Francisco Pérez Bayer

De Wikipedia
Francisco Pérez Bayer
Vida
Nacimientu Valencia11 de payares de 1711[1]
Nacionalidá Corona d'Aragón
Muerte Valencia[2]27 de xineru de 1794[1] (82 años)
Estudios
Estudios Universidá de Salamanca
Llingües falaes castellanu
llatín
Profesor de Gabriel de Borbón (es) Traducir
Oficiu teólogu, escritor, numismáticubibliotecariu
Emplegadores Universidá de Valencia
Universidá de Salamanca
Premios
Miembru de Real Academia de Bones Lletres de Barcelona
Cambiar los datos en Wikidata

Francisco Pérez Bayer y Benicassim (Valencia, 1711 – Valencia, 1794), filólogu, numismáticu y xurista español.

Biografía[editar | editar la fonte]

Nació na Cai Palombar nº6 de la ciudá de Valencia'l 11 de payares de 1711 y dos díes depués foi bautizáu na Ilesia de los Santos Juanes d'esa mesma ciudá. El so padre yera natural de Saldón (Teruel).La so madre Doña Josefa María Bayer, yera natural de Castellón, al igual que los sos güelos maternos, D. Pedro Bayer y Doña María Nos Cominges. La familia tenía numberoses tierres no que depués sería llamáu Benicassim. Empecipió los sos primeros estudios ente Benicassim y Valencia, en que la so Universidá estudió Teoloxía. Estudió bachilleratu en cánones en Gandia. Atraíu poles lleis, treslladóse a Salamanca pa completar los estudios de dambos Derechos, llegando a formar parte na Academies Xurídica de Salamanca. En 1738 coló de nuevu a Valencia, como secretariu del arzobispu Mayoral, hasta que consiguió la plaza de catedráticu d'hebréu na Universidá de Salamanca. En 1749 foi acomuñáu xunto al xesuita Andrés Marcos Burriel na Comisión d'Archivos, en que'l so cometíu ordenaron los archivos de Toledo y El Escorial. Tres el cambéu de gobiernu de Fernandu VI, y l'espulsión de los xesuites del gobiernu, Pérez Bayer ganóse'l favor del nuevu gobiernu presidíu por Ricardo Wall, y de personaxes como Campumanes. Daquella coló con una beca a Italia, onde amás de cultivar la so pasión poles antigüedaes tuvo la oportunidá de conocer personalmente al gran hebraísta Biagio Ugolino y al futuru monarca Carlos III. Al so regresu a España foi nomáu canónigu tesoreru de la catedral de Toledo, y realizó el catálogu de manuscritos de la biblioteca d'El Escorial. Arriendes de la espulsión de los xesuites foi nomáu preceptor de los infantes reales, dende onde empezó a influyir sobre la política cultural del gobiernu, n'ámbitos como la reforma de la Universidá y de los Colexos Mayores. Ye entós cuando empezó a asitiar a los sos fieles nos principales cargos culturales, como los Reales Estudios de San Isidro, la plaza de Cronista d'Indies, o'l rectoráu de la Universidá de Valencia.

Aportó a la plaza de bibliotecariu mayor de la Biblioteca Real en 1783 moviendo al so enemigu y pretendiente al mesmu puestu Juan de Santander, y dirixó tan importante institución hasta 1794, entamando numberosos proyeutos, como por casu la reedición de les importantes bibliografíes de Nicolás Antonio. Foi nomáu académicu d'honor de San Petersburgu y Göttingen, participó bien viviegamente nos proyeutos de la Real Academia de la Historia y realizó un interesante viaxe per Andalucía y Portugal que nos dexó manuscritu. Foi autor de numberoses obres sobre temes históriques y lliteraries, y sobre llingües orientales, como l'hebréu y el feniciu. Entró a formar parte como sociu de la Real Sociedá Económica d'Amigos del País de Valencia en 1776.

Inscripción fenicia y griega de Malta interpretada pola premiera vegada por Pérez Bayer (1722).

Foi canónigu de los cabildros de Valencia, Barcelona, Salamanca y Toledo; catedráticu d'hebréu en Valencia y Salamanca; arabista, filólogu, helenista, llatinista, arqueólogu y numismáticu. Esiste una semeya so nel Paraninfu de la Universidá de Valencia.

La decisión de Pérez Bayer de construyir una ilesia en Benicàssim, coincide en feches cola entós recién desapaición del conocíu anguaño como Ermu vieyu de les Palmes. A les sos espenses y llográu el beneplácito de La so Maxestá, Pérez Bayer mandó construyir la ilesia nos terrenes que tenía frente a la so casa y esta decisión considérase que favoreció la definitiva fundación de Benicàssim, yá que tuvo'l méritu d'apigurar alredor de la ilesia que fundó a tolos vecinos, hasta entós tremaos en pequeños nucleos de población y en masías.

Escribió numberosos llibros, hasta l'estremu de que Don Marcelino Menéndez y Pelayo diz d'él, que les sos obres faen dómina nel estudiu de la numismática hebrea. Francisco Cantó afirma que foi precisamente en Benicàssim onde Pérez Bayer escribió la so última obra. Trátase d'un discutiniu que caltenía col sabiu prusianu Dr. Olav Gerardo Tichen pola obra publicada por Pérez Bayer titulada Vindiciae. La obra de contrarréplica titulábase Llexitimidá de la monedes hebréu-samaritanes. Confutación de la diatriba de nummis hebraciis de Olav Gerardo Tichsen. Valencia 1793.

Francisco Pérez Bayer foi unu de los personaxes más influyentes de la España del sieglu XVIII, que dende la Corte supo ganase l'amistá del monarca, ministros, ya influyentes personalidaes que-y dexaron asitiar se nes más altes responsabilidaes polítiques, culturales y relixoses del momentu. El fallecimientu de Pérez Bayer foi sentíu y constituyó motivu de comentarios en tolos ambientes culturales d'España.

La entidá cultural Acció pel Patrimoni Valencià cola ayuda del Ajuntament de Benicàssim alcordaron el 26 de xineru de 2008 nun actu cultural y civil na Catedral de Valencia, proclamar l'añu 2011 Añu de la Ilustración Valenciana, yá que va ser el tercer centenariu de la nacencia de Francisco Pérez Bayer.

Obres[editar | editar la fonte]

  • Catálogu de la Real Biblioteca d'El Escorial. Damaiuis et Laurentius Hispani, Roma, 1756.
  • Del alfabetu y llingua de los fenicios y les sos colonies, 1772.
  • Viaxes lliterarios. Valencia: Institución Alfonso'l Magnánimo, 1998.
  • Etimoloxía de la llingua castellana.
  • Viaxe arqueolóxicu dende Valencia a Andalucía y Portugal.
  • De numis Hebraeo-Samaritanis
  • De toletano hebraeorum templo
  • Instituciones de la llingua hebrea.
  • Orixe de les voces españoles derivaes de les voces hebrees.

Referencies[editar | editar la fonte]

  1. 1,0 1,1 Afirmao en: Open Library. Identificador Open Library: OL558561A. Apaez como: Francisco Pérez Bayer. Data de consulta: 9 ochobre 2017. Autor: Aaron Swartz. Llingua de la obra o nome: inglés.
  2. «Universidá de Valencia».
  3. Identificador DBE: 5338/francisco-perez-bayer.

Enllaces esternos[editar | editar la fonte]