Doshin So

De Uiquipedia
Saltar a: navegación, buscar
Doshin So
Nome de nacencia: Michiomi Nakano (中野道臣)
Nomatu: Kaiso
Fecha de nacencia: 10 de febreru de 1911
Llugar de nacencia: Mimasaka, Okayama, Xapón
Fecha de defunción: 12 de mayu de 1980 (69 años)
Nacionalidá: xaponés
Conocíu por: Shorinji Kempo

Doshin So (宗道臣, 1911–1980) ye'l nome budista pol que se conoz a Nakano Michiomi. Foi’l creador y fundador del Shorinji Kempo, un arte marcial xaponés.

Siendo neñu, Doshin So (davezu llamáu “Kaiso”, qu’aproximao traduzse como “el fundador”) vivió na rexón china de Manchuria col so güelu, So Shigeto, que tenía'l rangu de "hanshi" en kendo y yera tamién espertu n'otres artes marciales xaponeses. Tres un pequeñu paréntesis en Xapón, Doshin So volvió a China, onde tuvo de mediaos de los años 1920 hasta la fin de la Segunda Guerra Mundial. Nesti últimu periodu prauticó artes marciales con dellos maestros mientres facía informes pa la intelixencia militar xaponesa. Daquella’l so primer maestru chino, Chen Liang, recomendólu a Wen Taizong, un gran maestru de “quan fa” (kempo), y convertióse tamién nel so alumnu. Dempués de dellos años el maestru Taizong llevólu al templu Shaolin y fíxolu 21u maestru del estilu Giwamonken de kempo.

En 1945, cuándo l'exércitu rusu entró en Manchuria, Doshin So quixo fuxir a Xapón cola ayuda de miembros de sociedaes secretes chines, pero foi finalmente repatriáu en 1946. L'estáu murniu de les coses nel Xapón de posguerra impresionólu cola necesidá de refacer la moralidá y l’arguyu nacional y de crear una imaxe humana dafechu nueva. Siguiendo la filosofía de Bodhidharma y la práutica del kempo como medios p’algamar estos fines, Doshin So revisó, espandió y sistematizó les munches formes de kempo qu’aprendiera en China, empezó a enseñar filosofía zen conxuntamente con esti arte marcial, y asina creó’l Shorinji Kempo qu’esiste güei.

A lo llargo de los años Doshin So foi formando les diverses organizaciones que dieron orixe a la Federación Xaponesa de Shorinji Kempo primero y a la Organización Mundial de Shorinji Kempo más p’arriba. Morrió’l 12 de mayu de 1980. De magar se fundara en Xapón, el Shorinji Kempo estendióse a 33 países distintos y prauticáronlu sobre 1,5 millones de miembros (llamaos "kenshi"). Anguaño’l Shorinji Kempo gobiérnanlu los antiguos alumnos de Kaiso y la so fía, Yuuki So.

Películes[editar | editar la fonte]

Doshin So foi interpretáu pol actor xaponés Sonny Chiba nel filme d’artes marciales Shorinji Kempo (1975), al que-y dieron n’inglés el títulu Killing Machine.


Enllaces esternos[editar | editar la fonte]