Sonny Chiba

De Uiquipedia
Saltar a: navegación, buscar
Sonny Chiba
Sonny Chiba.jpg
Sonny Chiba en marzu de 2007
Otros nomes Shinichi Chiba, J.J. Sonny Chiba, Rindo Wachinaga

Sonny Chiba ye’l nome artísticu pol que más se conoz al actor y artista marcial xaponés Shinichi Chiba (千葉 真一, Chiba Shin'ichi), nacíu’l 23 de xineru de 1939). Chiba foi ún de los primeros actores n’algamar l’estrellalgu per aciu de les sos habilidaes nes artes marciales, primero en Xapón y más tarde énte una audiencia internacional, sobre too dempués del so papel nel filme Kill Bill, dirixíu por Quentin Tarantino.

Biografía[editar | editar la fonte]

Mocedá[editar | editar la fonte]

En realidá’l nome de nacimientu de Chiba ye Sadaho Maeda (前田 禎穂, Maeda Sadaho). Nacíu en Fukuoka, Xapón, ye’l terceru de los seis fíos d’un pilotu militar de pruebes. De neñu, Chiba manifestó interés pol teatru y la ximnasia, ésta tan en serio que ganó una plaza nel equipu olímpicu xaponés al final de la so adolescencia, hasta que lu xebró una mancadura nel llombu.

Siendo estudiante universitariu, empecipió a estudiar artes marciales col renomáu maestru de kárate Kyokushinkai Masutatsu Oyama (al que más tarde diba retratar nuna triloxía de películes), que lu entrenó hasta sacar el primer grau de cintu negru el 15 d’ochobre de 1965. Aportó a recibir el cuarto grau’l 20 de xineru de 1984.

Carrera[editar | editar la fonte]

Contra 1960 descubriéronlu nuna busca de talentos llamada "Cares Nueves" de los Estudios Toei, y llueu empezó la so carrera na pantalla como Shinichi Chiba. Fíxolo na televisión, como protagonista en dos series de superhéroes tokusatsu, primero reemplazando a Susumu Wajima como’l personaxe principal Kotarô Ran/7-Color Mask en 7-Color Mask (Nana-iro kamen) na segunda entrega de la serie, y dempués como Gorō Narumu/El Mensaxeru d’Alá n' El Mensaxeru d’Alá (Allah no Shisha). El so debú y primer papel protagonista nel cine foi na película de ciencia ficción de 1961 Invasion of the Neptune Men. Esi mesmu añu tamién apaeció nel primer filme de Kinji Fukasaku Wandering Detective: Tragedy in Red Valley, que marcó l’entamu d’una restrayada de collaboraciones ente los dos. Na década siguiente coyéronlu más que nada pa películes de crime y misteriu. Adoptó’l nome ingles de Sonny Chiba principalmente pola so asociación con una campaña de publicidá de Toyota qu’anunciaba un modelu llamáu Sunny-S.

Pa 1970 ya entamara la so propia escuela d’entrenamientu p’actores aspirantes a películes d’artes marciales, conocida como J.A.C (Japan Action Club), y en 1973, nel riscar de la moda internacional de les películes de Bruce Lee, Chiba volvió a les pantalles como actor. L’ésitu que supunxo’l reblagu internacional de Chiba foi The Street Fighter (1974), que lu upó como l’actor xaponés d’artes marciales que diba dominar la cinematografía internacional les siguientes dos décades.

Los sos siguientes proyeutos incluyeron películes como Bullet Train (1975), Karate Warriors (1976), Doberman Cop (1977), y The Assassin (1977). De xemes en cuando volvió tamién al xéneru de ciencia ficción, en películes como Message From Space (1978). Inda tuvo más ocupáu nos años 1980, cuando fixo docenes de películes de cine ya incursiones na televisión, con papeles n’aventures de sonadía como la popular película basada nel cómic de Hong Kong: The Storm Riders (1998), protagonizada xuntamente con Ekin Cheng y Aaron Kwok. La so nomadía en Xapón siguió ensin amenorgar hasta los años 1990.

