Forma musical

De Wikipedia
Saltar a navegación Saltar a la gueta

En música, forma musical nel so sentíu xenéricu designa tantu una estructura musical como una tradición d'escritura que dexa asitiar la obra musical na hestoria de la evolución de la creación musical. Añadíes a un títulu d'una obra, les distintes formes musicales como sinfonía, conciertu, preludiu, fantasía, etc. designen entós, tantu una estructura que se construyó a lo llargo del tiempu, como un xéneru musical particular, una composición musical qu'evolucionó mientres sieglos: ópera, danza, etc. En dambos casos, el conceutu de forma alude a la pertenencia a una categoría d'obra que tien unu o dellos criterios más o menos estrictos propios d'una estructura ―númberu de movimientos, estructura xeneral, proporciones, etc.― qu'a lo llargo de la hestoria convirtiéronse en prototipos, lo que nun torgó que siguieren evolucionando y escaeciendo dacuando los moldes del principiu, una y bones los compositores trabayen, amás de les temes, el ritmu, la melodía y l'harmonía.

Fálase tamién de formalismu cuando se fai usu d'una cierta téunica de composición (música serial) o d'una categoría d'obra que respeta un ciertu númberu d'usos, teóricos o históricamente inducíos.

Pero si'l conteníu de la música ye inefable, inmanente, la so inscripción na trama temporal del nuesu presente impríme-y al empar una estructura y una forma, qu'operen en nós tresformamientos incontrolables pola consciencia. La organización de la música nun ye d'orde intelectual salvo si la consideramos como una estructuración consciente que la teoría podría paralizar.

Forma musical, estructura y xéneru[editar | editar la fonte]

El conceutu de forma nun puede aprendese direutamente. Solo la escucha de la obra, el so desenvolvimientu nel tiempu, dexa la perceición. Históricamente, el compositor que titulaba una obra rellacionándola con una forma precisa, podía indistintamente faer referencia a los sos aspeutos xenéricos (esto ye, al so destín), o a la so estructura musical (esto ye, a la so arquiteutura), o inclusive a los dos al empar, aspeutos xenéricos y aspeutos estructurales, yá que tán de cutiu inxeríos. Ye lo que de manera natural produció un desliz semánticu, y que numberosos términos que designen distintes formes ―motete, fuga, aria, rondó, etc.― revistiérense de sentíos distintos, unes vegaes cercanos al conceutu de xéneru musical, otres vegaes cercanos al d'estructura musical.

Un exemplu bultable ye'l del términu «sonata» que, según el contestu, puede designar el «xéneru sonata», o bien la «forna sonata» presente n'estremaos xéneros, por casu la sonata clásicu-romántica, el cuartetu o la sinfonía, que la empleguen en dalgunos de los sos movimientos, y polo que son conocíos como "xéneros sonato-sinfónicos".

Forma y estructura[editar | editar la fonte]

La forma estrémase inclusive de la estructura musical, nel sentíu de qu'una mesma forma puede de fechu ―según la obra proyectada, según el compositor, según los usos de la dómina, etc.― adoptar esta o aquella estructura.

Asina, el «preludiu», cuando designa la forma introductoria d'una ópera: el preludiu de Carmen de Bizet reviste la «estructura» d'un rondó (ABACAD), ente que el d'El oru del Rin de Wagner texe llibremente un «decoráu sonoru» afayadizu, ensin siguir una estructura particular. Nel so sentíu orixinal, el preludiu designaba solamente lo que precedía a la parte más importante d'una obra ―cf. los preludios y fugues de Bach―.
  • Los aspeutos estructurales acomuñaos a una forma, tienen de considerase como constituyendo un simple esquema non torgante. El non respetu de les regles nun descarta por fuercia una obra de la forma tomada como modelu.
Por casu, la «sinfonía», forma carauterística de los periodos clásicu y románticu, ye tradicionalmente descrita como la socesión de los cuatro movimientos siguientes: allegro, lentu, menuet y rondó. Agora bien, ye bien fácil atopar sinfoníes en que'l marcu allóñase pocu o enforma d'esti plan ideal» ―por casu, la Sinfonía n° 34 en do mayor K. 338 de Mozart nun tien más que trés movimientos, ente que la Sinfonía Pastoral de Beethoven tien cinco―: a pesar d'estes esceiciones estructurales, tales obres tienen de considerase, naturalmente, como pertenecientes claramente a la forma «sinfonía».
  • Desgraciadamente, ye necesario señalar que'l términu de «forma» ye de cutiu emplegáu como sinónimu de «estructura», lo que produz fatalmente dellos nuevos tracamundios: por casu, «forma binaria» por «estructura binaria».
Por casu, cuando se diz que'l segundu movimientu de tal sinfonía ta escritu en «forma de lied», esto nun significa de nenguna manera que se trata de la «forma lied» (que ye una amuesa a les clares de música vocal y non de música sinfónica), sinón más bien que «la so arquiteutura sigue la estructura musical davezu acomuñada a esta forma vocal», a saber: A B A'. Apréciase qu'una espresión tal que «forma lied» puede, según el contestu, aludir a una verdadera forma, o bien a una simple estructura.
  • Si'l términu forma utilízase como un puru sinónimu de «estructura musical», alude de fechu a la definición mesma de la estructura, organización de los elementos constitutivos d'una obra: la so arquiteutura compositiva, el so desenvolvimientu, la disposición de les idees musicales, les sos imitaciones, les sos reexposiciones, etc.
Ello ye que la célebre teoría de les formes musicales, ellaborada nel sieglu XVIII por J. Mattheson, J.A. Scheibe, Joseph Riepel y Heinrich Christoph Koch, ye de fechu una «teoría de les estructures musicales».

