Sistema solar

De Uiquipedia
Saltar a: navegación, buscar
Uiquipedia:Wikipedia:Llista d'artículos que toa Wikipedia tien que tener/Archivu
Italian traffic signs - old - lavori in corso.svg

Artículu en desendolcu. Polo menos hai un wikipedista trabayando nel desendolcu d'esti artículu. Puen alcontrase errores y nun s'encamienta tenelu como referencia. Enantes de facer un cambéu bultable del artículu notifícalu nel alderique.


El Sistema Solar ye un grupu d'oxetos astronómicos que xiren nuna órbita, por efectu de la gravedá, alredor d'una estrella, el Sol, de la que provien el so nome. Esa estrella, que concentra'l 99,75% de la masa del mesmu[1], ye l'únicu de los oxetos qu'emite, al traviés de la combustión d'hidróxenu y su tresformación n'heliu pola fusión nuclear, lluz. D'ente los oxetos qu'orbiten directamente alredor del Sol los ocho mayores son los planetes que formen, xunto con elli, el sistema planetariu; el restu, de los qu'unos orbiten directamente alredor del Sol y otros alredor d'otru de los oxetos qu'orbiten alredor d'esa estrella, encuádrense notres categoríes: planetes nanos, cometes, asteroides y los nomaos oxetos pequeños del Sistema Solar (SSSBs, del inglés small Solar System bodies).[2]

Mosaicu de planetes del Sistema Solar.
Nota: El tamañu de los planetes ta a escala, pero les distancies ente ellos non.

El Sistema Solar formose fai 4.600 millones d'años como resultáu del colapsu gravitacional d'una nube molecular xigante. La gran mayoría de la masa del sistema ta nel Sol, y la restante mayormente en Xúpiter. Los cuatro planetas asitiaos ente estos dos oxetos, Mercuriu, Venus, Tierra y Marte, reciben el nome conxuntu de planetes terrestres y tán compuestos de roca y metales. Los cuatro planetes más esteriores, llamaos xigantes gaseosos, tienen una masa muncho mayor qu'ellos. Los dos mayores, Xúpiter y Saturnu, tán compuestos principalmente d'hidróxenu y heliu; los más esternos, Uranu y Neptunu, pela so banda, tán formaos principalemte de sustancies con puntos de fusión más altos, nomaos volátiles (ices), como l'agua, l'amoniacu y el metanu, y suele denomáse-yos xigantes xelaos. Tolos planetes tienen órbites cuasi circulares que se desarrollen dientru d'un planu conocíu como planu eclípticu.

Arriendes de los planetes, hai diverses fasteres del Sistema Solar ocupaes por otros oxetos más pequeños. Asina, ente Marte y Xúpiter asitiase'l cinturón d'asteroides, que contien milenta oxetos compuestos, como los planetes terrestres, de metal y roca. Más allá de la órbita de Neptunu, pela so banda, asítiase'l cinturón de Kuiper, asemeyáu n'estructura al cinturón d'asteroides pero venti veces mayor y con cuerpos formaos por volátiles (ices) xelaos, y el discu dispersu, nos qu'atopamos oxetos compuestos de volátiles que reciben el nome conxuntu d'oxetos tresneptunianos. Ente ellos hai munchos (ente varies docenes y diez mil[3]) cola suficiente masa como pa xenerar el so propiu campu gravitatoriu; son los nomaos planetes nanos. Ente ellos podemos destacar l'asteroide Ceres y los oxetos tresneptunianos Plutón y Eris. Alcuéntrense tamién otros conxuntos d'oxetos de pequeñu tamañu nel Sistema Solar que viaxen ente les distintes rexones del mesmu: cometes, centauros y polvu interplanetariu. El caberu grupu d'oxetos fórmenlo los satélites. Seis de los planetes, y polo menos trés de los planetes nanos y dellos oxetos menores tán orbitaos por satélites naturales, nomaos llunes. Los planetes esteriores, amás, tán arrodiaos tamién por anillos planetarios de povisa y otros oxetos menores.

El vientu solar, un fluxu de plasma solar, crea una burbuxa de vientu estelar nomada heliosfera, que s'estiende hasta más p'allá de la órbita de Plutón y que fina nel puntu conocíu como heliopausa, que ye aú s'igualen la presión que provoca'l vientu solar nel interior d'esa burbuxa y la presión en sentíu contrariu del vientu interestelar. La nomada nube d'Oort, na que se cree que s'orixinaron los cometes d'intervalu llargu, ye una nube esférica de planetesimales xelaos asitiada a una distancia al Sol mil vegaes mayor que l'alcance de la heliosfera.

