en 1840 a Emily.

A pesar de la so humildá (escribió "Fui a la escuela pero nun tuvi instrucción"), la educación d'Emily na academia foi sólida y completa. Ellí aprendió lliteratura, relixón, historia, matemátiques, xeoloxía (el so profesor yera tamién primu d'Emerson) y bioloxía. Recibió una sólida instrucción en griegu y llatín que-y permitía, por exemplu, lleer la Eneida de Virxiliu nel so idioma orixinal.

El puntu más feble de la educación d'Emily fueron ensin dulda les matemátiques, que nun-y gustaben y pa les que nun tenía facilidá. El so talentu narrativu fizo qu'escribiera les composiciones de les sos compañeres que, en retribución, facíen-y los deberes d'álxebra y xeometría.

D'esta dómina consérvase una carta a la so amiga Jane Humphrey, escrita a los 11 años, qu'amuesa un estilu académico y risón: "Güei ye miércoles, y hubo clase d'oratoria. Un rapaz lleó una composición cuyu tema yera ´Pensar dos veces anantes de falar´. Paecióme la criatura más tonta qu'enxamás existiera, y dixi-y qu'él debiera pensar dos veces anantes d'escribir".

L'entós rector de l'academia yera un esperimentáu educador acabante de llegar de Berlín. Edward Dickinson aconseyó a la so fía que s'inscribiera nos cursos d'alemán que daba, porque con seguridá nun tendría otra ocasión d'aprender esi idioma nel futuru. Arriendes d'ello, la neña estudiaba cantu los domingos, pianu con so tía, y tamién xardinería, floricultura y horticultura, estes últimes pasiones nun l'abandonaríen hasta'l fin de la so vida.

La educación de Emily Dickinson foi, polo tanto, muncho más fonda y sólida que les de les demás muyeres del so tiempu sentíase saturada y sobreexixida. A los 14 años escribe a una compañera una carta onde diz: Terminaremos la nuestra educación dalguna vez, ¿nun ye verdá? Entós tu podrás ser Platón y yo Sócrates, siempre y cuando nun seyas más sabia que yo".

Interés poles ciencies[editar | editar la fonte]

L'Academia y el Colexu d'Amherst disponíen d'un claustru de profesores compuestu por científicos de fama nacional, ente los que se contaben los biólogos Edward Hitchcock y Charles Baker Adams y el xeólogu Charles Upham Shepard, que llevaron al colexu les sos enormes coleiciones d'especímenes. En 1848, cuando l'artista tenía 18 años, ambes instituciones construyeron gabinetes pa guardar les coleiciones, asina como un importante observatoriu astronómicu con un buen telescopiu.

Too esto afaló l'interés de Dickinson poles ciencies naturales: conocía dende temprana edá los nomes de toles constelaciones y estrelles, y dedicóse con entusiasmu a la botánica. Sabía perfectamente ónde atopar cada especie de flor silvestre que xorrecía na rexón, y clasificábales acordies cola nomenclatura binomial en llatín. Toa esta erudición científica quedó firmemente guardada na so memoria, y foi utilizada pa la trama naturalista de los sos poemes munchos años depués.

Seminariu en Mount Holyoke[editar | editar la fonte]

El Seminariu pa Señorites Mary Lyon de Mount Holyoke tamién recibió a Emily Dickinson p'ayudar a la so formación relixosa y completar la so educación superior. La rapacina abandonó en 1847 el llar familiar por primer vez pa estudiar allí.

Emily, con malpenes 16 años, yera una de les más moces d'ente les 235 estudiantes de Mount Holyoke, custodiaes por un selectu garrapiellu de xóvenes maestres d'ente 20 y 30 años d'edá. L'adolescente superó ensin problemes los estrictos exámenes d'admisión y mostróse satisfecha pola educación que s'impartía nel seminariu.

Ellí intentaron qu'Emily se volcara dafechu na relixón —pa dedicase a misionar nel extranxero— pero la neña, depués d'un fondu examen de conciencia, atopó qu'aquello nun-y interesaba y negóse, quedando inscrita nel ensamu de 70 alumnes a les que se consideró "non convertíes".

