Vientos del oeste

De Wikipedia
Saltar a navegación Saltar a la gueta
Mapa de los vientos predominantes na Tierra. N'azul, los vientos del oeste; en marrón y mariellu, los vientos alisios.

Llámense vientos del oeste (n'inglés westerlies) a los vientos predominantes que soplen, dende l'oeste hacia l'este, nes llatitúes medies, ente los 30º y 60º de llatitú. Orixínense a partir de zones d'alta presión nes llatitúes de los caballos (ente los 30º y 38º Norte y Sur) y tienden hacia los polos, siendo responsables de los ciclones extratropicales[1]. Los ciclones tropicales que crucien l'exe de la cresta subtropical hacia los vientos del oeste recurvense por culpa'l creciente fluxu del oeste. Estos vientos son predominantemente del suroeste nel Hemisferiu Norte y del noroeste nel Hemisferiu Sur.

Los vientos del oeste son más fuertes nel hemisferiu nel que ye iviernu y nos momentos nos que la presión ye más baxa nos polos, mentantu que son más floxos nel hemisferiu nel que ye branu y cuando les presiones son más altas sobre los polos. Estos vientos son especialmente fuertes nel Hemisferiu Sur; especialmente nes fasteres nes que nun hai tierra firme, porque la tierra amplifica los patrones del fluxu, reorientando la corriente en dirección norte-sur y, poro, enlenteciendo los vientos del oeste. Los más fuertes de toos, los nomaos roaring forties (los ruxentes cuarenta), aparecen en llatitúes d'ente los 40º y 50º. Estos vientos xueguen un papel perimportante porque lleven les agües y vientos templaos de la zona ecuatorial hasta la costa occidental de los continentes; especialmente, pola gran estensión d'océanu que hai nelli, nel Hemisferiu Sur.

Comportamientu[editar | editar la fonte]

Esquema de circulación atmosférica xeneral según el modelu de les trés celdes (de Hadley, de Ferrel y polar). Les fleches naranxa señalen les zones nes que hai baxes presiones por culpa l'ascensu del aire, y les moraes, les zones d'altes presiones. Les fleches colloraes, azules y blanques resumen la circulación atmosférica superficial de la rexón tropical y l'Hemisferiu Sur, representando a los alisios les fleches colloraes, a los vientos del oeste les blanques y a los vientos xeneraos nel anticiclón del Pacíficu Sur les azules.

Si la Tierra tuviera en rotación sincrónica col Sol el calor d'esta estrella fadría que los vientos, nes llatitúes medies, soplaran en direición a los polos, separtándose de la cresta subtropical. Por embargu, l'efeutu Coriolis provocáu pola rotación de la Tierra tiende a esviar los vientos que van hacia los polos hacia l'este del polu respectivu: esto ye, hacia la derecha del mapa nel Hemisferiu Norte y hacia la izquierda del mapa nel Hemisferiu Sur[2]. Esta ye la razón pola que los vientos del oeste, nel Hemisferiu Norte, tienden a soplar dende'l suroeste, mentantu que avecen a ser del noroeste nel Hemisferiu Sur[3]. Cuando les presiones sobre los polos son baxes la fuercia d'estos vientos medra, y esto fae que'l clima seya más templáu nes llatitúes medies. Esto asocede cuando la oscilación ártica ye positiva: nel iviernu les baxes presiones cerca los polos son más fuertes que nel branu. Cuando la oscilación ye negativa y les presiones son más altes sobre los polos el fluxu d'estos vientos ye más meridional: soplen desde la dirección del polu respectivu hacia l'ecuador, y eso lleva aire fríu a les llatitúes medies[4].

A lo llargo del añu los vientos del oeste varíen en fuercia en rellación col vórtiz polar. Cuando esti algama la so másima intensidá, n'iviernu, los vientos del oeste son más fuertes; y cuando algama la so mínima intensidá, nel branu, los vientos del oeste debilítense[5]. Un exemplu del impactu d'estos vientos ye la dispersión de columnes de polvu orixinaes nel desiertu de Gobi, qu'amiéstense colos contaminantes del aire y espárdense a gran distancia, llegando a América del Norte[6]. Los vientos del oeste pueden ser perfuertes, y sobre too nel Hemisferiu Sur, porque nelli hai menos tierra que faga menguar la velocidá del aire, qu'aporta a les mases de tierra del hemisferiu con fuercia escomanada. A estos vientos, pola cantidá de nubes y tormentes que lleven consigo, nomáselos, en función de la llatitú, con axetivos qu'espeyen la so fuercia: ruxentes, los roaring forties, nes llatitúes d'ente los 40º y 50º Sur; furiosos, los furious fifties, ente los 50º y 60º Sur; y xiblantes, los shrieking sixties, perriba los 60º de llatitú Sur[7].

