José Noriega Agüera

José Noriega Agüera
Vida
Nacimientu	El Bustiu, 22 de xunetu de 1920
Nacionalidá	España
Muerte	Xixón, 16 de marzu de 2006 (85 años)
Estudios
Llingües falaes	castellanu
Oficiu	músicu
Xéneru artísticu	tonada asturiana; tonada

José Noriega Agüera (22 de xunetu de 1920, El Bustiu – 16 de marzu de 2006, Xixón) foi un cantante asturianu de tonada asturiana.

Nació nel somantu d'una familia de campesinos. Foi'l primeru de tres hermanos, na so familia casi toos cantaben, cantaba mui bien so güela, cantaben so padre y so madres y cantaba la so hermana Nieves.

Aficiónase de neñu a la canción asturiana. Pue dicise qu'aprendió a cantar nel trubiecu. Cuando lu añaba, so madre cantaba-y una añada con tastu a asturianada cola que'l pequeñu José se dormía: "Enramáronte la puerte querida, los militares, creyendo que yeren claveles y eren ramos de pescales".

Con 12 años algama'l so primer trunfo, ganando'l primer premiu nel Concursu de Tonada de les fiestes de "El Portal", en Villaviciosa.

Pola radio escuchaba cantar a "La Busdonga", Juanín de Mieres, Miranda, "El Presi", ... Y foi ganando afición cantando a la gaita al estilu carreñanu y con especial dedicación al de les mariñes, xéneru afitáu nes tierres de Villaviciosa, Xixón y Avilés, interpretando la tonada con un toque personal aunque conservando la pureza.

En 1954 graba los sos primeros discos en Barcelona cola compañía Emi-Odeón, dos vinilos de 45 rpm.

Concursu de "Región" y xira por llatinoamérica[editar | editar la fonte]

En 1955 ganó'l concursu de canción asturiana del diariu Región, y pocu tiempu depués conquistó'l concursu de Radio Madrid de canciones rexonales d'España. Depués d'esti trunfu la prensa bautizólu col alcuñu de «el home de los cuatro pulmones». En 1955 marchó a Cuba actuando na televisión d'esi país, diendo con un contratu d'un mes y teniendo que prorrogalu con dos meses más.

En 1960 coló de xira p'Arxentina xunto con ún de los gaiteros más famosos na historia musical d'Asturies: Remis Ovalle. Gracies al gran ésitu que tuvo pasó tres años nel continente americanu llegando a visitar otros paíes como Chile y Venezuela, culminando la so xira en Méxicu.

"Compañía de Rosario Trabanco". "Asturias Canta", "Así Canta Asturias"[editar | editar la fonte]

Al so regresu, en 1960, intégrase na Compañía Asturiana de Rosario Trabanco.

Ente los años 1967 y 1968 foi unu de los componentes de la compañía de Campeones de Canción Asturiana "Asturias Canta", xunto con "El Tordín de Frieres", Ataulfo Lada Camblor, Agustín Argüelles, Fidel de la Güeria, Tarín de Sotrondio, Margarita Blanco y Silvino Blanco como gaiteru.

D'ente les más de 100 canciones que llegó a grabar con discográfiques internacionales destaquen pol so ésitu «Hay una línea trazada», «Ay de mí que me oscurece», «Pasé'l puertu Payares» o «Vas facer una llamarga».

N'Uviéu tien una cai col so nome.

Referencies[editar | editar la fonte]

Enllaces esternos[editar | editar la fonte]