Magar de too ello, Emily y la so gran imaxinación yeren bien populares nel seminariu: una condiscípula escribió que "Emily siempre taba arrodiada nos recreos por un garrapiellu de neñes que naguaben por escuchar los sos rellatos estraños y enormemente prestosos, siempre inventaos nel momentu".

En menos d'un añu, Emily superó'l cursu completu gracies, principalmente, a los sos fondos conocimientos del llatín. Aprobó rápidamente historia inglesa y gramática y sacó perbuenes calificaciones nos exámenes finales, que yeren orales y públicos. El cursu siguiente referíase a química y fisioloxía y el terceru a astronomía y retórica, toos ellos tópicos sobre los que, como queda dicho, Emily tenía fondos conocimientos. Los profesores, a la vista del so evidente dominiu de la botánica, diéron-y esta materia por aprobada ensin necesidá de cursala nin de facer exámenes.

Na primavera Emily enfermó y yá nun pudo permanecer nel seminariu. Edward Dickinson envió a Austin a buscala y tornala a casa. Depués d'esta segunda esperiencia académica de so vida, Emily Dickinson yá nun volvió a estudiar nunca más.

La so poesía[editar | editar la fonte]

Emily Dickinson definió la so poesía con estes pallabres: "Si tengo la sensación física de que me llevanten la tapa de los sesos, sé qu'eso ye poesía".

Pero nun yera capaz d'estremar los sos poemes ente sí, de correxilos nin de seleccionalos. El llibru que s'asoleyó como "Poemes escoyíos" non foi seleccionáu, correxíu nin organizáu pola poeta, que yá morriera. Esta aparente desorganización de la so obra y la so poesía valió-y l'ataque de los formalistes, ente los que se cuenta'l mentor d'Emily, Thomas Wentworth Higginson (el "Maestru").

Higginson encargóse de modificar y "adaptar" dellos poemas tempranos de Dickinson, y nes sos cartes de mocedá ella agradez-y la "ciruxía" que yera incapaz d'efectuar por sí mesma. Depués de la muerte d'Emily, Higginson sintióse llibre pa tomase delles llibertaes: entamó a podar, correxir, cambiar y retocar los sos poemes, tomándose atribuciones tan radicales como por exemplu introducir rimes n'estrofes que nun les teníen.

Usu del idioma y aparentes errores[editar | editar la fonte]

La realidá ye qu'a los formalistes de 1890 la poesía d'Emily parecía-yos descuidada, cuando en verdá ella fuera estraordinariamente precisa, por más que dellos de los sos hábitos poéticos tuviesen pasaos de moda por entós.

Dellos "errores" gramaticales que se-y imputaron yeren aceptaos como correutos na dómina en qu'ella nació (1830), por exemplu escribía extasy ("éxtasis") en llugar d' ecstasy, pero la primera forma figura nel diccionariu Webster. Ponía Himmaleh en vez d' Himalaya y Vevay en lugar de Vevey (ciudá de Suiza). Acusáronla d'inorante, pero les formes incorreutes figuraben nun atlas que tenía en so casa y que fuera impresu munchos años anantes de qu'ella naciera.

Reprochaben-y supuestos "errores" históricos y xeográficos, argumentu bien absurdu cuando s'usa escontra un poeta: ella pon qu'Cortés "descubrió l'Océanu Pacíficu" porque Balboa nun entraba na métrica. Tamién existe un poema que diz When Etna basks and purrs / Naples is more afraid ("Cuando l'Etna toma sol y vibra/ Nápoles lu tarrez más"), aunque sabía perfectamente que'l volcán cercanu a la ciudá nun yte ésti sinón el Vesubiu.

Emily emplegaba indiferentemente began ("entamó") y el participiu begun ("entamáu") como pretéritos, pero Robert Browning facía lo mesmo. Ye sabido que'l buen poeta debe forzar les normes del idioma, y la mayoría de los falsos fallos que los formalistes atopen na poesía d'Emily Dickinson débense al afán de l'autora de dar a los sos versos un tastu arcaicu. Esto visualízase nel so usu de be ("ser") indistintamente en llugar d' is ("ye") o are ("son", "somos").

Al respective de la frecuencia d'utilización de determinaes pallabres, les seis que más usa son "día", "vida", "güeyu", "sol", "home" y "cielu" (toos ellos monosílabos n'inglés excepto l'últimu). Ente los sustantivos qu'utilizó cincuenta o más veces na so poesía, solamente "veranu" y "mañana" son polisílabos n'inglés. Estes zunes puen entendese meyor como un afán de concisión que como errores téunicos.

