Godzilla

De Wikipedia
Saltar a navegación Saltar a la gueta
Personaxe de Tōhō
Godzilla
Gojira 1954 Japanese poster.jpg

Godzilla nun poster xaponés de la primer película d'él.
Especie Na serie Showa preséntenlu como una creatura somarina que sal a la superficie por aciu de les esplosiones nucleares. Na serie Heisei ye un godzillasaurus[1](especie ficticia) mutáu pola mor de la radiación.
Alies Gojira, Rei de los monstruos
Altor Serie Showa
50 metros[2]
Serie Heisei
80 metros, 100 metros como Supergodzilla[3]
Serie Millennium
55, 60 y 100 metros[4]
Serie Legendary
108.2 a 119,7 metros[5] Reiwa
Hasta 300 metros[6]
Singular Point
Más de 100 metros[7]
Pesu Serie Showa
20.000 tonelaes[2]
Serie Heisei
50.000 tonelaes, 60.000 tonelaes como Supergodzilla[3]
Serie Millennium
25.000, 30.000 y 55.000 tonelaes[4]
Serie Legendary
90.000 a 99.934 tonelaes[5]
Serie Reiwa
100.000 tonelaes[6]
Oríxenes Davezu pruebes nucleares que lu saquen a la superficie o lu faen mutar. En Singular Point tien un orixe estradimensional.
Parientes: Minilla: Afiáu na serie Shōwa
Godzilla Jr.: Afiáu na serie Heisei
Biollante: Creáu coles sos célules
Space Godzilla: Creáu coles sos célules
Orga: Col so ADN
Mecha-Godzilla: Doblu robóticu, na serie Millenium ye un cyborg col esqueletu del Godzilla orixinal como cadarma.
Poderes: Aliendu atómicu.
Pulsu Nuclear.
Resistencia al armamentu humanu.
Rexeneración instantánea
Propulsase al echar l'aliendu atómicu p'abaxo.[8]
Primer apaición Gojira
Creadores Tomoyuki Tanaka, Ishiro Honda, Eiji Tsuburaya, Akira Ifukube.
Interpretáu por Shōwa series
Haruo Nakajima
Katsumi Tezuka
Seiji Onaka
Hiroshi Sekita
Shinji Takagi
Isao Zushi
Toru Kawai
Heisei series
Kenpachiro Satsuma
Millennium series
Tsutomu Kitagawa
Mizuho Yoshida

Godzilla (ゴジラ Gojira?) (AFI: ɡoꜜʑiɽa ) ye un monstruu xaponés ficticiu, más específicamente un daikaijū (大怪獣, monstruu xigante) que protagoniza numberoses películes y convirtióse nún de los personaxes cinematográficos más conocíos del mundu.

Apaeció en pantalla la primer vegada en 1954 na película Godzilla producida polos estudios Tōhō. Godzilla apaeció en 28 películes xaponeses hasta la fecha y en delles versiones norteamericanes, siendo la primera Godzilla (1998) y siendo la homónima de 2014 la primera en tener continuaciones.

Godzilla ye una de les referencies más populares de la cultura xaponesa del sieglu XX, describiéndolu como un enorme dinosauriu mutante que xenera y al empar salva del caos a Xapón y el mundu; polo que munches vegaes considérase un antihéroe. En verdá nació como una representación del mieu de los xaponeses tres del bombardéu atómicu de la Segunda Guerra Mundial, pero esti conteníu foi desapaeciendo pol ésitu que tevo ente los neños. Magar la popularidá foi escayendo a midida que avancen los años, sigue siendo ún de les bisarmes más conocíes en tol mundu. Hasta la fecha, Godzilla continua siendo ún de los íconos más representativos del cine xaponés, y el más importante del soxéneru kaiju, del que deriva'l xéneru tokusatsu.

Nome[editar | editar la fonte]

El nome "Gojira" vien de la combinación de dos pallabres: gorira (ゴリラ) "gorila" y kujira (鯨, くじら) "ballena", pos nun entamu pensaben en facer el monstruu como un híbridu de dambos dos animales. Por embargu, paez ser que la idea cambió pola mor de la estrena de The Beast from 20,000 Fathoms. Como nun teníen presupuestu pa facer los efeutos especiales con stop motion, decidieron facelo antroxando un actor y con maquetes d'edificios.

