Miguel Hilarión Eslava

De Wikipedia
Saltar a: navegación, buscar
Retrato de Hilarión Eslava.

Miguel Hilarión Eslava Elizondo (Burlada, Navarra, 21 d'ochobre de 1807 - Madrid, 23 de xunetu de 1878) foi un compositor y musicólogu español del sieglu XIX, gran defensor de la ópera española.

Biografía[editar | editar la fonte]

Foi neñu de coru y violinista de la Catedral de Pamplona. Estudió órganu, violín y pianu con Julián Prieto, y composición con Francisco Secanilla.

En 1828 foi maestru de capiya de la Catedral d'El Burgo de Osma; treslladóse a Sevilla, onde ordénase sacerdote y figura como maestru de la Real Capiya. Mientres la so estancia en Sevilla estrenó delles obres de calter secular.

En 1844 viaxa a Madrid onde ye tamién maestru de capiya de la Capiya Real de Madrid. En 1854 ye nomáu profesor de composición del Conservatoriu de Madrid, centru qu'once años más tarde pasó a dirixir.

Foi fundador, xuntu con Arrieta, Gaztambide y Barbieri, del grupu La España Musical, dedicáu a defender la ópera española. Les sos obres denoten influencia italiana y ta consideráu ún de los pocos auténticos músicos románticos españoles.

Formó parte, xunto a Hernando, Inzenga y Gaztambide, d'una comisión executiva pa la organización de los conciertos de la Sociedá Artísticu-Musical.

Ente la so enantada obra atópense tres óperes: Il Solitario (1841), Las treguas de Tolemaida (1842) y Pietro il Crudele (1843), delles obres sinfóniques (Sinfonía fantástica, la cantata La guerra de África...), y más de 140 composiciones relixoses ente les qu'hai, ente otres munches pieces, ocho Mises, Oficio de difuntos, Te Deum, dellos motetes, catorce Lamentaciones, seis Salve Regina, una de les que cántase tolos años el sábadu previu al 26 de xunetu en Tudela, n'honor de Santa Ana, y trés Stabat Mater.[1] Dalgunes de les sos obres más conocíes ye El Miserere de Sevilla y el Miserere de Jerez qu'entá s'interpreten añalmente'l Sábadu de Pasión, y el Miserere pa la S.I. Catedral de Baeza, que s'interpreta'l Martes Santu.

Ye autor de "Lira Sacro hispana" (1869), antoloxía en siete volúmenes de la música relixosa española de los sieglos XV y XVI. Asina mesmu, foi autor d'obres de calter pedagóxicu, como'l so "Método de Solfeo" (1846), qu'usóse mientres más d'un sieglu como material d'enseñanza, "Método completo de solfeo sin acompañamiento", "Tratado tercero de la melodía y discurso musical" (1871), "La Escuela completa de armonía y composición", etc.

Cuando Europa asistía a la segunda folada romántica con figures como la de Brahms, cuando trunfaba'l nacionalismu ya imponíase Wagner, cuando, inclusive n'España estrenárase la Primera Sinfonía de Pedro Miguel Marqués, Hilarión Eslava espublizaba la segunda edición del so tratáu «Escuela de Composición». Nel terceru de los sos volúmenes, dedicáu al estudiu de la melodía y el discursu musical, hai una serie d'observaciones sobre les formes nel arte sonoro.

Tien d'alvertise qu'Eslava nun yera un retrógradu, y que munches vegaes aportunaba nel valor del sentimientu y del entusiasmu sobre les fríes riegles. Eslava arrenunciaba al analís de páxines qu'él llamaba romántiques como sinónimu d'estravagantes o caprichoses, productu de la pura anarquía, ensin suxeción a llei dalguna.

La so sepultura atópase nel campusantu de la so llocalidá natal, ye obra de Mariano Benlliure.

Bibliografía[editar | editar la fonte]

  • José Enrique Ayarra Jarne. Hilarión Eslava en Sevilla. Diputación Provincial de Sevilla. Servicio de Publicaciones. Sevilla, 1979.
  • Gómez Amat, Carlos. "Historia de la música española" Ed: Alianza Música. ISBN: 84-206-6477-4(tomo 5)
  • Leocadio Hernández Ascunce. Estudio Bio-Bibliográfico de Hilarión Eslava. Fondo de Publicaciones del Gobierno de Navarra. Pamplona, 1978.
  • VV.AA. Monografía de Hilarión Eslava. Fondo de Publicaciones del Gobierno de Navarra. Pamplona, 1978.
  • Karmele Saint Martin. Don Hilarión Eslava. Fondo de Publicaciones del Gobierno de Navarra. Pamplona, 1973.

Grabaciones[editar | editar la fonte]

  • Hilarión Eslava, (Coral de Cámara de Pamplona, Órg. Oscar Candendo, Dir. David Guindano, ARSIS 4222)

Referencies[editar | editar la fonte]

  1. GALLEGO, A. (1978). "Eslava y la ópera". Monografía de Hilarión Eslava. pp. 179–ss.