Liet international

De Uiquipedia
Saltar a: navegación, buscar

Liet-Lávlut, Liet Ynternasjonaal o Festival de Llingües Minoritaries Liet International ye un festival añal pa músicos que falen cualesquier de les llingües minoritaries d'Europa. La so primer edición foi como un festival local frisiu en 2002. El festival quier facer medrar l'interés poles llingües minoritaries d'Europa, especialmente ente la mocedá.

Asturies nel Liet[editar | editar la fonte]

El 18 d'ochobre de 2008 inauguróse la presencia asturiana nel festival con Dixebra, que quedó en segundu puestu na ciudá lapona de Luleå. El corsu Jacques Culioli algamó el primer puestu, al facese col premiu del públicu y el del xuráu, col cantar "Hosanna in Excelsis". Esti cantar ta escritu en forma de rezu por un futuru xuníu y llibre de Córcega dempués del periodu escuru de lluches ente nacionalistes. "Indios", el tema propuestu pol grupu Dixebra en representación d'Asturies quedó nel segundu puestu, al empar que Elin Kaven del pueblu Sami, empataos a 73 puntos. Per detrás quedaron Mordens (Mordovia) y los friulianos Carnicats. Beatriz Viado directora del periódicu "Les Noticies", foi la representante d'Asturies nel xuráu.

En 2009, el Gobiernu del Principáu d'Asturies implicóse nel festival y mandó un representante oficial de la música asturiana, que s'escoyó al traviés de la gala del Premiu al Meyor Cantar. Asturies tuvo representada na ciudá frisia de Leeuwarden pol cantautor turonés Alfredo González, que foi’l primeru n’actuar nel Teatru De Harmonie con “La nada y tu”, un cantar con lletra d'un poema d'Antón García. A la fin quedó nel novenu puestu con 40 puntos. El grupu de rock lapón Somby foi’l vencendor. Los sardos Dr. Drer en Crc Posse recibieron el Premiu del Públicu del festival, escoyíu al traviés de les votaciones de los internautas y los espectadores que s’atopaben nel Teatru De Harmoniu viendo en directo'l festival. Lisardo Lombardía, director del Festival de Loriant, foi l’encargáu de representar a Asturies nes votaciones, otorgando 12 puntos a los sardos y 10 a Somby.

En 2010, el cantar “Tierra”, del grupu de San Andrés Xera foi escoyíu en Mieres del Camín como’l meyor n’asturianu del 2009 y foi l’encargáu de representar a Asturies nel Festival Liet International, el 20 de payares na ciudá escocesa d’Aberdeen. El grupu quedó nel segundu puestu. La victoria foi pal grupu de les Isles Feroe Orka, qu'interpretaron el cantar "Rumdardrongurin”. Yera la primer vez que participada una banda d’esta comunidá llingüística, que tien 48.000 falantes en Dinamarca. Per otru llau, el premiu del públicu lleváronselu los friulanos Resistence in Dub. Nesta categoría Xera quedó con un 26% de los votos emitíos al traviés d’Internet, colo que quedaron segundos. L'espacialista musical Aurelio Argel foi'l miembru asturianu del xuráu.

Nel 2011 foi la ciudá italiana n’Udine, nel Friul, la sé del Liet. Nesta edición, los representanes asturianos foron el grupu de ska-rock Skama la Rede. La compositora Janna Eijer, de Frisia foi la ganadora del Liet International col cantar "Ien klap". Skama la Rede, que participó col tema ‘Condenáu’, finalizó n’octava posición. L'escritor y musicólogu Ismael González Arias exerció de xuráu del nuestru país.

Asturies, sé del Liet International[editar | editar la fonte]

En 2012, Asturies va ser la sé del festival, convirtiéndose na primer comunidá llingüística del Estáu encargada d'acoyer la cita.

Asturies ye un sociu estratéxicu del festival, tres la robla d'un alcuerdu ente la Directora Xeneral de Política Llingüística, Consuelo Vega Díaz, y el presidente de la Fundación Liet International, Onno Falkena, garantizando la participación d’un representante del país, collaborando’l Principáu coles actividaes de la Fundación. Amás de cuntar cola Fundación nel Premiu al Meyor Cantar, clasificatoriu oficial pal Liet International.