Al contrariu de la opinión popular, el nome Godzilla nun lu punxeron los productores de la versión norteamericana al traducir el nome, sinón que ye la romanización de la pallabra ゴジラ (anguaño romanizada como Gojira), dada pola mesma Tōhō.[9]

Historia[editar | editar la fonte]

Godzilla engarriándose con King Kong.

L'impautu de la primer película de 1954 vien de que, en cuenta de ser una hestoria cenciella, el direutor Ishiro Honda preséntala como una especie de metáfora sobre'l ataque nuclear que'l pueblu xaponés careciera en 1945, a la fin de la Segunda Guerra Mundial. Col correr del tiempu, el personaxe perdería la so imaxe d'iconu de la masacre atómica del añu 45, y travesaría delles etapes, como ser un espectáculu d'efeutos especiales baratos pa neños o volver dacuando a introducir mensaxes antinucleares o ecoloxistes. A finales de la etapa Showa les películes incluyíen elementos pulp típicos del manga, entemeciendo a Godzilla con civilizaciones fantástiques, invasiones alienígenas y, sobre manera, enemigos xigantescos y monstruosos. Curiosamente, en munches de les hestories de Godzilla esti ye l'héroe de la película, defendiendo Xapón de los enemigos que lu quieren destruyir.

La primer película renomáronla Godzilla, King of the Monsters! nos Estaos Xuníos, y quitaron escenes pa camudar la trama a la d'un reporteru que narraba lo asocedío, asina como pa evitar dar mala imaxe al respeutive del usu d'armes nucleares. Fízose lo mesmo cola película de Godzilla de 1985.

En 1998 prodúxose la versión norteamericana, mui criticada en Xapón por considerar que desvirtuaba dafechu'l personaxe.

Cuando la Toho recuperó los drechos y llanzó Godzilla 2000 (l'entamu de la serie Millenium), establecióse una visión más adulta y respetosa pa col personaxe p'asina estremase de la refugada versión estauxunidense.

Historia del personaxe[editar | editar la fonte]

Godzilla tien un orixe cambiadizu pero siempre venceyáu coles bombes atómiques. Na versión Showa ye una criaturas somarina que sal a la superficie atraída pola radiación, mientres que na Heisei ye un ''godzillasaurus'' (especie ficticia asemeyada al tiranosauriu) que muta por aciu l'efeutu les bombes. Na película GMK ''Godzilla, Mothra and King Ghidorah: Giant Monsters All-Out Attack'' suxérese que Godzilla naz de les almes en pena de les víctimes de la Segunda Guerra Mundial.

El ruxíu de Godzilla foi tomáu del chirrido que facía la puerta d'entrada a los estudios.

Apariencia[editar | editar la fonte]

L'apariencia de Godzilla foi camudando adulces dende qu'apaeció en 1954 hasta anguaño, variando mayoritariamente nel aspeutu de la cara, pero les sos traces más básiques y carauterístiques permanecen. Nes películes xaponeses, Godzilla ye un dinosauriu xigante con una piel rugosa, gruesa y abuxada, una cola llarga y poderosa, y unes plaques dorsales asemeyaes que rellumen cuando ta a puntu d'echar l'aliendu atómico. El diseñu de Godzilla ta inspiráu en numberosos animales, básicamente dinosaurios: el cuerpu asemeya'l d'un tiranosauriu, anque arrechu (la postura qu'enantes se suponía que tenía), los brazos llargos y gruesos los del iguanodonte, les plaques dorsales les del estegosauriu y tien la cola d'un saurópodu.[9] Na primer película midía unos cincuenta metros d'altor, pero'l tamañu tamién foi aumentando adulces hasta los cuasi cientu venti.

