Nuuk

De Uiquipedia
Saltar a: navegación, buscar
Vista aérea de Nuuk

Nuuk o Nûk (en groenlandés El cabu), conocida fasta 1979 como Godthåb (en danés Bona Esperanza) ye la capital y principal ciudá del territoriu autónomu danés de Groenlandia. Alcuéntrase a 64º 10' de llatitú norte, y 51º 43' de llonxitú oeste, 240 km al sur del Círculu Polar Árticu, y a 485 km al noroeste del Qaqortoq. Asítiase na boca sur d'un grupu de fiordos nomaos Godthåbsfjorden, con una población de 14.501 habitantes (xineru de 2005), un cuartu de la población total de Groenlandia.

La costa sudoeste de Groenlandia foi poblada por colonos vikingos que veníen d'Islandia y Noruega dirixíos por Erik el Roxu nos caberos años del sieglu X. Tres dellos sieglos d'ocupación, la comunidá vikinga esapareció alrodiu del sieglu XV, sustituyida polos inuit que veníen del norte de la islla.

Nuuk foi fundada col nome de Godthåb el 29 d'agostu de 1728 pol misioneru noruegu Hans Egede, tres del fracasáu establecimientu, siete años enantes (1721), d'un asitiamientu na cercana islla de Håbets Ø (Islla de la Esperanza). Con ello inicióse la colonización del territoriu (baxo la corona noruegu-danesa), que nos sos primeros años foi adversa abondo: en 1733-1734 un pequeño andanciu acabó cola mayoría de la población inuit, y cola esposa del propiu Egede, que tornó pa Noruega poco tiempu dempués. Los sos fíos continuaron el so llabor evanxélicu en Groenlandia. Nel puertu antiguu de Nuuk entá s'ergue anguaño la casa d'Egede.

Los sos habitantes d'orixe danés entá suelen nomala Godthåb, anque dende 1979 el nome groenlandés, Nuuk, ye'l nome oficial de la ciudá. Ye la see del gobiernu de la comuna de Nuuk, qu'ocupa 100.000 km² de la islla.

Nuuk dispuén d'una emisora de radio, un hespital, una universidá (la Universidá de Groenlandia, Ilisimatusarfik), un aeropuertu (Nuuk Airport) onde opera Air Greenland, y delles instalaciones d'investigación científico. La piesca, el procesáu del pescáu, la caza y la cría de renos y de ganáu ovino son les principales actividaes económiques de la ciudá.