Bandera de Finlandia

De Uiquipedia
Saltar a: navegación, buscar
Bandera nacional. Proporción: 11:18
Bandera oficial del estáu (rectangular). Proporción: 11:18
Bandera oficial del estáu (trés puntes). Proporción: 11:19
Bandera presidencial. Proporción: 11:19

La bandera de Finlandia foi adoptada'l 29 de mayu de 1918, cuasi seis meses dempués de la independencia'l país, magar que la llei que regula'l so usu actualmente ye de 1978. Ta formada por una cruz azul sobro fondo blancu. Hai dos variantes oficiales d'ella: la bandera nacional y la bandera oficial del estáu.

La bandera nacional ye rectangular, con una proporción 11:18 (altor:anchor). La cruz tien un anchor de trés unidaes, ta situada a una altura de cuatru unidaes y ye de color Pantone 294C. Dende l'asta hasta la cruz la bandera tien un llargor de cinco; eso, colos trés d'anchor de la cruz, dexa diez unidaes de llargor hasta'l final de la bandera. Ye la bandera qu'usen los ciudadanos, les empreses y organizaciones y los conceyos y rexones finlandeses, y puede facese usu d'ella llibremente.

La bandera oficial del estáu, que tien dos variantes posibles (rectangular y de trés puntes), tien inscritu nel cuadru que formen los dos brazos de la cruz al cruciase l'escudu oficial del país, y ye un poco más llarga que la otra, con una proporción 11:19 y puntes de cinco unidaes de llargor. Na so forma rectangular úsenla toes les instituciones de los gobiernos nacional y provinciales, quitando la policía y los xulgaos, los cabildros catedralicios de les dos ilesies nacionales (la evanxélica luterana y la ortodoxa) y los barcos civiles del país. La so versión con trés puntes úsase namái como insignia naval de l'Armada finlandesa. Úsase tamién, con una cruz de la llibertá (una condecoración de los países nórdicos) nel cuadrante superior izquierdu, como bandera presidencial.

Historia[editar | editar la fonte]

La bandera de Finlandia, llamada tamién Siniristilippu (la bandera de la cruz azul), tien el so orixe remotu nun diseñu qu'usó, por primer vegada, un club náuticu de Helsinki, nomáu Nyländska Jaktklubben, en 1861. Esa bandera llevaba, amás de la cruz, les armes de la provincia d'Uusimaa na parte superior izquierda. La bandera, menos no que cinca a la posición de la cruz, yera asemeyada a la del club náuticu de San Petersburgu, que se fundara un añu anantes, que, pela so parte, taba inspirada na insignia de l'Armada rusa.

Una y bones el país algamó la independencia en 1917 fízose un concursu pa dá-y una bandera al nuevu estáu. La mayoría de los diseños yeren bien basaos nos colores actuales, blancu y azul, o bien nel coloráu y el mariellu, que son los del escudu del país. Ansina, una de les propuestes yera d'un diseñu asemeyáu al de la bandera de Dinamarca, pero con una cruz mariella sobro fondo coloráu. Demientres que'l concursu nun se resolvió usose como bandera oficial una col escudu d'armes del país sobro fondo coloráu.

Otres banderes[editar | editar la fonte]