Etapes[editar | editar la fonte]

Na saga de películes xaponeses reconócense trés etapes:

1) Na etapa Showa (dende 1954 hasta 1975) va tresformándose de villanu espantible a defensor de Xapón frente a otres amenaces en películes dirixíes al públicu infantil.
2) La etapa Heisei (que va dende 1985 hasta 1995), vuelve a destruyir Xapón y a otros monstruos, anque como una fuercia de la natura descontrolada. Toma como referencia la película orixinal de 1954 pero inora lo asocedío nes demás.
3) La etapa Millenium (de 1999 a 2004), cuandl la Toho recupera los drechos del personaxe y propón una reconstrucción del mitu con una mirada adulta. Estes películes nun tienen continuidá coles etapes anteriores nin ente elles (sacante dos que se siguen la una a la otra), pero toes tomen tamién como referencia y puntu de partida la película orixinal.
4) Pelo menos pel momentu namás qu'hai una película de lo que diba ser la etapa Shin (estrenada en 2016) y que fai una analoxía bultable enta l'ataque'l monstruu y l'accidente de Fukushima. Ye la primer película xaponesa que nun tien como referencia lo asocedío en 1954, empezando dende cero.
5) Na etapa Reiwa salió una triloxía de películes d'anime ambientaes en futuru, cuando la humanidá torna a la Tierra tres tener de dexala polos ataques de los kaiju.

Les versiones americanes son per una parte l'adautación de 1998 y per otra les películes del llamáu Monsterverse de Legendary.

Poderes y habilidaes[editar | editar la fonte]

Al traviés de los años, Godzilla tuvo numberosos poderes y habilidaes (masque suelen cambiar de película a película), polo que se-y considera'l kaiju más poderosu.

Aliendu atómicu[editar | editar la fonte]

L'ataque principal de Godzilla ye l'aliendu atómicu radiactivu. Les plaques dorsales d'esti empiecen a rellumar y darréu llibera un poderosu rayu lluminosu pela boca. De normal, la color del rayu ye de azul anque nun escomienzu víase como vafu o vapor.

Godzilla paez poder controlar la intensidá del ataque, dende una llapadina (década de 1950 y 1960) hasta un poderosu rayu con propiedaes cinétiques (década de 1970 p'arriba).

En Godzilla vs. Megaguirus el rayu tenía increíbles capacidaes incendiaries y poder abondo como pa destruyir un pequeñu furacu negru, y Godzilla: Final Wars, tenía un increíble rangu d'algame y tinu, dándo-y la capacidá dar a un oxetivu n'espaciu esterior y destruyir casi cualesquier kaiju d'un solu tiru. Nuna escena memorable de Godzilla vs. Hedorah, Godzilla utiliza'l rayu pa "volar" de llombu propulsándose como un cohete al apuntar pal suelu.

Rayu Espiral[editar | editar la fonte]

Una variación del aliendu atómicu na serie Heisei ye'l "Rayu espiral", n'absorbiendo la esencia de Rodan. El rayu foi tan poderosu que-y dexó destruyir por completu, con unos pocos disparos, a Mechagodzilla y a SpaceGodzilla, pero riquió más tiempu pa destruyir a Destoroyah. El rayu espiral tornó en Godzilla: Final Wars, onde foi tan poderosu como pa espulsar a Kaiser Ghidorah pa fuera l'atmósfera.

Pulsu nuclear y poderes magnéticos[editar | editar la fonte]

Arriendes del mortal aliendu atómicu, Godzilla tamién pue echar pulsaciones atómiques nun rangu bastante estensu, capaz inclusive de paralizar y matar a un enemigu que s'alluga cerca. Esti poder foi vistu la primer vegada na llucha contra Biollante. Godzilla úsalu de nuevesenes batalles contra King Ghidorah en 1991 y contra Mothra en 1992.

Na película, Godzilla vs. Mechagodzilla, Godzilla atopó una forma de xenerar poderosos rayos magnéticos dempués de golpialu delles vegaes rayos llétricos.

Resistencia[editar | editar la fonte]

Godzilla demostró una increíble resistencia a lo llargo de les películes. Yá na primera demostró completa inmunidá a les armes tradicionales y a cualesquier cosa utilizada pol exércitu contra él. Tamién demostró inclusive una resistencia al magma, y les úniques vegaes que presentó feríes abiertes foi nes batalles contra Gigan, Biollante, Destoroyah, y Mechagodzilla.