Munchos otros errores que se-y atribuyen a l'artista son, en realidá, errates de los editores, delles derivaes de la dificultá de descifrar la lletra manuscrita de Dickinson.

Metros y rimes[editar | editar la fonte]

La rima —contrariamente a la creencia común— suel ser mui ortodoxa, escepto nunos pocos poemes. Prefier la rima yámbica y trocaica, y los versos de cuatro acentos.

Más de la mitá de los sos poemes tan escritos en "metru común", la métrica de les balaes populares y de los himnos relixosos. Munches otres veces utiliza'l "metru cortiu", estrofa de cuatro versos igual a l'anterior escepto porque'l primer versu ye trisílabu en llugar de tetrasílabu. Nunaes poques oportunidaes escribe en "metru largu", cuartetu de tetrasílabos en forma de yambos con rima alternada o de dos en dos. Sólo'l 10% de los sos poemes posee métrica o rima irregular.

Los tipos de rimes utilizaos por Emily Dickinson son:

  1. Rima idéntica: La mesma vocal precedida y seguida poles mesmes consonantes. Esta forma nun ye mui frecuente na so poesía. A veces, les pallabres que rimen son idéntiques al oyíu pero de sentios bien estremaos: seal - conceal.
  2. Rima exacta: Representen la mayor parte de la so obra, y tamién de les de los demás poetes. Munchísimos de los sos poemes dependen enteramente de la rima exacta. Les rimes dobles o femenines (aquelles nes que la parte final de les pallabres ye idéntica y dambes primeres partes tan acentuaes) son mui raras.
  3. Rima imperfecta: Cuando dos pallabres rimen si terminen nel mesmu soníu vocálicu, aunque te seguíu por consonantes estremaes. Ye bien común nos himnos relixosos y na poesía norteamericana: us - dust, por exemplu.
  4. Rima vocálica: Ye aquella na qu'una pallabra terminada en vocal pue rimar con una pallabra terminada n'otra vocal. Exemplos: be - die o cloy - necessity. Emily esaxeró el so usu p'amestalu pallabres terminaes en r, que deben pronunciase tan feblemente que nun s'estremen de les terminaes en vocal: pioneer - now.
  5. Rima suspendida: Dos pallabres terminaes en distintas vocales que pueden rimar si les vocales son seguíes por idéntica consonante. Exemplu típicu ye woman - human. Al igual que na anterior, Emily nun tien en cuenta el soníu de la r, y nesta rima tampoco'l de la l, inclusive cuando ye muda (talk = tok n'inglés).

Emily Dickinson acepta nos sos poemes les siguientes equivalencies consonántiques (ye dicir, les rimes como si se tratara de la mesma lletra):

  1. Nasales: M, N y NG.
  2. Sibilantes: S, Z, SH y CH, siempre en combinación con D, T, K o P.
  3. Dentales: D y T con ND y NT; T con CT y D con VD.
  4. Otres: T con P; K con NK y Z con G suave.

Análisis temáticu: poesía naturalista[editar | editar la fonte]

Gran parte de los poemes d'Emily Dickinson refiérense a la naturaleza, y ordénense, según la so cantidá, d'esta manera: miente

  • 58 sobre los seres vivos;
  • 33 sobre los cambeos de les estaciones o los meses;
  • 29 sobre'l cielu, los astros y los fenómenos meteorolóxicos;
  • 25 sobre'l día y la nueche;
  • 17 sobre'l paisaxe; y
  • 15 sobre la naturaleza en xeneral.

Como s'observa, dedicaba una particular atención a la bixlogía: animales, aves, reptiles, inseutos, árboles, plantes y flores.

De tolos seres vivientes los que más l'atrayín yeren los que tienen ales: páxaros, esperteyos y inseutos. Tamién les flores, y, anque vivía nun ambiente rural, enxamás dedicó un poema a una animal de la casería. Solo menciona tres veces al gallu. El so perru Carlo apaez solamente en dos oportunidades, y los sabuesos en tres.

L'animal nomado más veces ye l'abeya (con una sorprendente marca de 52) y l'abeyón (9).

