Gojira (película de 1954)

De Wikipedia
Saltar a navegación Saltar a la gueta
Picto infobox film.png
Gojira (película de 1954)
Gojira 1954 Japanese poster.jpg
Datos
Títulu orixinal ゴジラ
Xéneru cine d'horror, cine de ciencia ficción y Kaiju
País d'orixe Xapón
Añu 3 payares 1954
Idioma orixinal xaponés
Duración 100 min
Llugar de la narración Tokiu
Rodaxe Xapón
Color en blancu y negru
Ficha téunica
Direición Honda Ishirō
Producción Tomoyuki Tanaka
Guión Honda Ishirō, Shigeru Kayama y Takeo Murata
Música Akira Ifukube
Fotografía Masao Tamai
Edición Kazuji Taira (es) Traducir
Repartu Takashi Shimura, Akihiko Hirata, Akira Takarada, Momoko Kōchi (es) Traducir, Haruo Nakajima, Kokuten Kōdō (es) Traducir, Kenji Sahara, Katsumi Tezuka, Kin Sugai y Honda Ishirō
Ver llista completa
Compañíes
Productora Tōhō
Distribuidora Tōhō y Netflix
Calificaciones
FSK FSK 12
Gojira (película de 1954) Gojira no Gyakushū
Enllaces esternos
Ficha n'IMDb
Ficha en FilmAffinity
Cambiar los datos en Wikidata

Gojira, más conocida como Godzilla, ye una película xaponesa de ciencia ficción y horror estrenada en 1954, que produxo y distribuyó Toho Company Ltd. Dirixóla Honda Ishirō, y tevo a cargu de los efeutos especiales Eiji Tsuburaya. Foi la primer película de kaijū que se produz en Xapón, gran parte d'elles con Godzilla como protagonista. Nos Estaos Xuníos estrenóse con dellos cambeos como Godzilla, King of the Monsters!

Argumentu[editar | editar la fonte]

El barcu de pesca xaponés Eiko-Maru funde misteriosamente cerca de la Islla d'Odo. Manden un barcu de rescate pa investigar, el Bingo-Maru, pero asocéde-y lo mesml. Un tercer barcu alcuentra dellos sobrevivientes y, talamente como los otros dos, funde. Mentanto, na Islla d'Odo nun consiguen pescar nada: «Entós… debió ser Gojiraa», diz un vieyu. Esto ye una lleenda'l llugar sobre un dios-monstruu que vive nes fondures y sal p'alimentase d'humanos. Na antigüedá, los nativos sacrificaben moces pa evitar que Gojira atacara la aldea cuando la pesca yera escaso. Unos reporteros apuerten a la islla n'helicópteru pa investigar. Tolos nativos creyen qu'estos desastres los causa'l monstruu, pero los reporteros siguen siendo escépticos. Esa nueche los nativos faen un esconxuru esperando qu'asina Gojira nun ataque de nueves. Mientres que los nativos tán dormiendo, entama una tormenta y un monstruu ataca l'aldeína, provocando muerte y destrucción.

Al otru día, los testigos van pal Edificiu de la Dieta, en Tokio, onde'l paleontólogu Yamane Kyōhei pide dirixir un equipu investigador que vaiga pa la Islla d'Odo. Elli atopa buelgues xigantes contaminaes con radiactividá a la xunta trilobites. De sópitu, suena una alarma del pueblu y manden a los aldeanos al monte pa lluchar escontra'l monstruu. D'esmenu, la testona ruxidora d'una creatura escomanada, espantible, asemeyada a un dinosaurio, asoma penriba'l monte. Los aldeanos fuxen y el monstruu vuelve darréu pa ente l'agua. Yamane descubre que les esplosiones atómiques d'apocayá espertaron el monstruu, que sobrevive de dalguna forma dende los tiempos prehistóricos. El sedimento que dexó'll monstruu, al que Yamane noma “Gojira" pola lleenda de la islla, contién bien d'estronciu-90, que namás que podría provenir d'una bomba atómica. Dempués de presentar les sos conclusiones, un home del públicu suxere qu'espublicen la información, pero siendo Gojira productu de les armes atómiques, quieren más evitar les consecuencies d'asoleyar un asuntu tan delicáu. Por embargu, una muyer opónse a callalo, insulta al que lo propunxo y móntase un xaréu. L'orixe'l monstruu acaba faciéndose públicu y unvien una flota pa bombardialu, masque Yamane quier prendelu vivu pa estudialu. Esa mesma nueche Gojira apaez en Tokiu, atemoriando a tol país, y vuelve a somorguiase. A la mañana los funcionarios entruguen a Yamane si se-y ocurre cómo matalu y él respuende que non, pos yá se demostró que nun valen nin les bombes atómiques. A estes, Emiko, la fía de Yamane, trabaya pa Serizawa Daisuke, un colega de so pá, y esti cuénta-y un secretu terrible. Esa nueche, Gojira apaez otra vuelta en Tokiu y ataca la ciudá, rápido pero causando abonda destrucción y muerte.

A la mañana siguiente, los militares echen arriba una alambrera lletrificada de trenta metros de altor a lo llargo la costa de Tokiu, desapolinen la ciuda y lleven los civiles p'abellugos antibomba. N'anocheciendo, Gojira remanez na Ensenada de Tokiu otra vuelta y pasa fácil al traviés de l'alambrerona, ensin siquier mancase. Mientres qu'afustaca echa pela boca un rayu atómicu que priende cualesquier cosa que toca. Los militares espreceten y al albar la ciudá entera ye una mar de fueu y matancia, con miles de civiles inocentes muertos y firíos. Mientres Gojira torna pal océanu dispáren-y misiles, pero nun son a mancalu. A la mañana siguiente, los hespitales tán enllenos de víctimes, munches espuestes a grandes dosis de radiación. Cuando Emiko ve les munches víctimes del ataque de Gojira, cuenta al teniente Ogata Hideto'l secretu de Serizawa, cola esperanza de que puea facer dalgo: Serizawa revelára-y qu'había una superarma llamada "Destructor d'oxíxenu", que yera a desintegrar tol oxíxenu de l'agua y desaniciar cualesquier forma de vida cercana, siendo mesmamente más destructiva qu'una bomba atómica. Serizawa prometiérase nun revelar nunca'l descubrimientu hasta que fora a ayudar a la humanidá en cuenta de destruyila, y nun principiu refuga úsala escontra'l monstruu. Esto acaba nuna engarriada ente él y Ogata, pero a la final son a convencelu (masque destruye toles notes sobre cómo fabricar l'arma pa que nengún gobiernu se faga col inventu).

En llevándolos l'exércitu a la ensenada, Serizawa y Ogata somórguiense ente l'agua y atopen a Gojira. N'activando'l destructor d'oxíxenu y mandando a Ogata xubir, Serizawa corta la so cuerda y muerre a la xunta de Godzilla p'asina asegurase de que nun se conoza nunca'l secretu l'arma.

De Gojira namás que queda la cadarma, pero Yamane comenta que de siguir faciendo esplotar bombes atómiques ye custión de tiempu que remanezan monstruos nuevos.

Repercusión[editar | editar la fonte]

Magar el conteníu críticu de la película, el monstruu tevo un gran ésitu nel públicu infantil que nun viviera la Segunda Guerra Mundial, polo que ficieron abondes continuaciones nes que Gojira s'enfrentaba a otros monstruos. Asina creóse'l cine de kaiju como soxéneru estrella del tokusatsu.

Gojira ye ún de los personaxes más icónicos del cine y que más películes tien protagonizao.

Referencies[editar | editar la fonte]

Enllaces esternos[editar | editar la fonte]