Godzilla tien una increíble capacidá de rexeneración. Dichu poder foi l'argumentu principal de les películes Godzilla vs Biollante y Godzilla 2000: Millennium. Nesta postrera esplicóse que'l poder se debe a les sos carauterístiques radioactives.

Habilidaes físiques[editar | editar la fonte]

Godzilla tien demostrao niveles increyiblesde fuercia física, levantando y aventando monstruos que-y superen enforma en tamañu (como King Ghidorah, Hedorah, Mechagodzilla, etc). Inclusive en Final Wars, foi a arrefundiar a Kumonga acullá'l finxu'l cielu. Tamién sal prauticando artes marciales de manera risible na serie Shōwa, o movese bien rápido magar el tamañu. En toles apaiciones, demuestra que tien caxada, dientes y garres poderosos.

En Final Wars viose que tien resistencia física abonda pa engarriase con tol restu de kaiju qu'esisten na Tierra y ganalos con facilidá mientres viaxa caminando o nadando por tol planeta ensin aparar.

Rau[editar | editar la fonte]

El rau llargu de Godzilla ye tamién una arma terrible. Demostró ser bien flexible y poderosa, capaz de dar rabotaes rápides, esbarrumbar edificios y valtar otros kaiju. En King Kong vs. Godzilla y en Godzilla vs. Megalon ye a impulsase col rau dende allalantrón pa dar una patada estrozadora (de manera similar a un canguru). En Godzilla vs. Megaguirus muestra que tamién ye prensil. Valtó a Zilla de namás qu'un golp col rau cuando esti se-y echaba enriba en Godzilla: Final Wars.

Sicasí, Godzilla siempre quier más lluchar dende lloñe, col aliendu atómicu o arrefundiando oxetos contundentes.

Carauterístiques anfibies[editar | editar la fonte]

A pesar de nun ser un anfibiu en sentíu estrictu, Godzilla tien un estilu de vida anfibia, pasando más de la metá de la vida pente la agua y el restu en tierra firme. Tamién ente l'agua ye un guerreru poderosu, tanto como en tierra. Capaz de lluchar en fondu la mar o nadar moviéndolo rau como un cocodrilu, Godzilla demostró ser capaz d'alendar so l'agua (dacuando enarciando en calume ente película y película). Entá somorguiáu, paez nun tener restricciones col aliendu radioactivu y davezu conduz los enemigos so l'agua, como nes lluches contra Ghidorah, Ebirah, Battra, Biollante y Mothra.

Intelixencia[editar | editar la fonte]

La intelixencia de Godzilla varia a lo llargo la saga, pero suelen mostralu como un animal pensante. Particularmente na serie Showa presenta una intelixencia asemeyada a la humana, capaz de razonar y comunicase con otros monstruos, y mesmamente enseña a Minya cómo llanzar l'aliendu atómicu. Tamién pa paez ser a recordar el pasáu de mui p'atrás.

Xunto la intelixencia paez tener tamién emociones bien cercanes a les humanes. Xeneralmente, si nun ta combatiendo un monstruu tien un odiu y rensíes bien marcaes contra la humanidá, masque, paradóxicamente suel salvar Xapón d'otres amenaces, amosando esmolición y apreciu pola islla.

Debilidaes[editar | editar la fonte]

Acordies a la fuercia increyible que tien, Godzilla demostró bien poques debilidaes. Nun principiu, na serie Showa,  yera vulnerable a la lletricidá, anque aparentemente esa debilidá inórase darréu presentando inmunidá, y depués mesmamente la capacidá d'absorber esta enerxía. En The Return of Godzilla paecía ser vulnerable a una "bacteria antinuclear", anque'l so poderosu sistema inmunolóxicu failu resistente pronto. Más p'alantre revélase que Godzilla tenía un segundu celebru nel escayu dorsal y Mechagodzilla yera capaz de matalu atacándolo nesi puntu; sicasí, Rodan failu alicar, y en películes posteriores paez nun tener esi calcañu d'Aquiles. Na película Godzilla vs. SpaceGodzilla, Yuki suxurió la esistencia d'un puntu débil sol brazu, sicasí nunca nun s'afondó nesi asuntu.

