Elzie Crisler Segar

De Uiquipedia
Saltar a: navegación, buscar
Elzie Crisler Segar.

Elzie Crisler Segar (Chester, Illinois, 8 d'avientu de 1894; Santa Mónica, California, 13 d'ochobre de 1938) yera un dibuxante de los Estaos Xuníos, más conocíu como creador de Popeye, un personaxe que primero apaeció como tira diaria nel "Thimble Theater" en 1929.

Segar nació y vivió en Chester, Illinois, una ciudá pequeña cerca del ríu Mississippi. So padre yera especialmente mañosu pa les pequeñes obres de casa, polo que les sos esperiencies profesionales primeres incluyeron ayudar a so padre na pintura y empapeláu de la casa. Espertu en tocar la batería, tamién trabayó nel acompañamientu musical a les películes y a los actos del vaudeville nel teatru llocal, onde-y dieron trabayu eventual na proyeición de películes. Con 18 años d'edá, decide facese dibuxante. Trabayó duramente nun cursu per correspondencia en dibuxu de W.L. Evans, de Cleveland, Ohio, nel qu'invirtiera 20 dólares. Dixo que depués de trabayar prendía la llámpara d'aceite hacia la medianueche y trabayaba nel cursu hasta les 3 de la mañana.

Segar treslladóse a Chicago onde aconceyó con Richard Felton Outcault, el creador de The Yellow Kid y Buster Brown, que lu animó y punxolu en contautu col Chicago Herald. El 12 de marzu de 1916 el Herald asoleyó la primera historieta de Segar, "Charlie Chaplin's Comedy Capers", que funcionaron mientres un añu. En 1918 treslladóse al Chicago Evening American de Hearst pal que creó "Looping the Loop". Segar casó con Myrtle Johnson esi mesmu añu; y tendríen dos fíos.

L'editor William Curley pensó que Segar podría tener ésitu en Nueva York, asina qu'unviólu a King Features Syndicate, onde Segar trabayó munchos años. Entamó dibuxando'l “Thimble Theatre” pal New York Journal. La tira entamó a asoleyase'l 19 d'avientu de 1919 y presentó a los personaxes d'Olivia Oyl, Castor Oyl y Ham Gravy, que tuvieron los papeles principales alredor d'una década. En xineru de 1929, cuando Castor Oyl necesitó un marineru pal so barcu, contrató a un trabayador de los cais llamáu Popeye. El personaxe de Popeye garró protagonismu y convirtióse nun personaxe permanente de la serie. Dellos de los otros personaxes notables creaos por Segar fueron J. Wellington Wimpy y Eugene the Jeep.

Depués d'un llargu procesu, Segar morrió d'una enfermedá del fégadu a la edá de 43 años.

La National Cartoonist Society creó'l Premiu Elzie Segar nel so honor.