Edasich

De Wikipedia
Saltar a navegación Saltar a la gueta
Edasich
Edasich
Constelación Draco
Ascensión reuta α 15h 24min 55,77s
Declinación δ +58º 57’ 57,8’’
Distancia 103 años lluz
Magnitú visual +3,29
Magnitú absoluta +0,81
Lluminosidá 70 soles
Temperatura 4490 K
Masa 1,05 soles
Radiu 13 soles
Tipu espectral K2III
Velocidá radial -10,7 km/s
Otros nomes HD 137759 / HR 5744
HIP 75458 / SAO 29520

Edasich o Ed Asich (ι Draconis / 12 Draconis / HIP 75458)[1] ye la sesta estrella más brillosa de la constelación de Draco, con magnitú aparente +3,29. Alcuéntrase a 103 años lluz del Sistema Solar.

Nome[editar | editar la fonte]

El nome de Edasich provién del árabe Al Ḍhibaʼ o Al Dhīḣ que'l so significáu ye «hiena machu».

En China yera conocida como Tsao Choo, «el pivós esquierdu». Xuntu a Altais (δ Draconis), π Draconis, ρ Draconis y Alsafi (σ Draconis) formaba Tien Choo, «la cocina celestial».[2]

Carauterístiques físiques[editar | editar la fonte]

Edasich ye una xigante naranxa de tipu espectral K2III y 4490 K de temperatura efectivo. Relluma con una lluminosidá 70 vegaes mayor que la lluminosidá solar.[3] La midida del so diámetru angular —3,73 milisegundos d'arcu— dexa conocer qu'el so diámetru ye 13 vegaes más grande qu'el del Sol.[4] Presenta un conteníu metálico superior a la solar ([Fe/H] = +0,16) y —como la mayor parte de les estrelles de la nuesa redolada— ye una estrella del discu finu.[5]

Tocantes a el so estáu evolutivu, Edasich posiblemente tea aumentando'l so rellumu como estrella xigante con un nucleu inerte de heliu nel so interior. Siendo'l so metalicidá y masa similares a los del Sol, puede contemplase a Edasich como'l futuru de la nuesa estrella dientro d'unos 6000 millones d'años.[3] Col tiempu Edasich va perder la mayor parte de la so actual masa per aciu un intensu vientu estelar que va espulsar les sos capes esternes de hidróxenu y heliu al espaciu interestelar, fase que se denomina nebulosa planetaria. La resultancia última va ser una nana blanca de tamañu asemeyáu al de la Tierra.[6]

A pocu más de 4 minutos d'arcu de Edasich puede reparase una tenue estrella (HD 238461) de magnitú +8,78.[7] De tipu espectral K7, paez nun tar gravitacionalmente xunida a Edasich, coincidiendo a cencielles na mesma llinia de visión.[3]

Sistema planetariu[editar | editar la fonte]

En 2002 afayóse un planeta estrasolar, llamáu Edasich b, orbitando alredor de Edasich. Muévese nuna órbita bien escéntrica que fai que la separación ente estrella y planeta fluctúe ente 0,39 y 2,1 UA. De masa indeterminao, pero a lo menos 8,8 vegaes la de Xúpiter, puede tratase d'un xigante gaseosu o d'una nana marrón, completando una órbita alredor de la estrella cada 1,4 años.[8] Foi'l primer cuerpu subestelar descubiertu alredor d'una estrella xigante.

Acompañante
(N'orde dende la estrella)
Masa
(MJ)
Periodu orbital
(díes)
Semiexe mayor
(UA)
Escentricidá
b > 8,82 ± 0,72 511,098 ± 0,089 1,275 ± 0,074 0,7124 ± 0,0039

Ver tamién[editar | editar la fonte]

Referencies[editar | editar la fonte]