P'atayar tracamundios, paecería preferible utilizar el términu de «estructura», más bien que falar de «forma lied», de forma binaria», de «forma sonata», etc. Falaríase asina de «estructura lied», «estructura binaria», de «estructura sonata», etc. Nesti momentu, el términu «forma», tomáu nel sentíu de «estructura», ye emplegáu inda de forma bien frecuente.

Forma y xéneru[editar | editar la fonte]

La forma estrémase igualmente del xéneru musical. Sicasí, avérase-y, cola condición d'almitir que'l conceutu de «xéneru» puede estenderexase en forma d'árbol.

Por casu, el xéneru «música instrumental» ta dixebráu en delles cañes: el xéneru música de cámara, el xéneru música concertante, el xéneru música sinfónica, etc. Esti últimu xéneru subdivídese de la mesma en delles sub-cañes: el xéneru sinfonía, el xéneru obertura, el xéneru poema sinfónicu, el xéneru ballet, etc. Son estes sub-cañes ―sinfonía, obertura, poema sinfónicu, ballet, etc.― les que se consideren tradicionalmente como formes.

Repárase que, según el contestu, dellos términos que sirven pa designar distintes formes musicales, pueden igualmente aludir al xéneru musical venceyáu.

Por casu, si dicimos «Richard Wagner compunxo trece óperes», «Ayeri de tarde, Xuan escuchó una ópera», «Don Giovanni ye la mio ópera preferida», los trés mentes del términu «ópera» aluden a la forma musical, esto ye, a la «unidá» ―una obra musical precisa, inclusive non identificada― pudiendo contabilizase y estremase dientro d'un conxuntu.

Per otra parte, si dicimos que «Johann Sebastian Bach nun escribió enxamás pa la ópera», «Xuan escucha de cutiu ópera», «Les cantantes d'ópera son cuasi siempres dives», los trés mentes de la pallabra «ópera» aluden esta vegada al xéneru musical, esto ye, a «munches» obres de la mesma naturaleza, constituyendo por tanto elementos nun contables.

Otra manera, nun puede dicise «Ayeri tarde, Xuan escuchó un bel canto»: el términu «bel canto» designa equí puramente un xéneru musical, y non una forma. De la mesma manera, nun se va dicir nunca: «Xuan escucha conciertu de vezu» (sinón más bien «Juan escucha música concertante de vezu»): el términu «conciertu» designa equí puramente una forma musical, y non un xéneru.

De manera esquemática, el xéneru» designa'l conxuntu, ente que la »forma» designa un elementu d'esti conxuntu: el «xéneru» correspuende a la caña del árbol, la «forma» correspuende al frutu; o dicho otra manera, «la forma ye l'elementu terminal del xéneru». Sicasí la diferencia ente los dos conceutos ye feble enforma.

La forma musical como criadora de la unicidá de la obra[editar | editar la fonte]

Unidá de tiempu[editar | editar la fonte]

La forma musical se nos revela al tiempu y a midida que asocede'l desenvolvimientu de la obra musical: cada intre ye en potencia un momentu del porvenir, una proyeición no desconocío. Esti ye'l sentíu del bien bellu títulu d'una obra de Henri Dutilleux que propón somorguianos nel misteriu del intre. El teólogu suizu Hans Urs von Balthasar, pa recordanos la importancia del tiempu, concibe esta metáfora xuiciosamente musical de la condición humana:

«Demos confianza al tiempu. El tiempu ye la música; ya'l dominiu del qu'ella surde, ye'l porvenir. Compás tres compás, la sinfonía s'enxendra ella mesma, naciendo milagrosamente d'una reserva de duración inescosable». («Faites donc confiance au temps. Le temps c'est de la música; et le domaine d'où elle émane, c'est l'avenir. Mesure après mesure, la sinfonía s'engendre elle-même, naissant miraculeusement d'una réserve de durée inépuisable»).

El tiempu inscribese na direición de la flecha del tiempu conceptualizada por Ilya Prigogine. L'orde que'l compositor pon en llugar constituye un sistema abiertu, basáu tantu na proporción como na aleatorieda, tanto no racional como no indescribible. La música crea les sos propies regles d'adautación a la evolución.

