Alfonso Zapico

De Uiquipedia
Saltar a: navegación, buscar

Alfonso Zapico (Blimea - Samartín del Rei Aurelio, 1981) ye un dibuxante de cómic y ilustrador.

Ye diplomáu n'Ilustración y Diseñu pola Escuela d'Arte d'Uviéu. Arriendes del cómic, fai trabayos gráficos pa diverses editoriales. Igualmente collabora col diariu La Nueva España, y fíxolo cola revista de cómic n'asturianu El Gomeru. A partir del mes d'ochobre de 2008 entamó a collaborar col selmanariu Les Noticies, asoleyando una tira titulada Les pites de Grau, que vienen a sustituyir l'espaciu qu'ocupaba otru dibuxante asturianu, Ruma Barbero.

Los primeros trabayos profesionales nel mundu del cómic publicólos en Francia, La guerre du professeur Bertenev (2006) (col qu'algamó'l Prix BD Romanesque nel FestiBD Ville de Moulins en 2007[1]) y el volume colectivu Un jour de mai. Con posterioridá asoleyó, tamién nel país galu Café Budapest, qu'aborda el conflictu árabe-israelín y qu'al ser editada n'España por Astiberri en xunu de 2008 algamaría'l Premiu Haxtur al meyor guion. Nel añu 2009 editaría n'España La guerra del profesor Bertenev col que tamién conquistaría premios y sonadía en Francia. En 2009 foi becáu na Maison des auteurs d'Angoulême hasta 2011 pa desarrollar el so trabayu nesta ciudá francesa conocida ente los amantes del cómic pol so importante festival. El proyectu premiáu pol xuráu titúlase Dublinés, una biografía del escritor irlandés James Joyce. Igualmente, Zapico participó nel volume colectivu Los hombres buenos de Javier Cosnava y nel que participaron como dibuxantes, arriendes de Faustino, Daniel Acuña, Toni Carbos, Rubén del Rincón, Fernando Baldó y más otros.

Reconoz influencies del cómic franco-belxicanu no tocante al so estilu y manifiesta una mayor comodidá pal trabayu sobre asuntos de tema históricu. En 2010 algamó'l Premiu Josep Toutain al Autor Revelación nel Salón del Cómic de Barcelona.[2]

En 2011 publicó, cola editorial Astiberri, la obra Dublinés dedicada a James Joyce, l'autor Ulises[3]. Igualmente, esti mesmu añu torna a collaborar col selmanariu Les Noticies nel suplementu estival, Bris de branu, cola tira A la fresca y asoleya una obra relativa a la violencia na sociedá colombiana, titulada Imposible mirar para otro lado. Historias de Colombia, na que se narren cuatro histories reales que tienen por escenariu'l país americanu. Esti últimu trabayu foi publicáu pola Coordinadora d'ONGD del Principáu d'Asturies (Codopa).

Nel añu 2012, Zapico algamó'l Premiu Nacional del Cómic pola so obra Dublinés[4] asoleyada l'añu anterior. Tamién esi añu dibuxó'l cartel del XIV Congresu de Periodismu Dixital que s'entamó en Huesca[5].

El reconocimientu del trabayu de Zapico continuó nel añu 2013 nel que fizo'l cartel del 31 Salón Internacional del Cómic de Barcelona[6] y la esposición entamada nel Centru Niemeyer d'Avilés, titulada Pasos Encontrados. Un viaje dibujado[7]. Igualmente, nesi mesmu añu, Zapico asoleyó El otro mar nel que se relata l'aventura de Núñez de Balboa, primer européu en ver l'Océanu Pacíficu[8].

En 2013, Alfonso foi'l ganador de la quinta edición del Premiu "Alfonso Iglesias" de cómic en llingua asturiana cola so obra Cuadrenos d'Ítaca «pola profesionalidá que s'amuesa na obra d'acordies coles nueves tendencies europees» n'opinión del xuráu[9].

Trabayos asoleyaos[editar | editar la fonte]

  • La guerre du professeur Bertenev (2006)
  • Café Budapest * Dublinés (2011)
  • Imposible mirar para otro lado. Historias de Colombia (2011)
  • El otro mar (2013)

Referencies[editar | editar la fonte]

  1. Peláez, Elena. Alfonso Zapico gana el premio al autor revelación del Salón del Cómic de Barcelona. La Nueva España, 9 de mayu de 2010
  2. Graell, Vanessa en 'Hat trick' para 'El arte de volar' pa El Mundo, 07/05/2010.
  3. Zapico, autor revelación del cómic, publica Dublinés artículu d'El País (25.03.2011).
  4. [1] Les Noticies, Alfonso Zapico, Premiu Nacional del Cómic 2012 por «Dublinés»,consultao'l 22.10.2012.
  5. Alfonso Zapico dibuxa'l cartelu del XIV Congresu de Periodismu Dixital de Huesca Asturnews, consultao'l 26.12.2012
  6. Presentación y primeras imágenes del cartel de Alfonso Zapicoimakinariu.net. Consultao'l 23.04.2013
  7. Alfonso Zapico expone en el Niemeyer La Nueva España, consultao'l 23.04.2013
  8. Alfonso Zapico, aventura oceánica La Nueva España, consultao'l 31.10.2013
  9. Alfonso Zapico gana'l "Alfonso Iglesias" con "Cuadernos d'Ítaca" Asturnews. Consultao'l 21.11.2013

Enllaces esternos[editar | editar la fonte]