Organización Mundial de la Salú

Bandera de la OMS

La Organización Mundial de la Salú (OMS), The World Health Organization (WHO), ye'l muérganu de la ONU especializáu en xestionar polítiques de prevención, promoción ya intervención en salú a nivel mundial. Foi creáu'l 7 d'abril de 1948. El primer escarabayu de la OMS surdió de la Conferencia Internacional de la Salú celebrada en xunetu de 1946. Nesti conceyu, organizáu col determín del Conseyu Económicu y Social de la ONU, redáutense los primeros estatutos de la OMS. El primer aconceyamientu de la OMS tuvo llugar en Xinebra en 1948.

Les principales xeres de l'Asamblea Mundial de la Salú son aprobar el programa y el presupuestu de la OMD pal bieniu viniente, y decidir les principales cuestiones rellatives a les polítiques sanitaries. Talo y como afita la so Constitución, l'oxetivu de la OMS ye que tolos pueblos de la Tierra puedan gociar del grau máximu de salú que se puea llograr. La Constitución de la OMS define la salú como "un estáu dafechu de bientar físicu, mental y social", y non namái ausencia d'afeiciones o malures.

Los 193 Estaos Membros de la OMS gobiernen la Organización per aciu de l'Asamblea Mundial de la Salú. L'Asamblea ta formada por representantes de tolos Estaos Miembros de la OMS.

Direutores Xenerales

Direutores Xenerales de la OMS foron:

• Brock Chisholm (Canadá) 1948-1953
• Marcolino Gomes Candau (Brasil) 1953-1973
• Halfdan T. Mahler (Dinamarca) 1973-1988
• Hiroshi Nakajima (Xapón) 1988-1998
• Gro Harlem Brundtland (Noruega) 1998-2003
• Lee Jong-wook (Corea del Sur) 2003-2006
• Anders Nordström (Noruega) 2006 (en forma interina)
• Margaret Chan (Ḥong Kong, China) 2007 fasta anguaño.

Les seis (6) oficinas rexonales son:

• Oficina Rexonal p'África (AFRO), con sede en Brazzaville, República d'El Congu. AFRO inclúi la mayor estaya del África sub-saḥariana, sacante Exiptu, Sudán, Tunicia, Libia, Marruecos y Somalia que pertenecen a EMRO.
• Oficina Rexonal pa Europa (EURO), con sede en Copenḥague, Dinamarca. Inclúi a tolos países europeos.
• Oficina Rexonal p'Asia Sur-Oriental {SEARO}, con sede en Nueva Delhi, India. Ensambla tolos países asiáticos non servíos por WPRO y EMRO, incluyendo a Corea del Norte.
• Oficina Rexonal pal Mediterraneu Oriental (EMRO), con sede n'El Cairu, Exiptu. EMRO inclúi los países del norte d'África, denomaos como'l Magreb, más Somalia, que nun s'inclúin n'AFRO, asina como tolos del Oriente Mediu.
• Oficina Rexonal pal Pacíficu Occidental (WPRO), con sede en Manila, Filipines. WPRO cubre tolos países asiáticos non servíos por SEARO y EMRO, y tolos países d'Oceanía. Inclúi a Corea del Sur.
• Oficina Rexonal pa les Amériques (AMRO), con sede en Washington D.C., Estaos Xuníos. Conozse meyor como la Organización Panamericana de la Salú (OPS) siendo esti l'organismu internacional sanitariu más antiguu del mundu.

Enllaces esternos

• Wikimedia Commons tien conteníu multimedia tocante a Organización Mundial de la Salú.

• OMS (castellán)