Mar Negru

De Uiquipedia
Saltar a: navegación, buscar
Uiquipedia:Llista d'artículos que toa Wikipedia tien que tener
Llocalización del Mar Negru
Mapa d'el Mar Negru
Aspeutu d'el Mar Negru na costa búlgara

El Mar Negru o Mar Prietu (en búlgaru: Черно море, Cherno more; en rumanu Marea Neagră; nomáu tamién polos griegos, na Antigüedá, Ponto Euxino) ye un mar interior que separta Europa oriental d'Asia occidental. Ta llendáu pol sureste d'Europa, el Cáucasu y la península turca d'Anatolia, y comunica col mar Mediterraneu y el mar Exéu con dellos estrechos. El del Bósforo lu conecta col mar de Mármara, antoxana del mar Exéu que s'estiende ente esti estrechu y el de los Dardanelos, pel que desagua el mar Negru al Mediterraneu pel so estremu suroccidental. Na parte nororiental el estrechu de Kerch da pasu al mar d'Azov, que ye una parte del mar Negru llendada pola ribera oriental de la península de Crimea y pola más septentrional de la rexón caucásica.

El mar Negru tien una superficie de 436.400 km², una fondura másima de 2.212 m y un volume d'agua estimáu en 547.000 km³. Pel Bósforo-y entren 200 km³ d'agua salao al añu, y recibe tamién 320 km³ añales d'agua duce de los ríos qu'aporten a elli. Ente ellos rescampla, pola so importancia, el Danubiu.

Esti mar ta arrodiáu polos países que vienen darréu: Ucraína (norte), Rumanía y Bulgaria (oeste), Turquía (sur), Xeorxa y Rusia (este). Ente les ciudaes más importantes de les que tán nes sos riberes pueden citase Burgas y Varna (Bulgaria), Constanța (Rumanía), Odesa, Sebastopol, Yalta y Kerch (Ucraína), Trebisonda, Samsun, Zonguldak y Estambul (Turquía).

Los países llenderos del mar Negru, col amiestu d'Albania, Armenia, Azerbaiján, Grecia y Moldavia, formaron en 1992 la Organización pa la Cooperación Económica del Mar Negru (n'inglés Organisation of the Black Sea Economic Cooperation, BSEC), que tien la so sé n'Estambul. Esta organización nació col envís de favorecer el desendolque económicu de la rexón.

Ríos y canales navegables[editar | editar la fonte]

El mar Negru comunica col Mediterraneu al traviés del Bósforu y del mar de Mármara y col mar d'Azov pel estrechu de Kerch.

L'accesu a los ríos Don y Volga, al mar Caspiu, al mar Bálticu y al mar Blancu faise per canales. Al traviés del ríu Danubiu y de la canal Rhin-Main-Danubiu accédese al mar del Norte.