Hasta la fecha, la única arma que ye a matar a Godzilla foi'l "destructor d'osíxenu", arma capaz de desintegralu hasta nun quedar más que la cámara. SIcasí, esa teunoloxía perdióse xunto colcreador, el Dr. Serizawa, quien se sacrificó pa matalu.

Filmografía oficial[10][editar | editar la fonte]

Serie Showa:
  1. Gojira [1954]
  2. Gojira no Gyakushū [1955]
  3. Kingu Kongu tai Gojira [1962]
  4. Mosura tai Gojira [1964]
  5. San Daikaijū: Chikyū Saidai no Kessen [1964]
  6. Kaijuu Daisensō [1965]
  7. Gojira, Ebira, Mosura Nankai no Daikettō [1966]
  8. Kaijū Shima no Kessen: Gojira no Musuko [1967]
  9. Kaijū Shōshingeki [1968]
  10. Gojira Minira Gabara Ōru Kaijuu Daishingeki [1969]
  11. Gojira tai Hedora [1971]
  12. Chikyū Kōgeki Meirei: Gojira tai Gaigan [1972]
  13. Gojira tai Megaro [1973]
  14. Gojira tai Mekagojira [1974]
  15. Mekagojira no Gyakushū [1975]
Serie Heisei:
  1. Gojira [1984]
  2. Gojira tai Biorante [1989]
  3. Gojira tai Kingu Gidora [1991]
  4. Gojira tai Mosura [1992]
  5. Gojira tai Mekagojira [1993]
  6. Gojira tai Supēsugojira [1994]
  7. Gojira tai Desutoroia [1995]
Serie Millenium:
  1. Gojira Nisen: Mireniamu [1999]
  2. Gojira tai Megagirasu: Jī Shōmetsu Sakusen [2000]
  3. Gojira, Mosura, Kingu Gidora: Daikaijū Shōkōgeki [2001]
  4. Gojira tai Mekagojira [2002]
  5. Gojira x Mosura x Mekagojira Tōkyō SOS [2003]
  6. Gojira: Final Wars [2004]
Shin:
  1. Shin Gojira 2016
Serie Reiwa:
  1. Gojira: Kaijū Wakusei 2017
  2. Gojira: Kessen Kidō Zōshoku Toshi 2018
  3. Gojira: Hoshi o Kū Mono 2018

 

Adautaciones estranxeres y remakes:

Godzilla n'otros medios[editar | editar la fonte]

Les series animaes[editar | editar la fonte]

Estrella de Godzilla nel Paséu de la Fama de Hollywood.

Godzilla tuvo la primer serie animada en 1977, gracies a Hanna-Barbera, y nomáronla The Godzilla Power Hour. Tevo n'antena hasta 1981, y nella Godzilla ye'l proteutor d'un grupu de científicos que regularmente se meten en problemes al tropezar otros monstruos. Nella destaca'l monstruín Godzooky, con un aldéu a Minya ("el fíu de Godzilla") y que daba'l puntu de comedia. El ruxíu de Godzilla nun yera l'oficial de Toho.

Una segunda serie, estrenada 1998, foi la continuación oficial de la versión norteamericana, Godzilla: The series y por ello protagonizada pol fíu de Zilla. Aseméyase a la primera nel papel de proteutor que Zilla Junior tien pa col grupu de científicos anque nesti casu ta adomáu.

En 2021 estrenaron l'anime Godzilla Singular Point, que magar les munches referencies que fai a les hestories clásiques da un orixe dafechu distintu al monstruu, nun teniendo que ver pa nada coles armes nucleares.

Cómics[editar | editar la fonte]

Los más de los cómics son, llamaderamente, norteamericanos. Godzilla foi protagonista d'una serie d'hestorietes de Marvel, Godzilla, King of the Monsters,[11] ente 1977 y 1979, enfrentándose a otros personaxes de la compañía como Nick Fury y los sos axentes de SHIELD o mesmamente The Avengers. Magar que perdieron los drechos y nun pudieron siguir espublizando más hestories del personaxe, cambiáron-y el nome a Leviathan,[12] y tamién l'aspeutu, pa que siguiera apaeciendo dacuando hasta Archangel matalu en 2009.[13] En 1988 escomienza a asoleyar cómics del personaxe la editorial Dark Horse Comics y sigue faciéndolo hasta 2005.[14] Anguaño los drechos los tien IDW publishing, qu'espubliza hestories dende 2011.

