La Nueva España

De Uiquipedia
Saltar a: navegación, buscar

La Nueva España ye un periódicu asturianu con 60 años d'historia. La redacción alcuéntrase n'Uviéu, aunque tien delegaciones en Xixón, Avilés, Mieres y Llangréu.

Ye'l de mayor tirada, según la OJD, de tolos periódicos asturianos: tuvo una tirada media de 54.173 exemplares de llunes a sábadu durante l'añu 2004 y de 90.903 los domingos.

Anguaño la so direutora ye Ángeles Rivero.

Hestoria[editar | editar la fonte]

La Nueva España entamó a espublizase el 15 d'ochobre de 1936 nes instalaciones del diariu socialista Avance na cai Asturies d'Uviéu. El nuéu diariu xurdió al poco d'españar la Guerra Civil española y como muérganu de sofitu a les tropes comandáes pol xeneral Francisco Franco. El so nome nun yera esclusivu del diariu uvieín y delles fueyes informatives franquistes utilizaron "La Nueva España" como nome común identitariu. La ocupación de la capital asturiana pol bandu nacional prevocó la marcha del diariu socialista Avance, qu'entamó a emprentase en Xixón, y la creyación del diariu falanxista La Nueva España na sé del periódicu socialista. La so primer portada la cubriere casi al completu un alegóricu sol naciente en alusión a la renacencia dun nuevu país por mor del llevantamientu del xeneral Franco. Col fin de la guerra, el diariu entós dirixíu por Francisco Arias de Velasco afitose nel grupu de medios de comunicación públicos Prensa del Movimiento, xunto col xixonés Voluntad. Ye por ello que la cabecera de La Nueva España caltuvo el símbolu falanxista del xugu y les fleches pente décades, asina comol sotítulu "Órgano provincial de la Falange Española Tradicionalista y de las J.O.N.S.". Na década de 1950, La Nueva España cuntaba ya con una tirada media de 30.000 exemplares diarios, lo que lu asitiaba ente los de mayor difusión d'Asturies xunto al tamién uvieín La Voz de Asturias. Nos años siguientes, el diariu entamó un procesu de modernización de les sos instalaciones col treslláu a la cai Calvo Sotelo d'Uviéu, u entá güei allúguense les instalaciones de redacción y alministración, y cola adquisición de nueves téuniques d'impresión. Nel añu 1975, La Nueva España asume la plantía del diariu Voluntad. Ye l'entamu d'un procesu que finará cola venta en puya pública de los diarios de Prensa del Movimiento. En 1984, el grupu d'orixe canariu (anguaño asitiao en Barcelona) Prensa Ibérica compra La Nueva España. Pa entós, el xugu y les fleches de la so cabecera ya foron esaniciáes, y xébrense les instalaciones del periódicu, treslladándose los talleres a un polígono industrial del conceyu Llanera. La Nueva España entama asina un procesu d'esporpoye de la so difusión, y d'afitamientu de la so influyencia. La década de 1990 ye la de la espansión del diariu pol territoriu asturianu gracies al desenvolvimientu d'ediciones comarcales. Xeneral, Xixón, Avilés, Cuenques y, dempués, Occidente, abren el diariu nes sos respectivos ámbitos xeográficos. Esa estratexa foi entamada conxuntamente con La Voz de Asturias, pero La Nueva España acabó por imponese nesti tarrén al so competidor uvieín. Anguaño, el diariu de Xixón El Comercio ye, xunto a La Nueva España, l'unicu que caltién ediciones n'Oriente, Xixón y Xeneral, además de na comarca d'Avilés, cola cabecera propio La Voz de Avilés.

Enllaces esternos[editar | editar la fonte]