Euskadi Ta Askatasuna

De Uiquipedia
Saltar a: navegación, buscar
Pintada a favor d'ETA en Altsasu, 2008.

Euskadi ta Askatasuna (n'asturianu, País Vascu y Llibertá), conocida como ETA, ye una organización armada que nagua por afitar un estáu vascu socialista ya independiente a partir del amiestu de dellos territorios españoles y franceses formaos poles comunidaes españoles del País Vascu y Navarra y les provincies franceses de Zuberoa, Baxa Navarra y Lapurdi.

Ta reconocía como organización terrorista polos principales organismos internacionales, por mor del usu que fai d'aiciones violentes como l'asesinatu y el secuestru, amás de la extorsión a empreses y industriales col cobru del nomáu «impuestu revolucionariu», una de les sos fontes d'ingresos. Anguañu lleven asesinaes 817 persones.

Pente la so traxectoria, ETA decretó cincu tregües totales, y otres tantes parciales, col embís d'entamar procesos de negociación empobinaos al cese de la so actividá. El más prolongáu d'esos periodos foi ente'l 16 de setiembre de 1998 y el 3 d'avientu de 1999, nel que se caltuvieron dellos contautos col Gobiernu español, entós presidíu por José María Aznar. El 22 de marzu de 2006, y col socialista José Luis Rodríguez Zapatero como presidente del executivu español, ETA da anuncia de un alto'l fueu permanente que concluyó 'de facto' el 30 d'avientu de 2006 cola esplosión d'una furgoneta bomba nel Aeropuertu de Barajas, en Madrid, que prevocó la muerte a dos persones. Sicasí, la banda nun da por fináu el procesu hasta el 5 de xunu de 2007, cuando nun comunicáu nuevu anuncia la vuelta a la actividá armada pal día siguiente.

El 20 d'ochobre de 2011 ETA anunciaba nun comunicáu'l cese definitivu de la so actividá armada.

Euskadi Ta Askatasuna
(País Vascu y Llibertá)
Organización terrorista ETA
Añu fundación 31 de xunetu de 1959
Ideoloxía Marxismu-Leninismu, nacionalismu vascu
Vínculos Movemientu Nacional de Lliberación Vascu, Iparretarrak
Ámbitu España, Francia
Llíderes Jose Antonio Urrutikoetxea (Josu Ternera), aparatu políticu-militar.
Garikoitz Aspiazu Rubina (Txeroki), aparatu militar.
Víctimes
Civiles 341
Militares y policíes 481
Total 822
Fonte: Ministeriu español
de l'Interior [1] [2]

ETA n'Asturies[editar | editar la fonte]

  • 1979: ETA atraca la oficina principal del Banco Herrero n'Uviéu, con ayuda del CNA onde robaron 100 millones de pesetes.
  • 26/9/1995: La llinea de Feve qu'une Asturies con Galicia permaneció cortada varies hores tres recibise una llamada en nome d'ETA alvirtiendo de la esistencia d'un artefautu nel trayeutu Uviéu-El Ferrol.
  • 3/11/1996: ETA colocó na sede del Palaciu de Xusticia de Xixón 20 quilogramos d'esplosivos qu'ocasionaron daños materiales por un valir cercanu a los 50 millones de pesetes. Esta foi la primer vegada que la banda terrorista recurrió a la colocación d'esplosivos n'Asturies.
  • 21/7/1997. Dos granaes que teníen como oxetivu'l Cuartel del Cuerpu Nacional de Policía de Buenavista, n'Uviéu, españaron nel centru de la ciudá. La Policía desautivó darréu una trampa-bomba colocada xuntu a ún de los llanzagranaes.

Enllaces esternos[editar | editar la fonte]