Sheratan

De Wikipedia
Saltar a navegación Saltar a la gueta
Sheratan
Sheratan A
Constelación Aries
Ascensión reuta α 01h 54min 38,4s
Declinación δ +20º 48’ 29’’
Distancia 59,6 ± 0,8 años lluz
Magnitú visual +2,64
Magnitú absoluta +1,33
Lluminosidá 22 soles
Temperatura 8200 K
Masa 2 soles
Radiu 2,1 soles
Tipu espectral A5V
Velocidá radial -1,9 km/s

Sheratan o Sharatan (β Arietis / β Ari / 6 Arietis)[1] ye la segunda estrella más brillosa na constelación d'Aries con magnitú aparente +2,64. Alcuéntrase a unos 60 años lluz de distancia del Sistema Solar.

Nome[editar | editar la fonte]

El nome Sheratan o Sharatan procede del árabe Al Sharatain o Ash-Sharatan, «Los Dos Signos», la forma dual de Al Sharat, «El Signu»; fai referencia a esta estrella y a la vecina Mesarthim (γ Arietis) como un signu del añu qu'empieza. Sheratan marcaba'l equinocciu vernal en tiempos de Hiparco de Nicea, aprosimao na dómina qu'estes estrelles recibieron los sos nomes.[2]

Coles mesmes, Sheratan y Mesarthim yeren el Padevar persa, «El Par de Protección», el Bashish sogdiano, «El Protector», según l'equivalente coptu Pikutorion. En Babilonia, según Epping, marcaben la segunda constelación eclíptica Mahru-sha-rishu-ku, "Frente de la Cabeza de Ku".[2]

Carauterístiques físiques[editar | editar la fonte]

Sheratan ye una estrella blanca de la secuencia principal de tipu espectral A5V con una temperatura de 8200 K. Tien una compañera cercana que nun puede resolvese per aciu el telescopiu y namái ye detectable por espectroscopia. Cabo señalar la elevada escentricidá de la órbita (ε = 0,88), que fai que la separación ente dambes estrelles varie ente 0,08 UA (un 20% de la distancia ente Mercuriu y el Sol) y 1,2 UA (un 20% más de la distancia ente la Tierra y el Sol). El periodu orbital del sistema ye de 107 díes.[3]

La estrella secundaria, Sheratan B, ye una nana mariella de tipu G con una masa un 2% superior a la masa solar. La masa de la estrella blanca principal, Sheratan A, ye'l doble que la del Sol. El 95% de la lluminosidá del sistema apurrir la componente más masiva, unes 22 vegaes más lluminosa que'l Sol.[3]

Referencies[editar | editar la fonte]