Franklin Delano Roosevelt

...

Franklin Delano Roosevelt

Franklin Delano Roosevelt ( Nueva York, 30 de xineru de 1882 – 12 d'abril de 1945), el trixésimosegundu presidente de los Estaos Xuníos y únicu hasta anguaño na hestoria norteamericana n'estender el so mandatu a 3 llexislatures.

Biografía

Yera primu del presidente Theodore Roosevel y estudió como él la carrera de drechu na Universidá de Harvard. Nún entamu alternaba l'actividá xurídica y la política aportando a ser senador demócrata, secretariu de Marina y gobernador de Nueva York. En 1921 foi afeutáu pola poliomelitis, enfermedá que nun-y torgó la carrera política.

La crisis económica de 1929 y el so apuestu por una nueva política, el (New Deal) (nueu repartu), fízo-y ganar la confianza de los estaunidenses nes eleiciones de 1932 derrotando al candidatu republicanu Herbert C. Hoover, y convirtiéndose nel 32^u Presidente de los Estaos Xuníos d'América pol Partíu Demócrata. Tres superar la crisis económica potenció la política esterior lluchando por algamar la primacía mundial estaunidense, afitando rellaciones diplomátiques cola Xunión Soviética en 1933. Como retruque a l'amenaza de la Alemaña de Hitler, punxo en marcha una riestra de midides (rearme, economía de guerra, alliniación coles potencies democrátiques) que tresnaron al so país pa un dable enfrentamientu armáu, asina como foi tres del arrebexu xaponés a la base militar de Pearl Harbour nel Pacíficu nel añu 1941.

Roosevelt

Partidariu de la vía diplomática y de caltener contautos personales colos políticos alliaos, entrevistóse en delles ocasiones, por separtao y conxuntamente, con W. Churchill y Y. Stalin p'algamar alcuerdos al finar la II Guerra Mundial. Nesta llinia y d'acordies al so deséu de llograr un atalantamientu pacíficu ente los distintos países, encamentó la criación d'una Organización de les Naciones Xuníes (ONU). Na so xera política, arriendes, hai de solliñar un importante papel de la so esposa Eleanor.

Magar que sabía del proyeutu Manhattan sobro'l desendolcu de la bomba atómica, nun algamó a alministrar el so usu.

L'avanzáu cáncer cerebral que padecía pudo más que la fuercia y enfotu del políticu morriendo na so residencia de Warm Springs, Georgia, el 12 d'abril de 1945, a les puertes de la fin del conflictu ensin ver finar la Segunda Guerra Mundial y ensin algamar alcuerdu col ca vegada más poderosu Stalin.