Parnassius apollo

De Wikipedia
Saltar a: navegación, buscar
Wikipedia:Artículos revisaos
Commons-emblem-notice.svg
 
Apolo
Parnassius apollo by Nemos.jpg
Mosela, Alemania
Estáu de caltenimientu
Vulnerable (VU)
Vulnerable (IUCN)
Clasificación científica
Reinu: Animalia
Filu: Arthropoda
Subfilu: Hexapoda
Clas: Insecta
Orde: Lepidoptera
Seición: Rhopalocera
Superfamilia: Papilionoidea
Familia: Papilionidae
Tribu: Parnassiini
Xéneru: Parnassius
Subxéneru: Parnassius (Parnassius)
Especie: P. apollo
Linnaeus, 1758
Distribución
Distribución de la apolo
Distribución de la apolo
[editar datos en Wikidata]


Parnassius apollo ye una especie de lepidópteru ditrisiu de la familia Papilionidae propia de los macizos montascosos de les zones templades y fríes d'Eurasia, incluyida la Península Ibérica. Linnaeus, 1758.[1][2] Vuela n'Asturies.

Descripción[editar | editar la fonte]

Ye una caparina relativamente grande, que pue algamar un valumbu d'unos 8 cm. Ye darréu reconocible pol color predominantemente blancu de les sos nales, de testura apargaminada y tresllúcides (hialines) nes sos partes marxinales, onde escarecen d'escames. La nala anterior lleva una serie de grandes llurdios negros y la nala posterior tien dos grandes ocelos coloraos con nucleu blancu y corralaes por un aniellu negru. La forma y color d'esos ocelos varien descomanadamente d'una población a otra.

La gata ye dafechu negra, con fileres de llurdios mariellos o anaranxaos a cada llau y con pelinos negros que nacen de pequeñes verrugues. Puede llegar a midir unos 5 cm.

Oruga de Parnassius apollo

Área de distribución[editar | editar la fonte]

L'área de distribución d'esta especie ye peramplia y cubre prácticamente toles zones templaes y  fríes d'Eurasia. Trátase, sicasí, d'una área bien disyunta, describiéndose perabondoses subespecies y variedaes nos distintos sistemes montascosos nos que viven les sos poblaciones. Presenta, en munchos llugares, un calter relictu, debiéndose la so presencia a los grandes movimientos faunísticos inducíos poles glaciaciones cuaternaries. De confirmase les previsiones de los espertos en rellación al calentamientu global reparáu estes últimes décaes, munches d'eses poblaciones relictes podríen sumir definitivamente de los macizos más meridionales nun futuru non bien alloñáu, a midida que vaigan sumiendo los hábitats que precisa pa vivir (colonizaos por una vexetación muncho más trupa y zarrada). El númberu de subespecies ye mayor nes partes meridionales de la so área de repartu, onde los procesos d'especiación nun se vieron atayaos poles glaciaciones. Describiéronse, asina, 22 subespecies na Península Ibérica, siendo les poblaciones de Sierra Nevada, les más claramente estremaes del restante de poblaciones (presenten la particularidá de tener los ocelos de la nala posterior de color mariellu-anaranxáu en cuenta de coloráu).

Hábitat[editar | editar la fonte]

Pa poder completar el so ciclu vital, la caparina apollo precisa zones abiertes, con una vexetación predominantemente herbal, nes que crezan les plantes nutricies de les que s'alimenten los sos bárabos. En redolaes naturales, eses condiciones son esencialmente les de los praos de monte, chiscaos de zones cascayoses, nos qu'abonden diches plantes. El pregueréu favoreció l'apaición de zones que presenten tales característiques a altitúes inferiores, pero l'abandonu d'esta práctica llevó, sicasí, a la desapaición de la especie en munches de tales zones, recolonizaes por una vexetación muncho más trupa y zarrada. Ésta ye, amás del usu indiscrimináu d'insecticides en dellos llugares, la esplicación más probable de la so desapaición o rarefacción en macizos de medianu altor, tal como los Vosgos (Francia), onde s'escastó la subespecie que la poblaba.

Ciclu vital[editar | editar la fonte]

Al vivir esta caparina nos ecosistemes más elevaos de los macizos montascosos, namái se repara una única xeneración que vuela de xunu a agostu, coincidiendo col curtiu periodu vexetativu d'aquelles zones. Pasa l'iviernu como bárabu, protexía nel güevu, del que sale al aprucir la primavera. Fórmase la crisálida en mayu-xunu, pudiendo durar de diez díes a delles selmanes el procesu de metamorfosis.

Plantes nutricies[editar | editar la fonte]

Les gates aliméntense de distintes especies de crasulácees principalmente de los xéneros Sedum y Sempervivum.

Referencies[editar | editar la fonte]

  • Tolman, T. & Lewington, R. (2002). Guía de les caparines d'España y Europa. Lynx Edicions
  • Carter, D. J. & Hargreaves, B.(1987). Guía de campu de les gates de les caparines y políes d'España y d'Europa. Ediciones Omega, Barcelona.
  • De Viedma, M. G. & Gómez-Bustillo, M. R.(1985). Llibru Coloráu de los Lepidópteros. Ministeriu d'Agricultura, Pesca y Alimentación.
  • Mérit, X. & Mérit, V. (2006). Les Parnassius de France. (Textes de Xavier Mérit-Véronique Mérit et Henri Descimon, cartes de répartition, planches, et photos en nature de Luc Manil, Xavier Mérit et Bernard Turlin, bibliographies). Bulletin deas Lépidoptéristes parisiens, 15(33): 1-56.
  • Estatus de caltenimientu: Amori, G., Hutterer, R., Krystufek, B., Yigit, N., Mitsani, G. & Muñoz, L. J. P. 2008. Parnassius apollo. In: IUCN 2009. IUCN Rede List of Threatened Species. Version 2009.1. <www.iucnredlist.org>. [1]