Impactu sobre les corrientes marines[editar | editar la fonte]

Arriba a la izquierda, bañando la costa de Xapón, vese la corriente de Kuroshio, que correspuente al brazu occidental del xiru oceánicu del Pacíficu Norte.

Como resultáu de la presencia de vientos persistentes en dirección oeste-este nes orielles más averaes a los polos de les crestes subtropicales allugaes nos océanos Atlánticu y Pacíficu, les corrientes marines compórtense de forma asemeyada en dambos hemisferios. Sicasí, les corrientes del Hemisferiu Norte son más débiles que les del Sur por culpa de la diferente fuercia de los vientos del oeste en cada hemisferiu[8]. El procesu de intensificación en sentíu oeste de la corriente de frontera fae que les corrientes seyan más fuertes na llende occidental de cada conca oceánica que na so llende oriental[9]. Estes corrientes apurren agua caldia, tropical, hacia les rexones polares, un fenómenu conocíu ya aprovecháu polos marinos de los dos océanos va munchos sieglos.

La Corriente Circumpolar Antártica ye una corriente oceánica que flúi d'oeste a este alredor de l'Antártida. Esta corriente ye la dominante nel Oceanu Glacial Antárticu y ye, colos sos 125 Sverdrups (unidá de midida equivalente a un millón de m3/seg), la mayor del planeta[10]. Los sos equivalentes nel Hemisferiu Norte son la Corriente del Golfu, que forma parte del xiru oceánicu subtropical del Atlánticu del Norte, y la Corriente de Kuroshio, na llende occidental del Pacíficu Norte; la primera ye responsable del desarrollu de fuertes ciclones, tanto atmosféricos como oceánicos[11][12][13], y la segunda d'importantes tormentes oceániques.

Referencies[editar | editar la fonte]

  1. «Westerlies». American Meteorological Society (2005).
  2. Consequences of rotation for weather, na web de la Universidá de Rochester.
  3. Ralph Stockman Tarr and Frank Morton McMurry (1909). Advanced geography. W. W. Shannon, State Printing, pp. 246. Retrieved on 2009-04-15.
  4. What is the Arctic oscillation?, na web de la National Snow and Ice Data Center (2020). .
  5. Halldór Björnsson (2005). Global circulation. Archived 2011-08-07 at the Wayback Machine Veðurstofu Íslands. Retrieved on 2008-06-15.
  6. James K. B. Bishop, Russ E. Davis, and Jeffrey T. Sherman (2002). «Robotic Observations of Dust Storm Enhancement of Carbon Biomass in the North Pacific». Science 298 páxs. 817–821.
  7. Walker, Stuart (1998). W. W. Norton & Company: The sailor's wind. ISBN 9780393045550.
  8. «What Is the Thermohaline Circulation?». Science 298 (5596):  páxs. 1179–1181. 8 de payares de 2002. doi:10.1126/science.1079329. PMID 12424356. http://www.sciencemag.org/cgi/content/summary/298/5596/1179.  (see also Rahmstorf.)
  9. National Environmental Satellite, Data, and Information Service (2009). Gulf Stream demonstrates long-term resilience
  10. Ryan Smith, Melicie Desflots, Sean White, Arthur J. Mariano, Edward H. Ryan (2005). The Antarctic CP Current. The Cooperative Institute for Marine and Atmospheric Studies.
  11. S. Businger, T. M. Graziano, M. L. Kaplan, and R. A. Rozumalski (2004). Cold-air cyclogenesis along the Gulf-Stream front: investigation of diabatic impacts on cyclone development, frontal structure, and track. Meteorology and Atmospheric Physics, pp. 65-90.
  12. David M. Roth (2000). P 1.43 A FIFTY YEAR HISTORY OF SUBTROPICAL CYCLONES. American Meteorological Society.
  13. D. K. Savidge and J. M. Bane (1999). Cyclogenesis in the deep ocean beneath the Gulf Stream. 1. Description. Journal of Geophysical Research, pp. 18111-18126.