Les Noticies

De Uiquipedia
Saltar a: navegación, buscar

Les Noticies foi un selmanariu asturianu fundáu n'Uviéu en 1996 pola editorial Publicaciones Ámbitu y que s'asoleyó hasta'l 5 de febreru de 2012 cuando apaeció'l so últimu númberu, el 769. Definíase como "Selmanariu independiente d'información xeneral". El director de la dómina final del selmanariu yera Henrique G. Facuriella, que sustituyera a Beatriz R. Viado, que nel so momentu convirtióse na primer muyer asturiana en dirixir un periódicu.

Hestoria[editar | editar la fonte]

El númberu 1 del selmanariu Les Noticies salió a la cai el 6 de setiembre de 1996. N'agostu d'esi añu, nel marcu de la Feria Internacional de Muestres d'Asturies, presentóse'l númberu cero con una bultable repercusión: yera'l primer periódicu escritu dafechu n'asturianu desde qu'en 1901 apaeciera en Xixón el primer númberu del selmanariu rexonalista "Ixuxú". N'aquella presentación en sociedá, l'editor de Les Noticies y primer direutor del periódicu, Inaciu Iglesias, afitó les llínies maestres del proyeutu editorial: «El nuesu compromisu ye colos asturianos, colos nuestros llectores y cola so cultura particular. Esi vínculu éticu vamos a renovalu selmana a selmana hasta consiguir asentar un proyectu a toes lluces necesariu». El periódicu xurdió de la iniciativa de la que hasta entós yera la asociación culturál Ámbitu, enfotada en desenvolver delles actividaes alrodiu la espublización de textos n'asturianu. L'asociación, encabezada por un grupu d'empresarios, decide profesionalizase y conviértese en Publicaciones Ámbitu S.L., empresa editorial que márcase l'oxetivu de la rentabilidá n'un mercáu entós por esplorar: el de la prensa n'asturianu. Les Noticies nacía asina como'l primer proyeutu profesional de la hestoria de los medios de comunicación en llingua asturiana. El selmanariu entama la so xera dende'l Centru Européu d'Empreses de Llanera, nel que permanez hasta'l treslláu de la so redacción al centru d'Uvieu. Dende'l so orixe, empréntase na planta del diariu El Comercio en Xixón.

Depués de la desaparición de la edición en papel, continuó existiendo una edición dixital que finalmente dexó de publicase'l 18 d'avientu de 2012[1].

Estructura formal[editar | editar la fonte]

Dende la so apaición, Les Noticies caltuvo una estructura en cinco columnes y ente 24 y 32 páxines. El diseñu y la distribución en seiciones fuere camudando: el primer exemplar yera en blancu y negru con una distribución en seiciones asemeyaes al d'un diariu. Col tiempu, el periódicu introduz color nes sos páxines primera y cabera, y afita dos grandes seiciones: Actualidá, centrada nel analis políticu, y Sieglu XXI, pa temes de cultura y sociedá.

Difusión[editar | editar la fonte]

A falta d'un control de muérganos independientes, la editora de Les Noticies faló dende l'iniciu de la so actividá d'una tirada de 5.000 exemplares y alrodiu 20.000 llectores. Distribuyóse en diversos puntos de venta n'Asturies y tuvo como soscriptores a un cientu centros asturianos del mundu.

Notes[editar | editar la fonte]

  1. lesnoticies.com consultao'l 18.12.2012

Enllaces esternos[editar | editar la fonte]