Tonada

De Uiquipedia
Saltar a: navegación, buscar
Merge-arrows.svg Pues collaborar con Uiquipedia fusionando esti artículu con asturianada.

La Tonada, tamién nomada Asturianada o Canción Asturiana, ye un estilu musical tradicional asturianu de xeitu popular ("folclor").

Historia[editar | editar la fonte]

Nun se tienen atopao testimonios na escritura so la tonada fasta 1885, cuando'l estudiosu avilesín Nuevo y Miranda recueye munchos d'estos cantares. Magar que nun se tenga afayao abondo sol percorrer "ocultu" del xéneru, pue creyese que, como'l flamencu n'Andalucía, la tonada asitiase nel mesmu raigón hestóricu del pueblu. La tonada, per ende, amuesa daqué del folclor, d'esi "espíritu del pueblu" (Volksgeist) que estudiaren dellos filósofos del Romanticismu.

La tonada asturiana moderna naz del alcuentru ente los compositores del Nacionalismu Musical Asturianu, movimientu musical que se correspuende con otros asemeyaos n'Europa y América, y les voces tradicionales dela dómina.

Tres del ésitu algamáu a finales del sieglu XIX y primeros del XX por Ramón García Tuero, El Gaiteru Llibardón, una llarga serie de voces empiecen a adquirir nome. Diez ye'l númberu de voces daquellos primeros años de sieglu XX qu'algamaron la consideración de clásicos. Diez voces que nacieron nel escasu intervalu de tiempu de doce años y que, del mayor al más pequeñu, fueron: Ángel González Rodríguez, El Maragatu; José Menéndez Carreño, Cuchichi; José María Martínez Suárez, Botón; Enrique Claverol Estrada, Claverol; Enrique Cienfuegos Martínez, Quin el Pescador; Santos Luciano Sánchez Muñiz, Santos Bandera; Obdulia Álvarez Díaz, La Busdonga; Vicente Miranda Rodríguez, Miranda; Prudencio Merino Álvarez, El Polenchu de Grao; y Joaquín Martínez González, Xuacu'l de Sama.

A estes diez voces, a lo llargo del sieglu y hasta los nuestros díes fueron amestándose les d'otra llarga serie d'elles que siguen formando parte de la memoria collectiva de la música asturiana: José Santos, Pepe'l Pantuxu de Sama; Laureano Menéndez González, Lauro; Manuel Alonso Díaz, El Panaderu; Juan Menéndez Muñiz, Juanín de Mieres; Josefina Fernández; Leonides Fernández; Diamantina Rodríguez; Luís Rodríguez García, El Ruiseñor de Carreño; José Ramón Morán Huergo, Morán; José Requejo Castañón, Pepe Requejo; Silvino Argüelles; José Noriega; Enrique García Palicio, L'Abogáu... y un llargu etcétera, hasta llegar a los nuestros díes nos que siguen siendo grandes voces les d'un bon númberu de cantadores como los ganadores de les últimes ediciones del Memorial "Silvino Argüelles", el premiu más prestixosu de la tonada moderna: José Manuel Collado, José García González (El Che de Cabaños), Ismael Tomás Montes, Jorge Tuya, Sergio Agüeros, Liliana Castañón, Mariluz Cristóbal Caunedo, Rosario González, Ángeles González, Anabel Santiago, Bibiana Sánchez, María Sánchez Blanco, Urbano Prieto, Rogelio Suárez, Jeremías Cuello, Laudelina Hortal, José Manuel Robledo (Lolo'l de Cabranes) o Marisa Valle Roso.

Territoriu[editar | editar la fonte]

Nel llibru La Tonada, los estudiosos Xaime Gabriel ya Ismael González Arias cuiden que, nel tarrén musical, nun pue falase d'Asturies como d'un conceutu claru, nin pue acutase'l xéneru de la tonada a les llendes d'anguañu, al tar el xéneru espardíu hestóricamente pelos territorios de lo que dellos estudiosos nomen dominiu llingüísticu astur (Asturies, Llión y Zamora; delles fasteres de Salamanca, Cantabria, Portugal y Estremadura).

Ye perinteresante mentar que, nel tiempu que tuvo viaxando per España col grupu teatral La Barraca, el poeta Federico García Lorca, estudiosu del folclor, recoyó tamién cantares populares d'Asturies y, na so célebre conferencia, "Les añaes infantiles", amuesa el influxu que los cantares pa nenos n'Asturies ("añaes") y Galicia tuvieran nel folclor andaluz.

El mesmu xeitu s'alcuentra nesti testu del escritor asturianu Xuan Bello, espublizáu nel llibru Cómo facer l'Habana ensin salir d'Asturies; les carauterístiques que Bello atopa na tonada malapenes s'estremen de les qu'amuesen otres músiques populares, como'l flamencu: "L’asturianu canta con egoísmu de fonte. Al contrariu d’otros pueblos, más afechos a los cantares colectivos, la tonada naz solitaria y con vocación d’individualizase, de permanecer inmutable nuna armónica combinación de matices vocálicos y tonales. L’asturianu que canta tonada, nel chigre o de vuelta a casa, tien una conciencia, instintiva pero plena, d’esos versos de Salvatore Quasimodo que traduzo pa esta ocasión: Cadún ta solu en mediu de la tierra / trespasáu por un rayu de sol. // Y, de súpeto, escurez. La voz del que canta, yá digo que con egoísmu de fonte, remanez pura espalmando nel aire -solo en mitá de la tierra- y el que canta sábese poseedor d’un momentu de gracia, como si supiere qu’efectivamente, nesi momentu, ta trespasáu por un rayu de sol y pudiera mover el mundu. La tonada sigue arreyada al corazón de los asturianos: ye la so voz".

Enllaces esternos[editar | editar la fonte]