Historia de Moldavia

De Wikipedia
Saltar a navegación Saltar a la gueta

La hestoria de Moldavia remóntase a la década de 1350, cuando foi fundáu'l Principáu de Moldavia, el precursor medieval de la Moldavia y la Rumanía modernes. Sicasí, el territoriu de l'actual Moldavia foi habitáu na antigüedá polos dacios, y pol so allugamientu sobro una ruta estratéxica ente Asia y Europa, Moldavia foi víctima de numberoses invasiones, incluyendo'l Rus' de Kiev, los mongoles, Hungría, Polonia, el Imperiu otomanu, finalmente Rusia.

La mayor parte de l'actual Moldavia, d'antiguo conocida como Besarabia, yera parte del Principáu de Moldavia dende la so fundación hasta la so anexón per parte del Imperiu rusu, como resultáu de la Guerra rusu-turca (1806-1812). Por ello, l'heriedu cultural del Principáu de Moldavia caltiense como nucleu de la identidá moldava de Moldavia, a pesar de que l'estáu socesor del Principáu de Moldavia ye Rumanía, dempués de la unión ente los principaos Valaquia y Moldavia, en 1859.

Principáu de Moldavia[editar | editar la fonte]

Artículu principal: Principáu de Moldavia
El principáu de Moldavia mientres el reinu d'Esteban el Grande.

La fundación de Moldavia débese al noble rumanu Dragoş de Bedeu, orixinariu de la rexón rumana Maramureş (nesi tiempu baxu control del Reinu d'Hungría). En 1343, Dragoş llogró l'encargu del rei Luis I d'Hungría de construyir una defensa en contra de les invasiones de los tártaros. Sicasí, el noble rumanu Bogdan I de Cuhea (tamién orixinariu de Maramureş) remontóse en contra de l'autoridá húngara en 1359, ganando la independencia del principáu de Moldavia, independencia que se caltuvo hasta la unión ente Moldavia y Valaquia de 1859 (la segunda unión rumana, siendo la primera nel añu 1599/1600 cuando Miguel el Valiente Vaivoda del Principáu de Valaquia y Ban d'Oltenia, realizó la primer unión de los Principaos Rumanos: Valaquia, Moldavia y Transilvania que formen el territoriu de l'actual Rumanía y Moldavia). El príncipe moldavu más importante foi Esteban el Grande, quien reinó dende 1457 hasta 1504. La capital del so principáu yera Suceava, na actual Rumanía.

Cola notable esceición de Transnistria, el territoriu de la Moldavia actual ocupa la mayoría de la rexón histórica de Besarabia, parte del Principáu de Moldavia hasta 1812. El nome del principáu vien del ríu Moldova. El principáu medieval cubría la área dende Transilvania nel Oeste hasta'l ríu Dniéster nel Este. El so nucleu taba na parte nororiental (Ţara de Sus en idioma rumanu), parte de la cual depués conocióse como Bucovina.

Les socesives capitales del Principáu fueron: Baia (1359-1365), Sirec (1365-1373), Suceava (1373-1565) y Iaşi (1565-1859).

En 1538, Moldavia acabó so dominiu del Imperiu otomanu, a quien-y tenía que pagar el 10% de les sos ganancies. Anque se-y dexaba autonomía interna, ya inclusive autonomía sobro'l comerciu esterior, tenía prohibíes les relaciones internacionales que pudieren dir en desterciu del Imperiu otomanu. Per otra parte, los turcos teníen prohibíu tener tierres o construyir llugares relixosos en Moldavia.

Nel sieglu XVIII, el territoriu moldavu convirtióse en campu de batalla y zona de tránsitu nos conflictos ente turcos, austriacos y rusos. En 1774, el Principáu pasó a ser un protectoráu rusu. En 1775, Austria anexionóse Bucovina. Finalmente, pol tratáu de Bucuresti, Rusia anexionóse más del 50% del territoriu moldavu, que pasó a denominase Besarabia. La parte restante de Moldavia desafióse del poder turcu y xunióse con Valaquia, formando la Rumanía del sieglu XIX.

