Letizia Ortiz

So Alteza Real la Princesa d'Asturies, Letizia Ortiz Rocasolano, ñació'l 15 de setiembre de 1972 n'Uviéu. Ye fía de Jesús Ortiz Álvarez y Paloma Rocasolano Rodríguez.

Les sos maxestaes los Reyes dieren anuncia del so compromisu matrimonial con So Alteza Real el Príncipe d'Asturies el 1 de payares de 2003. La ceremonia relixosa celebróse'l 22 de mayu de 2004 na Catedral de Santa María la Real de la Almudena de Madrid. Tienen dos fíes, Leonor, ñacida'l 31 d'ochobre de 2005, y Sofía, el 29 d'abril de 2007, dambes en Madrid.

Letizia Ortiz ye la primoxénita de trés hermanes. Telma ñació'n 1973 y Érica, fallecida en 2007, en 1975. Letizia casóse polo civil en 1999, divorciándose un añu depués.

Ye llicenciada en Ciencies de la Información, rama Periodismu, pola Universidá Complutense de Madrid, y cuenta con un Máster de Periodismu Audiovisual pol Instituto de Estudios de Periodismo Audiovisual.

Emtamó los sos estudios de Doctoráu en México, onde trabayó nel periódicu Siglo 21.

Trabayó dende muy moza en dellos medios de comunicación, ente ellos el diariu asturianu La Nueva España, el periódicu ABC y l'Axencia EFE, onde realizó'l so llabor n'edición d'internacional nel últimu añu de la carrera.

Entamó la so trayeutoria televisiva na cadena estauxunidense Bloomberg TV, una canal privada especializada n'economía, finances y mercaos, con sé n'España baxo la supervisión de l'Axencia EFE Televisión, que continuó en CNN+, la canal privada formada pola estauxunidense CNN y CANAL+, en calidá de presentadora, redautora y reportera.

Letizia incorporóse l'añu 2000 a Televisión Española, onde trabayó col equipu d'edición de Telediario Segunda Edición y fíxose cargu de la presentación de Informe Semanal. Darréu presentó Telediario Matinal, los especiales sobre l'Euro que s'ofrecieren nos Telediarios de TVE y foi unviada especial a estremaos llugares del mundiu pa dir a cubrir eventos d'actualidá. Darréu tornó a formar parte del equipu de redaición de Telediario Segunda Edición, del que foi copresentadora. Foi galardonada col Premiu "Larra", otorgáu pola Asociación de la Prensa de Madrid, al periodista menor de 30 años que más se distinguiere nel añu.