El Sistema Solar asítiase na Burbuxa Llocal del brazu d'Orión, a unos 26.000 años lluz del centru de la Vía Lláctea.

Descubrimientu y esploración[editar | editar la fonte]

Demientres munchos milenios la humanidá, con perpoques esceiciones, nun reconoció la esistencia del Sistema Solar. Creyíase que la Tierra yera un astru estacionariu asitiáu nel centru l'Universu y categóricamente diferente de los cuerpos divinos o etéreos que se movíen pel cielu. Magar qu'el filósofu griegu Aristarcu de Samos especulara cola posibilidá de que l'Universu fora heliocéntricu, esto ye, que la Tierra y otros astros orbitaran alredor del Sol, qu'había ser el centru l'Universu, nun hebo un modelu matemáticu que sofitara esta idea hasta la llegada de Nicolás Copernico. Nel sieglu XVII Galileo Galilei, Johannes Kepler ya Isaac Newton profundizaron los conocimientos de Física, y les nueves evidencies foron llevando a l'aceptación gradual de la idea de que la Tierra muévese alredor del Sol y de que los planetes gobiérnense peles mesmes lleis físiques que rixen pa la Tierra.

La invención del telescopiu permitió descubrir otros planetes y satélites, y el so ameyoramientu, xunta col entamu de la esploración espacial con naves non tripulaes permitió descubrir y investigar los fenómenos xeolóxicos (cordeleres, cráteres) y metereolóxicos (nubes, tormentes de povisa, casquetes xelaos) que se producen na superficie de los otros planetes del Sistema Solar.

Estructura y composición[editar | editar la fonte]

El principal componente del Sistema Solar ye'l Sol, una estrella enana mariella que contién el 99,86% de la masa del sistema y lu domina gravitacionalmente[4]. Los cuatro mayores cuerpos qu'orbiten alredor d'elli, los xigantes gaseosos (Xúpiter, Saturnu, Uranu y Neptunu), contienen el 99% de la masa restante (el 90% ente Xúpiter y Saturnu).

La mayoría de los oxetos qu'orbiten alrededor del Sol fáinlo nun planu asemeyáu al de la órbita terrestre, conocíu como planu eclípticu. Magar que los planetes avérense a elli, los cometes y los oxetos del cinturón de Kuiper, tienen unes órbites que suelen formar ángulos grandes cola eclíptica[5]. Tolos planetes, y la mayoría de los demás oxetos del sistema, orbiten el Sol na mesma dirección na que rota esti, nel sentíu contrariu al movimientu de les aguyes d'un reló cuando s'observa dende'l Polu Norte de la Tierra). Hai, sicasí, esceiciones, siendo la más nomada el cometa Halley.

Les órbites de los oxetos del Sistema Solar a escala (ver nel sentíu de les aguyes del reló entamando pola imaxe superior izquierda).

La estructura xeneral de les rexones esploraes del Sistema Solar consiste nel Sol, arrodiáu por cuatro planetes interiores relativamente pequeños, arrodiaos a la so vez por un cinturón d'asteroides rocosos. Esteriormente a ellos orbiten los cuatro xigantes xelaos, arrodiaos pol cinturón de Kuiper. Tradicionalmente los astrónomos dividíen el Sistema Solar en dos rexones: el Sistema Solar interior, qu'incluyía los cuatro planetes terrestres y el cinturón d'asteroides; y el esterior, qu'incluyía los demás oxetos espaciales orbitantes[6]. Sicasí, dende'l descubrimientu del cinturón de Kuyper les partes más esteriores del Sistema Solar son consideraes una rexón estremada, que ta formada por tolos oxetos asitiaos más llonxe del Sol que Neptunu.

La mayoría de los planetes del Sistema tienen sistemes secundarios, una y bones son orbitaos por oxetos planetarios nomaos satélites naturales o llunes (habiendo dos que son de mayor tamañu qu'el planeta Mercuriu) y, nel casu de los cuatro xigantes gaseosos, por anillos planetarios, bandes estrenches de partícules perpequeñes qu'orbiten a esos planetes al unísonu. La mayoría de los satélites tienen una rotación sincrónica col so planeta, al que-y amuesen siempres la mesma cara.