La primer república moldava y la xunión con Rumanía[editar | editar la fonte]

Dempués de la Revolución rusa de 1905, empezóse a desenvolver un movimientu d'emancipación nacional rumanu en Besarabia. Anque recibió unos golpes en 1906-1907, resurdió, con inda más fortaleza, en 1917. Para apangar el caos producíu pola Revolución rusa de febreru y ochobre de 1917, establecióse un conseyu nacional lideráu por Sfatul Ţării ("El Conseyu del País" en rumanu) y formáu por 120 miembros escoyíos por políticos y organizaciones profesionales de Besarabia.

El 15 d'avientu de 1917, la Dieta proclamó la República Democrática Moldava, como parte de la Federación Rusa.

El 26 de xineru de 1918, a la demanda de los miembros de Sfatul Ţării, tropes rumanes entraron en Besarabia para ayudar a caltener la seguridá, deteriorada por cuenta de la gran cantidá de desertores del exércitu rusu.

Tres estos acontecimientu, la Dieta declaró la independencia de la república'l 6 de febreru de 1918. Finalmente, so la presión del exércitu rumanu votóse la unión de Besarabia con Rumanía el 9 d'abril de 1918, ganando'l sí' por 86 a 3, con 36 astenciones. Esta unión foi reconocida per dellos países europeos, pero non pol gobiernu soviéticu.

La Moldavia soviética[editar | editar la fonte]

Tres la creación de la Xunión Soviética n'avientu de 1922, el gobiernu soviéticu estableció en 1924 el Oblast autónomu de Moldavia nel territoriu al este del ríu Dniéster na República Socialista Soviética d'Ucraína. La capital del Oblast yera Balta, asitiada na Ucrania actual.

Siete meses más tarde, el óblast foi alzáu a la categoría de República Socialista Soviética Autónoma de Moldavia (RSSAM). La capital permaneció en Balta hasta 1929, añu nel que foi treslladada a Tiráspol.

Segunda Guerra Mundial[editar | editar la fonte]

Mientres la Segunda Guerra Mundial, el pactu Molotov-Ribbentrop, que definía la división de Europa del Este en esferes d'influencia, dexó a la Xunión Soviética tomar Besarabia en xunu de 1940, una y bones la Alemaña Nazi manifestó nun tener interés en Besarabia. El 26 de xunu de 1940 el gobiernu soviéticu dio un ultimatum a Rumanía por que venciera darréu Besarabia y la rexón norte de Bucovina. Italia y Alemaña primieron al rei Carlos II de Rumanía, que al nun llograr ayuda de Francia nin del Reinu Xuníu, aportó. El 28 de xunu, tropes sovietiques cruciaron el ríu Dniéster y ocuparon Besarabia, la rexón norte de Bukovina y Hertza.

La República Socialista Soviética de Moldavia (RSSM), creada arriendes de la anexón el 2 d'agostu de 1940, nun respetó les fronteres tradicionales de Besarabia. La república entendía seis condaos de Besarabia xuntu cola parte occidental de l'antigua RSSAM. Finalmente, en noviembre de 1940 afitáronse les sos fronteres, dexando los territorios con mayoría ucraniana y aquellos próximos a Rumanía a la República Socialista Soviética d'Ucrania. Per otru llau una parte de Transnistria, con mayoría de población moldava, foi anesionau a la república.

N'abril de 1941, dientro de la operación Barbarroxa, Rumanía, aliada cola Alemaña Nazi reprindó el territoriu; d'esta manera Rumanía convirtióse nun agresor de facto, lo que tendría graves consecuencies dempués de la guerra.

N'abril de 1944, Transnistria foi recuperáu polos soviets. L'exércitu soviéticu volvió recuperar Besarabia y Bucovina y en febreru de 1947 roblóse un tratáu de paz qu'afitaba la frontera soviéticu-romana nel ríu Prut.

Restauración del poder soviéticu[editar | editar la fonte]

La república caltúvose dientro de la URSS dempués de la Segunda Guerra Mundial, ocupando l'actual territoriu de la República de Moldavia. El gobiernu rusu caltuvo una política de 'desnacionalización' escontra la población rumana, incluyendo midíes represores para los que tuvieren llazos col antiguu réxime. Amás animábase a rusos y ucraínos a emigrar a Moldavia.

Nesti periodu centróse el desenvolvimientu de la industria en Transnistria y de l'agricultura en Besarabia.

