Ablana

De Wikipedia
Ablana
Nome Ablana
Detalles
Ingredientes hazelnut shell (en) Traducir
Productu natural de Corylus avellana
Más información
[editar datos en Wikidata]

L'ablana[1] ye'l frutu d'un arbustu que llamen ablanal o parra (corylus avellana). Tien una forma esferoidal con un diámetru d'ente 10 y 15 mm. y compónse de tres partes: un garapiellu (cubierta vexetal de color verde), un cascu fibrosu que seca al madurecer y una parte comestible.

Tradicionalmente les ablanales plántense nes orielles de los praos, y son un complementu a otres actividaes agrícoles y ganaderes. Les ablanes cuéyense a lo último del branu o al entamu de la seronda, abaxando si fai falta les cañes de les ablanales con un gabitu y echándoles nuna fardela que se suel llevar amarrada a la cintura pa tener les manes llibres. En casa, esbíllense y pónense a secar al sol en corredor pa poder consumiles tol añu.

Propiedaes nutricionales[editar | editar la fonte]

Les ablanes estrémense d'otros frutos pola so riqueza en lípidos y proteínes, la importancia de los aportes enerxéticos, la poca presencia d'agua nelles y una tasa de glúcidos modesta. Son ún de los frutos mas ricos en oligoelementos (fierro, cobre y cinc) y en vitamines (sobremanera la vitamina E y les del grupu B, pero tamién A y C). Tamién contienen abondos elementos minerales (fósforu, magnesiu, calciu, potasiu y azufre).

Gastronomía[editar | editar la fonte]

Les ablanes puen consumise naturales o turraes. En respostería, entren tradicionalmente na composición de tartes, bizcochos o casadielles (nesti casu mezclaes con nueces). Tamién s'ellaboren llicores a partir d'elles.

Historia[editar | editar la fonte]

Les ablanales monteses crecen de manera espontánea n'Asia Menor. Los primeros en cultivales fueron los turcos, que siguen siendo anguaño los principales productores mundiales. Dende Turquía, el cultivu estendióse per Grecia y Roma y posteriormente pel restu d'Europa.

N'Asturies sábese que nel sieglu XVIII la producción d'ablana yera enforma importante, y parte d'ella esportábase a Inglaterra dende'l puertu de Xixón.

Anque la producción menguó enforma a lo llargo del sieglu XX, anguaño, Asturies ocupa'l segundu llugar d'España en producción d'ablanes, dempués de Cataluña. Les principales zones de producción son Piloña (onde se celebra’l Festival de l'ablana el primer domingu d'ochobre dende los años 70), los conceyos del altu Nalón, Grau, Quirós o Teberga. Ente les variedaes autóctones destaquen la Negreta, Amandi, Quirós, Casina y Villaviciosa.

Referencies[editar | editar la fonte]

Enllaces esternos[editar | editar la fonte]