Les lleis de Kepler del movimientu planetariu describen la órbita de los oxetos alredor del Sol. Acordies con ella, cada oxetu viaxa a lo llargu d'una elipse, col Sol asitiáu nún de los focos de la mesma. Los oxetos más cercanos al Sol, con exes semimayores más pequeños, viaxen más deprisa porque vense más afectaos pola gravedá del Sol. Nuna órbita elíptica la distancia d'un cuerpu al Sol varía nos distintos momentos del ciclu orbitariu. El puntu de la órbita nel qu'el planeta ta más averáu al Sol nómase periheliu, y nel que ta más alloñáu nómase afeliu. Les órbites de los planetes son cuasi circulares, pero munchos cometes, asteroides y oxetos del cinturón de Kuiper siguen órbites mui acusadamente elíptiques. La posición de los cuerpos del Sistema Solar a lo llargo del tiempu pueden predecise usando modelos numéricos.

Magar qu'el Sol domina'l sistema por masa, sólo-y correspuende a elli el 2% del momentu angular (medida de la cantidá de rotación que tien un oxetu que tien en cuenta la so masa, la so forma y la so velocidá) debido a la rotación diferencial dientro de la estructura gaseosa del Sol. Los planetas, y especialmente Xúpiter, tienen la mayoría del resto del momentu angular como resultáu d'una combinación de la so masa, la so órbita y la so distancia al Sol, y piénsase que los cometes fain tamién una contribución significativa a esti momentu[7].

Simulación en 3D de la rotación de los planetes terrestres (Mercuriu, Venus, Tierra y Marte) alredor del Sol. Toos lo fain nun planu mui asemeyáu, el planu eclípticu.
Esta simulación incorpora los planos de rotación de Xúpiter, Uranu y Neptunu.

El Sol, que compriende la grandísima mayoría de tola materia del Sistema Solar, ta formáu nún 98% por hidróxenu y heliu[8]. Xúpiter y Saturnu, que tienen en conxuntu cuasi tola materia restante, tienen atmósferes formaes nún 99% por esos mesmos elementos[9][10]. Nel Sistema Solar hai un gradiente de composición, creáu pola presión del calor y la lluz qu'emite el Sol. Los oxetos más averaos al Sol, más afectaos por esa presión, tán formaos por elementos con altos puntos de fusión, mentantu que los más alloñaos tán formaos principalmente por materiales con puntos de fusión más baxos. El puntu del Sistema Solar más allá del cuálu eses sustancies volátiles pueden condensase pa formar oxetos conozse como llínia de conxelación, y asítiase a una distancia aproximao de 5 unidaes astronómiques del Sol[11].

Los oxetos del Sistema Solar interior tán compuestos principalmente por roca[12], que ye'l nome que se-y da al conxuntu de componentes con puntos de fusión altos (silicatos, fierru, níquel...) que caltuvieron l'estáu sólidu na protonebulosa planetaria. Xúpiter y Saturnu, pela so banda, tán compuestos sobre too por gases, que son el nome que reciben n'astronomía los materiales con puntos de fusión perbaxos y presión de vapor alta (hidróxenu, heliu, neón...), que taben n'estáu gaseosu na protonebulosa. Los volátiles, como l'agua, el metanu, l'amoniacu, el sulfuru d'hidróxenu y el dióxidu de carbonu, tienen puntos de fusión de varios cientos de graos Kelvin; pueden apaecer n'estáu sólidu, líquidu o gaseosu en distintos llugares del Sistema Solar, y na protonebulosa podíen alcontrase n'estáu sólidu o gaseosu[13]. Los volátiles dominen la composición de la mayoría de los satélites de los planetes xigantes, amás de la de Uranu y Neptunu (nomaos por eso xigantes xelaos) y de la de numberosos de los pequeños oxetos que s'afayen más allá de la órbita de Neptunu.

Los planetes del Sistema Solar a escala. D'arriba abaxu y d'izquierda a derecha: Xúpiter y Saturnu, Uranu y Neptunu, la Tierra y Venus, y Marte y Mercuriu.

Distancies y escales[editar | editar la fonte]

La distancia de la Tierra al Sol ye d'una unidá astronómica (aprosimadamente 150.000.000 kilómetros). En comparanza, el radiu del Sol ye de 0,0047 unidaes astronómiques (AU). Asina, el Sol ocupa'l 0,000001% (10−5) del volume d'una esfera de radiu igual al tamañu de la órbita de la Tierra, mentantu qu'el volume de la Tierra ye una millonésima parte del del Sol. Xúpiter, el mayor de los planetes, asítiase a 5,2 AU (780 millones de km) del Sol, y tien un radiu de 71.000 km (0,00047 AU). El planeta más alloñáu del Sol, Neptunu, atópase a 30 AU (4.5×109 km) d'elli.