Unidá de la obra[editar | editar la fonte]

Inscrita nel tiempu, la forma musical nun puede, pola so esencia, comparase a les otres formes artístiques, pictóriques, arquiteutóniques o otres. La formalización musical ye de fechu primero de too una puesta en relieve. Forma y estructura son inclusive difíciles d'estremar. La intervención estructurante de l'audición construye, d'una parte, una escucha interior nel compositor y, d'otra, una escucha activa del oyente. Esta perceición circunscríbese a la duración, lo que dexa da-y una unidá formal a la obra musical. La unidá ye la condición primera, pero nun s'ellabora más que porque hai redundancies, oposiciones, comparances, conflictos... La estructuración previa del material pol compositor precede nel tiempu la etapa de la formalización. Ye un pasu metodolóxicu de la creación yá que la mesma vien al tiempu del espíritu y de la poesía. La forma musical va revelar entós nel so desenvolvimientu una estructuración de la perceición estética, que puede efectuase a partir de modelos teóricos (forma sonata, etc.) o a partir del material mesmu, imponiéndose a les intuiciones inmediates del compositor.

Gestalt[editar | editar la fonte]

Según Boris de Schlœzer, teóricu inspiráu pola Gestaltpsychologie, solo esta cohesión formal de la obra, la totalidá globalizante de la so organización, apúrre-y un sentíu intrínsecu ya inmanente, nel que la música significa ella-mesma y procura una cierta sensación comunicativa a aquellos que la escuchen. En realidá, la música inscríbese nun tiempu «vivíu» que da'l so sentíu a la obra musical. Si'l conteníu de la música ye inefable, inmanente, la so inscripción na cadarma temporal del nuesu presente impríme-y una estructura y una forma.

Faciendo primar la so concepción gestaltista crítica, de Schlœzer vien estremar estructura y forma de la manera siguiente: la estructura mora na disposición de les partes concebida n'orde a constituyir un tou, una unidá. La forma, ye esti tou en cuantes que tal, ye dicir la manera en que la obra llega a la unidá. Por esencia y por necesidá, la obra musical sería asina cuasi perpetuamente re-unviada del tou a los sos partes y de les partes al tou. Pero solo la unidá formal, l'harmoniosa cohesión de los elementos constitutivos opera esti escedente d'espresión que manifiesta la esencia mesma de la obra, la so unicidá. Esti aproximamientu dexa asitiar la creación musical na psicoloxía de la perceición, sorrayando la importancia d'esta influencia reciproca del tou sobre les partes.

El pensamientu consciente que zarra al home nes llendes de la so propia identidá, ye perpasáu por esti tou constituyíu de rellaciones que caltienen tolos intres, toles facetes (conscientes ya inconscientes) que formen la cualidá d'una obra musical. Asina, esta estrémase por dos traces de la so creación formal que son, d'una parte, el procesu y d'otra parte la so estructuración. Nengún compositor puede arré conxelar la so espresión nun procesu declarativu primeramente fitu, ensin llindase a sigo mesmu. A partir del conteníu, d'un material construyíu, la estructura de la obra musical evoluciona de la perceición escontra la recepción.

Procedimientu y procesos[editar | editar la fonte]

La creación musical adopta estratexes teóriques (xenériques), qu'evolucionaron na hestoria de la música, estratexes destinaes a impulsar el cambéu, el movimientu, a partir de bases coleutives. Estes regles, estos sistemes, pueden averase a una llei d'organización ―como s'entiende'l términu inglés «procedure»― o d'una semántica procesual, ye dicir non tantu aquello que cinca al procedimientu mesmu, a la estratexa de cambéu, sinón más bien a les fases d'esi cambéu, en realidá'l procesu. Esta noción de procesu suplantó direutamente a otres nociones d'estructuración de la música, tales como les que creaben los oxetos musicales, elementos arquiteutónicos d'una estructura a definir. D'una dualidá oxeto/estructura, pasóse nos años sesenta  a una dualidá material/procesu.

Música contemporánea y formes musicales[editar | editar la fonte]

Na música contemporánea, el compositor s'enfrenta a un material sonoru ricu de la so propia espresividá, del so poder de inmanencia, es únicamente llevada a coordinar la necesidá d'una formalización de los procesos y la obligación de les rellaciones que desbloquien les lleis de la perceición de los estratos informales de lo musical. La rellación función-forma nun tien verdaderamente importancia al nivel d'una creación que sin cesar toma el riesgo de lo nuevo. Solo la rellación ente'l material ―modelu acústicu, tresposición musical― y la función inducida ―por naturaleza o pol destín― proporciona los criterios d'una posible integración formal. Crear nueves organizaciones de les funciones musicales que se dirixirán menos direutamente a la organización xerárquica de la forma desarrollada qu'al interés del oyente que nella atrai la recepción, convirtióse nuna nueva noción traducida pola idea de material musical. Toos estos conceptos que dirixen esta gueta d'una historia de la recepción tresformáronse en poco tiempu en conceptos modernos básicos pa participar na evolución de les formes.

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]