Hai manga de Godzilla, sicasí, cuasi dende que lu crearon (el primeru ye de 1955)[15] pero la so esistencia ye cuasi una curiosidá.

Videoxuegos[editar | editar la fonte]

Década de 1980[editar | editar la fonte]

  • Godzilla vs. 3 Major Monsters (MSX - 1984)
  • Godzilla: Gojira-Kun (MSX - 1985)
  • Monster's Fair (MSX - 1986)
  • Godzilla: Monster of Monsters (NES - 1988)

Década de 1990[editar | editar la fonte]

  • Godzilla 2: War of the Monsters (NES - 1991)
  • Super Godzilla (SNES - 1993)
  • Godzilla: Rettoushinkan (Saturn - 1995)
  • Godzilla Giant Monster March (Game Gear - 1995)
  • Godzilla Generations: Maximum Impact (Dreamcast - 1999)

Década de 2000[editar | editar la fonte]

  • Godzilla: Save the Earth (Xbox, PS2 - 2004)
  • Godzilla: Unleashed (Wii, PS2 - 2007)
  • Godzilla Unleashed: Double Smash (NDS - 2007)

Godzilla na cultura musical[editar | editar la fonte]

  • En 1977, el grupu musical Blue Oyster Cult, publicó'l cantar “Godzilla”, obviamente un homenaxe.
  • La banda de post punk peruana Los Adefexos utilizaba un diálogu de la primer película de Godzilla p'abrir los conciertos na década de 1990.
  • Nos álbumes Chaos A.D. / Blood-Rooted, del grupu Sepultura, puede atopase la tema: Biotech is Godzilla.
  • El músicu Paul Gilbert compunxo un cantar llamáu "Paul Gilbert VS Godzilla".
  • La banda galesa Lostprophets publicó la tema "We are Godzilla, you are Japan".
  • El grupu español Aviador Dro creó un cantar llamáu "Godzilla" onde comenten los beneficios del so aliendu radioactivu sobre la población.
  • La banda francesa de Death Metal, Gojira, pensó'l nome a partir d'ésti ser. Ello ye que orixinalmente yera llamada Godzilla, pero surdieron problemes llegales al llanzar un álbum con esi nome, polo que tuvieron de camudalu a Gojira.
  • La banda chilena llamada "Envés" tien un par de cantares alrodiu de Godzilla: "Godzilla" y "Mothra vs Godzilla".
  • El grupu norteamericanu "Lemon Demon" tien una animación onde Godzilla apaez como antagonista principal de la hestoria na ciudá de Tokiu.

Parodies y referencies n'otros medios[editar | editar la fonte]

