Anabel Santiago

Anabel Santiago
conceyal del Conceyu d'Uviéu xunu 2019 - 14 agostu 2020
Vida
Nacimientu	Buenos Aires, 18 de xunu de 1981 (42 años)
Nacionalidá	España Arxentina
Estudios
Llingües falaes	castellanu asturianu
Oficiu	cantante, política
Miembru de	Conseyu Asesor de Política Llingüística
Xéneru artísticu	tonada asturiana
Instrumentu musical	voz
anabelsantiago.com

Anabel Santiago Sánchez (18 de xunu de 1981, Buenos Aires) ye una cantante de tonada asturiana. Entamó a cantar tonada asturiana a la edá de trece años. Ye anguaño la cantadora de tonada con mayor proyeición d'Asturies. Fue nomada Meyor Voz Asturiana del Memorial Silvino Argüelles nes ediciones 2003, 2004, 2005 y 2006.

Nel barriu de La Corredoria d'Uviéu hai una urbanización de cais dedicaes a les grandes estrelles del folclor y la música tradicional asturiana de tolos tiempos. Naturalmente, la mayoría de los nomes ilustraos son d'artistes yá fallecíos o bien avanzaos d'años. La esceición ye Anabel Santiago, que con namás 19 años contó cola so propia cai, por mor d'una llarga retafila de gallardones, premios, collaboraciones, xires y grabaciones que vien realizando dende los 12 años.

Emprimando en 1995, gana en bien d'ocasiones los concursos más importantes de la tonada asturiana: Concursu Ciudá d'Uviéu, Concursu de La Nueva, Concursu d'El Comercio de Xixón, Concursu d'Amieva, Concursu de Tonada d'Avilés, Concursu Cuenca del Caudal… y ye contratada pol Gobiernu del Principáu d'Asturies p'actuar n'Europa y Llatinoamérica –Bruxeles, Xinebra, Lausana, Buenos Aires, Cuba…-.

En 1996, realiza les sos primeres grabaciones xunto a otros campeones de la tonada. Anicia a facese notar en festivales de folk como Lorient o Folk Segovia. Participa nun curtiu cinematográficu, La neña de los mios güeyos, en 1999. En 2000 realiza una importante collaboración con Dixebra, nuna esitosa grabación, Glaya un país. Nel 2001 edita'l so primer trabayu, en clave tradicional, titulada Tierra de sueños.

Nel 2003, Anabel Santiago edita'l so segundu discu, Al son de la lluna, que supón una revolución dientro del mundu de la tonada y del cantu asturianu. La inquietú que siempre amuesa l'artista yá ye una realidá plasmada en temes de gran belleza, talos como “A la mar vanse los ríos”, “Cantar del home solu” o “Amor quién te tuviera”… Collabora nel mesmu añu na nueva grabación del multiinstrumentista y productor Tino de Giraldo.

Nesta dómina conoz a Michael Lee Wolfe, músicu y productor americanu afincáu n'Asturies, col qu'entama una collaboración qu'inclúi diversos proyeutos. A parte de les sos actuaciones xunto a l'Asturiana Mining Company, Anabel Santiago ye llamada pola Compañía Asturiana d'Espectáculos pa ser la voz principal de los nuevos proyeutos, como Nel Camín o Torner, o la so destacada collaboración na estrena de la obra Camín a Xixón, na Plaza Mayor de Xixón. En 2004 realiza una xira per Venezuela xunto a Alberto Varillas y el grupu Ástura.

Xunto al citáu cantante y gaiteru Alberto Varillas, Anabel Santiago ye la estrella del nuevu espectáculu Torner, cola producción musical d'Ismael González Arias, que s'estrena'l 26 de febreru de 2005 nel Conservatoriu Superior “Eduardo Martínez Torner” d'Uviéu, un espectáculu col que va dir de xira per Asturies a lo llargo de tol añu.

A finales del añu 2005 sal en CD el so trabayu Anabel Santiago canta a Diamantina Rodríguez, dedicáu a la figura femenina más importante de la música asturiana, Diamantina Rodríguez, y que ye'l primeru qu'algama una distribución per tol territoriu español, de la mano de Galileo MC.

Nel CD Música de Mujer, edición exclusiva de la La Fábrica de Ideas y FNAC, incluyóse'l so tema "Esi pandeiru que toco", del CD Anabel Santiago canta a Diamantina Rodríguez, y nel CD Nuestra diversidad cultural, editáu pola FNAC, La Fábrica de Ideas y Radio 3, abrióse col so tema "El galán d'esta villa", orixinal d'Ismael González Arias.

Nel añu 2010 publica'l trabayu tituláu Agora que ye producíu por Héctor Braga.

La última grabación d'Anabel tien llugar nel añu 2015, trátase de Llances de papel, que contién cantares populares asturianos, tangos y otros sobre lletres de José Luis Remis y música de Xulio Arbesú. Nel discu améstense l' indi pop y la tonada en dellos cantares, mientres qu'otros son más marcadamente folk.

