Altais

De Wikipedia
Saltar a navegación Saltar a la gueta
Altais
Altais
Constelación Draco
Ascensión reuta α 19h 12min 33,5s
Declinación δ +67º 39’ 40,7’’
Distancia 97 años lluz
Magnitú visual +3,07
Magnitú absoluta +0,63
Lluminosidá 63 soles
Temperatura 4817 K
Masa 2,5 soles
Radiu 11 soles
Tipu espectral G9III
Velocidá radial +24,8 km/s
Otros nomes HD 180711 / HR 7310
HIP 94376 / SAO 18222

Altais (δ Draconis / δ Dra / 57 Draconis)[1] ye la cuarta estrella más brillosa de la constelación de Draco —el dragón— dempués de Etamin (γ Draconis), η Draconis y Alwaid (β Draconis). La so magnitú aparente ye +3,07.

Nome[editar | editar la fonte]

El nome de Altais provién del árabe Al Tais y significa «la Cabra», en referencia a un asterismo que simbolizaba esti animal na antigua astronomía árabe. Otra denominación bien utilizada pa esta estrella ye Nodus Secundus o Nodus II, d'orixe llatín, pos marca'l segundu nuedu na figura del dragón.[2]

Na astronomía china, δ Draconis, xunto a Tyl (ε Draconis), π Daconis, ρ Draconis y Alsafi (σ Draconis), constituyía Tien Choo, «la Cocina Celestial».[2]

Distancia y cinemática[editar | editar la fonte]

Altais alcuéntrase a 97 años lluz del Sistema Solar. Fai 750.000 años foi cuando tuvo a mínima distancia de la Tierra —59 años lluz—, algamando'l so rellumu magnitú +1,97.[3]

La órbita de Altais alredor del centru de la Vía Lláctea ye considerablemente escéntrica (y = 0,40, frente a y = 0,16 que tien el Sol). Ello fai que nel apoastru —máxima separación— la so distancia al centru de la galaxa supere los 17,2 kilopársecs.[3] χ Draconis, Labrum (δ Crateris) y ν Hydrae son exemplos d'estrelles con órbites galáctiques tamién notablemente escéntriques.

Carauterístiques[editar | editar la fonte]

Altais ye una xigante mariellu-naranxa de tipu espectral G9III. Les sos carauterístiques son asemeyaes a les de Vindemiatrix (ε Virginis), anque ye llixeramente menos lluminosa y caliente qu'ésta última. La so lluminosidá ye 63 vegaes mayor que la del Sol y la so temperatura superficial ye de 4817 K.[4] Tien un radiu 11 vegaes más grande qu'el radiu solar. Amuesa un conteníu metálico inferior a la solar nun 32% ([Fe/H] = -0,17).[4] Con una masa 2,5 vegaes mayor que la del Sol, tien una edá averada de 700 millones d'años. Nel so nucleu d'estrella xigante produzse la fusión del heliu en carbonu y oxíxenu.[5]

Desconozse si una estrella de magnitú 12 que se topa a 88 segundos d'arcu de Altais ta rellacionada con ella o a cencielles coincide na mesma llinia de visión.[5]

Referencies[editar | editar la fonte]