Como norma xeneral, cuantes más llonxe ta un planeta o cinturón del Sol, mayor ye la distancia ente la so órbita y la órbita del oxetu más cercanu a elli. Asina, Venus ta unes 0,33 AU más llonxe del Sol que Mercuriu, mentantu que Saturnu ta a 4,3 AU de distancia de Xúpiter y Neptunu a 10,5 AU d'Uranus. Hebo intentos de determinar matemáticamente una rellación ente eses distancies orbitales, como la llei de Titius-Bode, pero entá dengún foi aceptáu unánimemente pola comunidá científica.

Notes y referencies[editar | editar la fonte]

  1. Hamilton, Calvin. El Sistema Solar (2000)
  2. Acordies coles definiciones actuales de la Unión Astronómica Internacional los oxetos qu'orbiten alredor del Sol clasifíquense dinámica y físicamente en trés categoríes: planetes, planetes nanos, y oxetos pequeños del Sistema Solar.
    - Un planeta ye un cuerpu qu'orbita alredor del Sol y que tien suficiente masa pa que la gravedá-y diera una forma esférica o cuasiesférica y caltuviera la so rodiada llibre d'otros oxetos. Según esta definición Plutón, que tien otros oxetos del cinturón de Kuiper averaos a elli, nun entra nesta categoría.
    - Plutón ye un planeta nanu, esto ye, un oxetu qu'orbita al Sol, nun ye un satélite y tien suficiente masa como pa tener forma esférica o cuasiesférica pero tien a la so vera oxetos planetesimales. Amás d'elli, entren nesta categoría Ceres, Haumea, Makemake y Eris. Otros oxetos son consideraos talos, magar que nun lo seyan inda oficialmente: 2007 OR10, Sedna, Orcus y Quaoar. En delles publicaciones llámase-yos a los planetas nanos de la rexón tresneptuniana plutoides.
    - El restu los oxetos del Sistema Solar encuádrense na categoría d'oxetos pequeños del Sistema Solar.
  3. Stern, Alan. The Kuiper Belt at 20: Paradigm Changes in Our Knowledge of the Solar System (n'inglés)
  4. Woolfson, M (2000). The origin and evolution of the solar system. Astronomy & Geophysics 41 (1): 1.12.
  5. Levison, Harold. F. y Duncan, Martin J. (1997). From the Kuiper Belt to Jupiter-Family Comets: The Spatial Distribution of Ecliptic Comets. Icarus 127 (1): 13–32. Abstract disponible equí [1]
  6. Estructura del Sistema Solar na web nineplanets.org (n'inglés)
  7. Shostak, G. S. Progress in the Search for Extraterrestrial Life. Astronomical Society of the Pacific Conference Series 74. p. 83.
  8. The Sun's vital statistics (n'inglés)
  9. Júpiter Fact Sheet (n'inglés)
  10. Saturn Fact Sheet (n'inglés)
  11. Mumma, M. J.; Disanti, M. A.; Dello Russo, N.; Magee-Sauer, K.; Gibb, E.; Novak, R. (2003). Remote infrared observations of parent volatiles in comets: A window on the early solar system. Advances in Space Research 31 (12): 2563.
  12. Podolak, M.; Weizman, A.; Marley, M. (1995). Comparative models of Uranus and Neptune. Planetary and Space Science 43 (12): 1517–1522.
  13. Podolak, M.; Podolak, J. I.; Marley, M. S. (2000). Further investigations of random models of Uranus and Neptune. Planetary and Space Science 48 (2–3): 143–151.

Enllaces esternos[editar | editar la fonte]


Sistema Solar
Solar System XXVII.png
Estrella: Sol
Planetes: Mercuriu | Venus | Tierra | Marte | Xúpiter | Saturnu | Uranu | Neptunu
Planetes nanos: Ceres | Plutón | Eris
Oxetos menores: Asteroides | Centauros | Oxetos tresneptunianos | Cometes | Meteoroides
Otros: Lluna | Io | Europa | Ganimedes | Calistu | Titán | Tritón | Cinturón de Kuiper | Nube d'Oort | Fobos | Deimos | Satélites de Xúpiter | Satélites de Saturnu | Satélites d'Uranu | Satélites de Neptunu | Caronte