L'orden de los poemes[editar | editar la fonte]

Como se dixo, los poemes publicaos en vida de l'autora cuéntense colos deos d'una mano. Esto lleva al problema de les publicaciones póstumes, ye dicir, aquelles nes que l'autor morrió y nun pue opinar sobre l'orden o la forma en que les sos obres deben ser asoleyaes.

Cabe aclarar qu'Emily nunca se tomó'l trabayu de fechar los sos poemes, polo que nun conocemos con certeza cuándo fueron escritos, y nin siquiera los ordenó d'un modu particular.

Escribió los sos poemes nos márxenes de los sos llibros, en cachos de periódicos o en papeles sueltos, a menudo de tamañu insuficiente, poblándolos arriendes d'ello d'estraños guiones aparentemente al azar, con un arbitrariu usu de les mayúscules. Ye por ello que tovía anguaño, en munchos de los sos poemes, los espertos pregúntense ónde acaba un versu y entama otru.

Los editores descuidaron la so obra tovía más: na década de 1890 asoleyáronse les sos tres antoloxíes, col material dixebráu incoherente y arbitrariamente en cuatro seiciones titulaes (polos editores) "Vida", "Naturaleza", "Amor" y "Tiempu y Eternidá". Anguaño sigue utilizándose esti estrañu criteriu.

Los editores posteriores amestaron trés tomos más, colos poemes agrupaos según criterios tamién arbitrarios. Esto significa que la obra d'Emily Dickinson nunca foi oxetu de ningún esfuerciu serio por ordenala cronolóxicamente.

Asina, por exemplu, los poemes que se refieren a la so rellación amorosa con Wadsworth atópense espreganciaos ente la Parte III: Amor, la Parte IV: Otros poemes, seición 6 y la Parte VII: Poemes amestaos, seición 3. Pero tán entemecíos con otros que nun tienen rellación dalguna col tema nin cola dómina en cuestión.

La so obra n'asturianu[editar | editar la fonte]

El númberu 3 de la revista Campu de los Patos, dedicada a la poesía norteamericana, incluye una esbilla de poemes d'Emily, tornaos al asturianu por Pablo Antón Marino Estrada[7], xunto con una reseña biográfica y crítica[8] ellaborada pol propiu traductor.

Referencies[editar | editar la fonte]

  1. 1,0 1,1 1,2 1,3 1,4 1,5 URL de la referencia: https://www.biography.com/people/emily-dickinson-9274190. Data de consulta: 4 setiembre 2018.
  2. 2,0 2,1 Biblioteca Nacional de Francia. «autoridaes BNF» (francés). Consultáu'l 10 ochobre 2015.
  3. URL de la referencia: http://asteria.fivecolleges.edu/findaids/amherst/ma167.html. Data de consulta: 17 abril 2017.
  4. Biblioteca Nacional de Francia. «autoridaes BNF» (francés). Consultáu'l 10 ochobre 2015.
  5. URL de la referencia: https://www.womenofthehall.org/inductee/emily-dickinson/. Data de consulta: 17 abril 2017.
  6. Cf. Rosario Zanetta, "Las mujeres de Emily Dickinson" n'El País, 27 d'agostu de 2012 https://blogs.elpais.com/mujeres/2012/08/las-mujeres-de-emily-dickinson.html
  7. Marino Estrada, Pablo Antón: «Ventiocho poemes d'Emily Dickinson». Campu de los Patos. Revista Asturiana de Cultura, númberu 3, páxina 53
  8. Marino Estrada, Pablo Antón: «Emily Dickinson, la voz cómpliz». Campu de los Patos. Revista Asturiana de Cultura, númberu 3, páxina 51

Bibliografía[editar | editar la fonte]

  • Dickinson, Emily: The Complete Poems of Emily Dickinson, editada por Johnson, Thomas H., Little, Brown & Co., Boston, 1960. ISBN ISBN 0-316-18413-6.
  • Sewall, Richard B.: The Life of Emily Dickinson, Farrar, Strauss and Giroux, Nueva York, 1974.
  • Wicher, George F.: This was a poet: a critical biography of Emily Dickinson, Ann Arbor Paperbacks, The University of Michigan Press, Chicago, 1965.

Enllaces esternos[editar | editar la fonte]