Papa Vítor I

De Wikipedia
Papa Vítor I
14. Papa

189 - 199
Eleuteriu - Ceferín
Vida
Nacimientu África, fecha desconocida
Nacionalidá valor desconocíu
Muerte Roma28 de xunetu de 199
Oficiu clérigu
Llugares de trabayu Roma
Santoral
28 de xunetu
Cambiar los datos en Wikidata

San Vítor I sedrá'l primer papa qu'afirme la esistencia d'un maxisteriu moral del obispáu de Roma sobre los otros obispaos de la Ilesia y emprima a sustituyir el griegu, usáu na lliturxa, pol llatín, anque la misa siguirá celebrándose en griegu hasta l'añu 230.

Nel so pontificáu, Vítor sofita la celebración de los conceyos al ordenar a los obispos de la esfera cristiana que s'aconceyaren en sínodos pa considerar la condena de la celebración de la Pascua según el vezu xudíu que la celebraba'l día 14 del mes de Nisán magar nun coincidiere en domingu.

Los obispos d'Asia Menor, encabezaos por Polícrates, l'obispu d'Éfesu, refuganon abandonar la práutica que, según ellos y tal como-y espresó Polícrates al papa nuna carta que-y unvió al rodiu del 190, esta práutica, conocida como cuartodecimal foi la de los apóstoles Felipe y Xuan, y la de Policarpu d'Esmirna y Melitón de Sardes. Como respuesta, Vítor unvió una carta a los obispos declarando escluyíos de la comunión a les ilesies d'Asia. Esta decisión traxo un gran revuelu ente los obispos. Intervieno Irenéu y, depués d'afirmar qu'elli personalmente caltenía'l domingu pa la celebración de la Pascua, pidía-y al papa Vítor siguir la posición de los sos predecesores y qu'aceutare la duplicidá de costumes.

Paez que Vítor quixo imponer la so voluntá sobre la celebración dominical de la Pascua, pues Blastu, que yera un fuerte defensor de la práutica cuartodecimal se separó de la Ilesia creando una cisma.

Aproximao pel 198, Vítor escomulgó a Teodotu, un curtidor de Bizanciu por prauticar la doctrina adopcionista, masque nun pudo impidir que los sos discípulos siguieren propagando les sos idees en Roma.

A finales del sieglu II foron instalándose en Roma representantes de toles tendencies. Roma va ser l'escenariu au s'enfrenten al cristianismu distintes idees y vertientes d'un gran númberu d'escueles heterodoxes que proliferaren per tol Imperiu. En Roma alcuéntrense individuos procedentes d'Asia, de Siria, d'Exiptu, de Mesopotamia. Roma ye agora una gran ciudá cosmopolita onde s'axuntaben toles races y relixones. Nella fálase griegu lo mesmo que llatín. La Ilesia vese afeutada pola influyencia de la urbs nel aspeutu de cultura y civilización.

D'otra miente, afita que, en casos d'emerxencia, se pudiere usar cualquier agua pal bautismu.

Morrió'l 28 de xunetu de 199 tres sufrir martiriu.

Predecesor:
Lluteriu

189-199
Socesor:
Ceferín