Con más de cincuenta años l’actor tornó a trabayar baxo’l nome de Shinichi Chiba cuando lo facía como coreógrafu de secuencies d’artes marciales. Al riscar el sieglu XXI, Chiba tuvo más ocupáu que nunca en papeles secundarios asina como protagonizando la so propia serie en Xapón. Papeles en Deadly Outlaw: Rekka, de Takashi Miike, y en Battle Royale II, de los direutores Kenta y Kinji Fukasaku, realmente foron pontes ente les lleendes cinematográfiques de cultu d’anguaño y de les dómines pasaes. La perllarga carrera na pantalla de Chiba recibió un homenaxe al apaecer nel importante papel de Hattori Hanzo, el dueñu d’un restaurante de sushi y artesanu retiráu d’espades samurái, na sangrina epopeya de venganza Kill Bill, del direutor Quentin Tarantino, en 2003.

Sonny Chiba protagonizó más de 125 películes de los Estudios Toei, y ganó mui bien de premios en Xapón poles sos actuaciones. En payares de 2007 anunció la retirada del nome artísticu Shinichi Chiba y que pretendía que lu conocieren en Xapón como J.J. Sonny Chiba como actor, y como Rindo Wachinaga como direutor.[1]

Vida personal[editar | editar la fonte]

Actualmente Sonny Chiba vive en Yokohama, Xapón. Ta divorciáu de la so primer muyer, Yoko Nogiwa, cola que tuvo una fía, l’actriz Juri Manase. Casáu otra vuelta, tien otros dos fíos: l’actor infantil J.J. Jr. Mackenyu (Maeda Makkenyu), nacíu’l 16 de payares de 1996, y Gordon, nacíu en 1998.

Un hermanu más pequeñu de Chiba, Jiro Yabuki (tamién conocíu como Jiro Chiba), foi tamién actor, y vive güei cola so familia nel Xapón rural.

Sonny Chiba na cultura popular[editar | editar la fonte]

El personaxe de Christian Slater, Clarence Worley, na película Amor a Quemarropa ye un gran fan de Sonny Chiba. Nuna de les primeres secuencies ta viendo una sesión triple de Sonny Chiba. El guionista d'Amor a Quemarropa, Quentin Tarantino, trabayó con Chiba diez años dempués en Kill Bill.

El personaxe de Samuel L. Jackson na película Pulp Fiction recita un pasax falsamente atribuyíu a Ezequiel 25:17, que rezaba: "El camín del home reutu ta per dayures arrodiáu pola inxusticia de los egoístes y la tiranía de los malinos. Benditu seya’l pastor qu’en nome de la caridá y de la bona voluntá saque a los débiles del valle de la escuridá, porque él ye l’auténticu guardián del so hermanu y el descubridor de los neños perdíos. Y asegúrovos que voi venir a castigar con gran venganza y engafada ira a los que pretendan envelenar y destruyir a los mios hermanos. ¡Y tú vas saber que’l mio nome ye Yavé cuando caiga la mio venganza sobre ti!” Esti pasax usárase orixinalmente como cortina d’apertura na película de Sonny Chiba Karate Kiba (títulu n’inglés: The Bodyguard), camudando nel pasax anterior les pallabres: "...y van saber que yo soi Chiba’l Guardaespaldes..."[2]

Na secuencia introductoria del videoxuegu The Revenge of Shinobi, amuésenlu remanando una espada y protexéndose contra estrelles ninja.

Refiriéronse recién a Sonny Chiba na serie televisiva Chuck. Nel episodiu 'Chuck Versus the Other Guy,' el personaxe Morgan Grimes, fechu por Josh Gomez, decátase d’una secuencia fulera d’artes marciales, y usa’l so conocimientu de les películes de Sonny Chiba como prueba de que les engarradielles a morraes tán esaxeraes.

Finxos d’esperiencia nes artes marciales[editar | editar la fonte]

Chiba tien el cintu negru nes siguientes artes marciales:

Filmografía[editar | editar la fonte]

Referencies[editar | editar la fonte]

  1. "千葉真一「JJサニー」に改名!映画監督としては「和千永倫道」." Sankei Shimbun.
  2. Thomas, Brian. VideoHound's Dragon: Asian Action & Cult Flicks. Canton, Michigan: Visible Ink Press, 2003, pp. 61-2).

Enllaces esternos[editar | editar la fonte]