Mesarthim

De Wikipedia
Saltar a navegación Saltar a la gueta
Mesarthim
Mesarthim γ12
Constelación Aries
Ascensión reuta α 01h 53min 31,8s
Declinación δ +19º 17’ 37’’
Distancia 204 ± 11 años lluz
Magnitú visual +4,83 / +4,75
Magnitú absoluta -0,10 / ?
Lluminosidá 56 / 43 - 52 soles
Masa 2,8 / 2,5 soles
Tipu espectral B9 V / A1 VpSi
Velocidá radial +3,7 / -0,6 km/s

Mesarthim (γ Arietis / γ Ari / 5 Arietis) ye una estrella na constelación d'Aries, la cuarta más brillosa de la mesma. El so nome significa en sánscritu "la primer estrella d'Aries". Ye una estrella binaria que les sos dos componentes, γ1 Arietis y γ2 Arietis, tienen un rellumu similar y pueden ser fácilmente resueltes al tar dixebraes 8 segundos d'arcu. Alcuéntrase a 204 años lluz de distancia del Sistema Solar.

γ1 Arietis (HD 11502 / HR 545)[1] ye una estrella blanca de tipu espectral B9 V y ye la más caliente de los dos, con una temperatura de 11.000 K. Anque visualmente ye menos brillosu que la so compañera —tien magnitú aparente +4,83—, en realidá ye más lluminosa al emitir mayor cantidá de radiación ultravioleta non visible, siendo la so lluminosidá 56 vegaes mayor que la del Sol. Tien una masa averada de 2,8 mases solares.[2]

γ2 Arietis ((HD 11503 / HR 546),[3] de magnitú +4,75, ye de tipu espectral A1p y tien una lluminosidá entendida ente 43 y 52 soles. Ye una estrella Ap con un fuerte campu magnéticu, unes 1000 vegaes mayor qu'el campu magnéticu terrestre. El magnetismu, concentráu en ciertes zones de la estrella, favorez la separación de dalgunos elementos químicos; en concretu, γ2 Arietis amuesa una alta concentración de siliciu. Por cuenta de la rotación estelar les distintes concentraciones d'elementos entren y salen del campu de visión, dexando conocer el periodu de rotación de γ2 Arietis —1,609 díes— y causando pequeñes variaciones de rellumu.[2] Arriendes d'ello, γ2 Arietis ta catalogada como variable Alfa2 Canum Venaticorum, siendo la amplitú de la variación de 0,04 magnitúes.[4]

Los dos estrelles tán dixebraes 500 UA a lo menos, con un periodu orbital de siquier 5000 años.[2]

Referencies[editar | editar la fonte]