Discografía

• “Tierra de Sueños” (Sociedad Fonográfica Asturiana, 2001), dedicáu al repertoriu de tonada tradicional clásica.
• “Al son de la lluna” (L’aguañaz, 2003), nel que estrénase como compositora y apuesta por una temática más moderna.
• “Anabel Santiago canta a Diamantina Rodríguez” (Males Pulgues, 2005), nel que-y rinde homenaxe a la voz más importante e innovadora de la canción asturiana del últimu mediu sieglu.
• “Torner” (Ámbitu, 2006) Discu recopilatoriu del Cancioneru de la Lírica Asturiana de Martínez Torner.
• “Desnuda” (Galileo MC, 2007), un nuevu acercamientu de la voz de tonada a la música popular moderna con temes versionaos maxistralmente.
• “Agora” (Autoproducción, 2010), el discu de consolidación de la artista, onde amuesa la so versatilidá como cantante, productora, compositora… y algama la madurez artística en tornu a la fusión del xéneru.
• “Cola lluz de la alborada” (Algamar, 2012) discu conxuntu con Héctor Braga.
• “Llances de Papel” (Santo Grial, 2015)- Álbum de música y poesía, fusión de estilos como'l tangu, pop, indie, folk…
• “Y_andá” (Rock Cd, 2018)- Álbum de mestizaxe de música electrónica y canciones ibériques, gallegues y asturianes.

Premios

• “Urogallo de Bronce” concedíu pol Centru Asturianu de Madrí.
• “Casina del añu” otorgáu pol Excmu. Aytu de Casu.
• “Cai Anabel Santiago Sánchez” otorgá pol Excmu. Aytu d’ Uvieu ena Corredoria.
• “Meyor cantante de tonada del añu” con trofeu Silvino Argüelles (2003 al 2019).
• “Trisquel Dixital” concedíu pol Conceyu pola Normalización de la llingua asturiana pola tonada “Añada amorosa”.
• “Premio AMAS” a meyor canción folk por “Les coses simples” y a meyor discu folk por “Desnuda”.(año 2009)
• Premiu "Mención de antañu" concedíu pola Asociación Santa Apolonia de Valdesoto pola so llabor de difusión de la cultura tradicional en colexios e institutos .(2010)
• “Premiu AMAS”  a la meyor voz pol so discu “AGORA” (añu 2011).
• “Premiu Nacional de la música” otorgáu pola academia de les artes pola meyor canción en llingua asturiana col tema “AGORA” añu 2011.
• “Premiu al meyor cantar en llingua asturiana”(2016)
• otorgáu pola Conseyería de Educación y Política Llingüística del Principáu d’Asturies.
• “Premiu lliterariu de microrellatos” otorgáu por la Federación Socialista Asturiana nel añu 2021.

Otros trabayos / Cine / Televisión

Durante la so trayectoria artística surgen diverses collaboraciones y comparte escenariu y conciertos con grupos y músicos diversos:

• Dixebra, Cristina del Valle, Victor Manuel, Manu Chao ,Uxía Pedreira, La Colla Propinde, Rodrigo Cuevas, Paloma Berganza, Los Berrones ,Tino di Geraldo, Ástura, La Chicana Tango, Ñaco Goñi, Dark la Eme, etc.

Amás fixo colaboraciones col séptimu arte, en cortos y largometraxes cinematográficos rodaos n’ Asturies como:

• Cortu   “La neña los mios güeyos” del director Carlos Navarro.
• Cortu  “Suena el camín” editáu pol Centru de Empreses ValNalón.
• Largometraxe  “Cenizas del Cielo” del director José Antonio Quirós,
• como voz protagonista ena banda sonora orixinal compuesta por
• Ramón Prada. Estrénase n’ Asturies a lo llargu del mes de payares de 2008.
• Serie pa Tpa “Aquí, mi paraíso” del director Jose Antonio Quirós. Papel secundariu. 2014.
• Banda sonora de la película “Bailandia” de Xulio Arbesú col tema “La Lloca”. 2015.
• Presentadora del programa pa neños de TPA “Fálame” qu’entamó a emitise en 2017 (Médula Producciones)
• B.S.O de la película “Los labios apretados” de Sergio Montero cola canción “La lloca” , estrenada en FICX de XiXón 2017.
• B.S.O de la película “El Último invierno” col tema “Negra Sombra” ,película dirixía por Julio de la Fuente, 2018.
• Colaboración xunto colos escolinos de canción tradicional na película documental “In Memoriam” del director Marcos Merino, 2018.
• Presentadora del programa“De puertas pa dentro” ( asoleyáu online y nel so canal propiu de Youtube a lo llargo del confinamientu ente los meses de marzu y mayu de 2020 con 32 entrevistes a personaxes y celebridaes de la cultura, el deporte y la ciencia)

Espectáculos

• Volver al tango (Obra teatral y musical alrodiu del tango)
• Asturiana Universal ( Obra teatral y musical col músicu Xulio Arbesú)
• De Xuru (Obra de teatro musical con Mari Luz Cristóbal)
• Visites teatralizaes al teatro Campoamor ”Vamos pal campo, amor” de Enrique Viana.(2014-15)
• Xata la Rifa en Ascensión
• Foriata (Cola bailarina Dana Raz). Espectáculu de danza contemporánea y música tradicional.
• Desfile del día de América n’ Asturies-añu 2013/ 2014/ 2018 Asturias/Arxentina/México.

Docencia

Amás de la so llabor de búsqueda de nuevos soníos pa la canción asturiana, dende’l añu 2009 fasta l’actualidá desempeña llabores como docente na Escuela de Música Tradicional d’ Uviéu ena modalidá de cantu tradicional y tonada asturiana.

Nel añu 2017-2018 pasa a formar parte del grupu docente perteneciente a la ESCUELA DE ASTURIANÍA, dientro del proyeutu de la Conseyería de Educación y Cultura del Principáu d’Asturies, pa la enseñanza del folclor tradicional a escolinos/as de centros asturianos del mundiu.

Enllaces esternos

• Páxina web oficial

• Datos: Q13146712