  • Al ser les Ultraseries creación de Tsuburaya Eiji, quien taba a cargu de los efeutos especiales de Godzilla, hai personaxes d'estes que son fechos con antroxos del monstruu un poco trucaos. Estos son Gomess[16] y Jirahs.[17]
  • Na película Street Fighter: Ultimate Battle siéntese'l ruxíu de Godzilla mientres s'engarrien Honda y Zangief na maqueta de la ciudá de Bison.
  • Asonsañen o homenaxen Godzilla en series animaes como The Grim Adventures of Bill & Mandy, Pinky and the Brain, The Powerpuff Girls, Futurama, Love Hina, Rugrats, The Mask: The Animated Series, Ned's Newt, The Fairly OddParents, Invader Zim, Dexter's Laboratory, ¡Mucha Lucha!, Pucca, KaBlam!, South Park, Ben 10 Ultimate Alien, Neopets, Extreme Dinosaurs, Bionicle: The Legend Reborn, Drawn Together, Sebe non Hanayome o Keroro Gunsō.
  • Nel episodiu de The Simpsons Thirty Minutes Over Tokyo, Godzila garra l'avión onde viaxa la familia. N'otru capítulu pue vese a Godzilla no fondero nuna conexón del telediariu con Xapón, con una bolsa de xelu na cabeza y un termómetru na boca. N'otru capítulu, cuando Lisa refier a Pierre y Marie Curie, diz que "dambos morrieron por cuenta de la radiación" (anque solo foi Marie Curie), y Bart imaxina a dambos científicos axigantaos y destruyendo Xapón. N'otru cuando Lisa imaxínase desterrada en La Islla (más bien península) de los Monstruos, onde, xuntu con otros, Godzilla escuerre a Lisa y a los demás exiliaos. Cuando Homer s'engarria nun acuariu con Tom, "l'hermanu mayor sustitutu" de Bart, nes noticies especúlase la posibilidá de qu'ún de los que s'engarria ye un dinosauriu y apaez una semeya de Godzilla. Nel episodiu en que Homer interpreta al xigante Paul Bunyan engárriase con Rodan. Nun episodiu Homer fai un dibuxu de Godzilla y Superman ensin atamañaloss. N'otru Godzilla apaez firmando autógrafos nuna convención de ciencia ficción. Nel videoxuegu Bart's Nightmare pa SNES, Bart conviértese en "Bartzilla" y ha destruyir tolo que se-y ponga enfrente, engaramase a un edificiu y atopase con Marge y Homer, u'asonsañen a Mothra y King Kong respeutivamente. En Simpson Comic #1, Homer axiganta por un esperimentu Radioactivu y destruye Springfield como si fora Godzilla.
  • En Austin Powers in Goldmember, cuando Austin se llleva una estatua similar a Godzilla, la xente empieza a correr mientres s'escucha la música inicial de Toho. Metá l'ensame un home glaya "¡corréi, ye Godzilla!", a lo qu'otru respuende que por drechos d'autor nun lu ye y  el primeeru glaya "corréi como si fora Godzilla!".
  • En Mars Attacks! (1996) de Tim Burton pue apreciase, en plena escena de destrucción mundial, a los marcianos viendo Godzilla vs. Biollante (1989).
  • Na tapa del númberu 37 de Dragon Fall apaecen dellos personaxes estrapayaos nuna buelga y sosteniendo una pancarta que diz "Comité de Bienllegada a Godzilla". Na primer páxina tán caricaturizaos él y Zilla, esti postreru con una etiqueta que pon "Made in USA" mientres que l'otru tien a Vanesa Duren montada nel llombu y afirma qu'eso lu señala como l'auténticu Godzilla. Tamién s'afirma que Godzilla ye'l rotulista.
  • Na película Inspector Gadget (1999), Matthew Broderick, quien fai d'inspector Gadget al empar que d'un robó malváu, apaez afarando la ciudá como'l villanu coles piernes robótiques espurríes y reproduciendo el soníu que fai Godzilla na versión estauxunidense de 1998,  aludiendo a la escena de la película na que Godzilla apuerta a Nueva York (onde Matthew Broderick yera'l protagonista).
  • Nel manga d'Akira Toriyama Dr. Slump una de los protagonistes, Arale, ye aficionada a les películes de kaiju, especialmente de Godzilla y Ultraman. Nuna hestoria curtia d'ú de los primeros númberos, un criminal, el Dr. Kaiju, intenta secuestrala pa pidir un rescate y comprar un llibru de Godzilla. Pa convencela prométe-y que va regala-y a Gamera si va con él. Darréu mérca-y una tortúga y diz-y qu'entá tien que crecer. Tres un par de situaciones de traca, Arale torna a casa y únvia-y per corréu una llagartesa que s'atopa nel xardín con una nota que diz "Pásalu perbién, únviote a Godzilla, que lu cacé en xardín, cuando creza vamos facer un duelu".
  • Na película Crank: High Voltage, Chev Chelios, el protagonista, engárriase con ún metanes una estación llétrica mientres alucina que son xigantes que destruyen too al so pasu y bramen de forma similar a Godzilla.
  • Nel xuegu Social Empires de Facebook apaez un monstruu llamáu Godzilla Atómicu.
  • Nel videoxuegu pa Playstation 2 Destroy All Humans! 2, en Takoshima City, hai una misión na qu'hai que vencer un monstruu llamáu Kojira que ye bien similar a Godzilla.
  • En Shrek 2 Shrek y los sos amigos piden a un panaderu que-yos enforne un home xigante de jengibre pa invadir un castiellu, que emite'l soníu carauterísticu de Godzilla.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]