Más tarde, na década de los 70 y 80, Moldavia recibió significatives inversiones del presupuestu soviéticu para desenvolver viviendes ya infraestructures industriales y científiques. Estes inversiones paralizáronse en 1991, cuando s'eslleió la Xunión Soviética y Moldavía proclamóse independiente.

Escontra la independencia[editar | editar la fonte]

En 1989 formóse'l Frente Popular Moldavu, una asociación de grupos políticos y culturales independientes[1]. Paralelamente, grandes manifestaciones de ciudadanos d'orixe rumanu llevo a la designación del rumanu como llingua oficial. Sicasí, la creciente influencia de los rumanos, empezó a xenerar oposición en Transnistris onde se creó'l grupu Unidá (Yedinstvo-Unitatea) y en Gagauzia onde se creó'l grupu Gagauz Halki.

Les primeres eleiciones democrátiques na RSSM celebráronse'l 25 de febreru de 1990. El Frente Popular conquistó la mayoría de los votos. Tres les eleiciones Mircea Snegur, un comunista, convirtióse en presidente de la República.

Secesión de Gagauzia y Transnistria[editar | editar la fonte]

N'agostu de 1990, declaróse una república separada denominada Gagauz-Yeri (República de Gagauz) alredor de la ciudá de Comrat. En septiembre, los habitantes de la vera esti del ríu Dniéster proclamaron la República Moldava Dnestr en Transnistria, adoptando Tiráspol como capital.

Unos 50.000 voluntarios moldavos armaos fueron a Transnistria, onde la violencia xeneralizada detuviérase temporalmente gracies a la intervención del exércitu rusu. Les negociaciones que se llevaron a cabu en Moscú entre Gagauzia, Transnistria y el gobiernu Moldavu fracasaron, y el gobiernu moldavu negóse a siguir con elles.

En mayu de 1991, el nome oficial del país camudóse por Republica Moldova (República de Moldavia).

La Moldavia post soviética[editar | editar la fonte]

Independencia[editar | editar la fonte]

Moldavia y Transnistria.

Mientres el intentu de golpe d'Estáu na Xunión Soviética contra Mijaíl Gorbachov n'agostu de 1991, l'exércitu rusu intentó imponer un estáu d'esceición en Moldavia. Fueron desautorizaos polos gobernantes moldavos, que declararon el so sofitu al presidente rusu Borís Yeltsin, que lideraba'l contra-golpe en Moscú. El 27 d'agostu de 1991, tres el fracasu del golpe, Moldavia declaró la independencia de la Xunión Soviética.

N'ochobre, Moldavia empezó a entamar les sos propies fuercies armaes; la Xunión Soviética taba desfaciendose rápido y Moldavia precisaba torgar que s'espandiera la violencia dende la República de Transnitria al restu del país. Les eleiciones d'avientu, que punxeron a Stepan Topal y Igor Smirnov como presidentes de les sos respeutives repúbliques (Gaugazia y Transnistria), y la disolución oficial de la Xunión Soviética a final d'añu, amontaron les tensiones en Moldavia.

A finales de 1991, un reformista ex-comunista, Mircea Snegur, ganó les eleiciones presidenciales. Cuatro meses más tarde, el país consiguió la reconocencia formal como estáu independiente pola Naciones Xuníes.

Tres la independencia, adoptóse la bandera rumana con un escudu como bandera estatal, y l'himnu de Rumanía (Deşteaptă-te române!) utilizóse como himnu oficial. Nesi periodo empezó un Movimientu pa la Reunificación de Rumanía y Moldavia nos dos países.

En 1992, Moldavia viose envolubrada n'un curtiu conflictu con insurxentes locales en Transnistria. L'altu'l fueu foi axustáu polos presidentes Mircea Snegur y Boris Yeltsin en xunetu. Establecióse una llinia de demarcación caltenida por una fuercia de pacificación tripartita formada por fuercies moldaves, transnitrias y ruses, y a cambéu Moscú aportó a retirar l'exércitu pero hasta agora nun retiraron les sos tropes. Amás alcordóse que Transnitria tuviera un status especial dientro de Moldavia y el derechu a secesión en casu de que Moldavia se reunificara con Rumanía.

Referencies[editar | editar la fonte]

  1. "Romanian Nationalism in the Republic of Moldova" by Andrei Panici, American University in Bulgaria, 2002; pages 39–41