Bob Hope
_rib.PNG){kind=small}
.svg){kind=small}
Bob Hope (29 de mayu de 1903, Eltham – 27 de xunetu de 2003, Toluca Lake (es) 
), nacíu como Leslie Townes Hope, foi un famosu artista d'Estaos Xuníos nacíu n'Inglaterra, qu'apaeció en teatru, radio y televisión, en películes de cine, y n'actuaciones pal exércitu de los Estaos Xuníos.
Biografía[editar | editar la fonte]
Hope nació n'Eltham, Inglaterra, siendo'l quintu de siete hermanos. El so padre William Henry Hope, Inglés, yera canteru de Weston-super-Mare y la so madre Avis Townes, Galesa, yera cantante d'opereta anque tuvo que dexalo pa dedicase a llimpiar. La familia vivió en Weston-super-Mare, en Whitehall y en St. George en Bristol, enantes de treslladase a Cleveland, Ohio en 1907. Hope convirtióse en ciudadanu d'Estaos Xuníos en 1920 cuando tenía 17 años.
Antes de dedicase al mundu del espectáculu, Hope trabayó como boxeador (col nome de Packy Easte), anque nun tuvo enforma ésitu. Ye entós cuando participa en dellos concursos, asonsañando al Charles Chaplin. N'unu d'ellos ve-y el comediante Fatty Arbuckle y en 1925 da-y trabayu. Un añu dempués, Hope forma parte d'un númberu llamáu "The Dancemedians" coles Hermanes Hilton. Dempués de cinco años nel mundu del vodevil, vuelve a Nueva York y empieza a apaecer en dalgunos musicales de Broadway. Les sos actuaciones yeren bien recibíes y los críticos empezaron a destacar el so sentíu del humor.
A mediaos los años 1930, Hope vuelve a Hollywood, onde empieza con delles películes de serie B pa la Warner Brothers. En 1938, na película "The Big Broadcast of 1938", apaez cantando'l cantar que se va convertir nel so sellu, "Thanks for the Memory", siendo un ésitu de ventes y crítica.
A partir d'esi momentu, les regulares apaiciones de Hope en películes de Hollywood y na radio, fáen-y unu de los más conocíos artistes de Norteamérica.
Nel cine, ye recordáu por películes como "My Favorite Brunette" y poles películes que protagonizó xunto a Bing Crosby y Dorothy Lamour. Lamour ye l'artista femenina que más trabayó xunto a Bob Hope, anque tamién lo fixeron actrices como Lucille Ball, Jane Russell, Joan Collins o Katharine Hepburn.
Tamién actuó na televisión, onde debutó en 1932, mientres un test de tresmisión nos estudios de la CBS en Nueva York. La so carrera nesti mediu trescurrió a lo llargo de 64 años, trabayando principalmente pa la NBC.
Nunca ganó un Óscar poles sos interpretaciones, pero l'Academia de les Artes y les Ciencies Cinematográfiques dio-y dellos premios especiales y actuó como maestru de ceremonies en 18 ediciones de los Premios de l'Academia ente los años 50 y los 80.
Nel ámbitu personal, casóse dos veces. La primera foi cola so compañera de vodevil Grace Louise Troxell con quien se casó'l 25 de xineru de 1933, de la que bien llueu se divorció. Hope casóse darréu con Dolores Defina'l 19 de febreru de 1934. Dolores, cantante nun nightclub y conocida profesionalmente como Dolores Reade, a la que conoció dos meses enantes, foi la so esposa mientres 69 años, siendo'l matrimoniu más duraderu na historia de Hollywood hasta la fecha. Adoptaron cuatro fíos, toos ellos d'un orfanatu n'Evanston, Illinois.
Por cuenta de la so llonxevidá, Hope sufrió dos "muertes prematures". En 1998, un obituariu preparáu pola Asociación de la Prensa foi publicáu n'internet per error. En 2003, el so obituariu taba ente los que fueron publicaos na CNN por error.
Hope celebró'l so 100 cumpleaños el 29 de mayu de 2003. Pa celebrar esti eventu, l'encruz ente Hollywood Boulevard y Vini street en Los Angeles, California foi llamáu Bob Hope Square y el so centenariu foi declaráu'l Día de Bob Hope en 35 estaos d'Estaos Xuníos. Hope morrió dos meses dempués por causa d'una neumonía, el 27 de xunetu de 2003 na so casa del llagu Toluca, al norte de Hollywood.
Na edición de los Premiu Óscar de 2003, Tom Hanks rindió-y tributu a tola so carrera. En dicha ceremonia, Julia Roberts realizó una alcordanza especial a Katharine Hepburn, que morrió cuasi un mes primero que Hope, el día 29 de xunu de 2003.
Referencies[editar | editar la fonte]
- ↑ 1,0 1,1 Afirmao en: Gemeinsame Normdatei. Data de consulta: 24 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ URL de la referencia: https://www.loc.gov/about/awards-and-honors/living-legends/bob-hope/.
- ↑ «Bob Hope» (inglés). Consultáu'l 31 agostu 2023.
- ↑ 4,0 4,1 4,2 4,3 4,4 Afirmao en: Academy Awards Database. Identificador Óscar de nominado: 7489. Data de consulta: 25 febreru 2022. Llingua de la obra o nome: inglés.
- ↑ «Trustees Award – The Emmys» (inglés). Consultáu'l 31 agostu 2023.
- ↑ «Bob and Dolores Hope Honored With Papal Knighthood» (11 xunu 1998).
Enllaces esternos[editar | editar la fonte]
Wikimedia Commons tien conteníu multimedia tocante a Bob Hope.- Bob Hope n'español
- Bob Hope na Internet Movie Database (n'inglés)
| Control d'autoridaes |
|
|---|
