Deneb Algedi

De Wikipedia
Saltar a navegación Saltar a la gueta
Deneb Algedi
Deneb Algedi
Constelación Capricorniu
Ascensión reuta α 21h 47min 02,44s
Declinación δ -16º 07’ 38,2’’
Distancia 38,6 ± 0,4 años lluz
Magnitú visual +2,85
Magnitú absoluta +2,49
Lluminosidá 8,5 soles
Temperatura 7700 K
Radiu 1,64 soles
Tipu espectral A7III
Velocidá radial -6,3 km/s

Deneb Algedi o Scheddi (δ Capricorni / δ Cap / 49 Capricorni)[1][2] ye la estrella más brillosa de la constelación de Capricorniu con magnitú aparente +2,85. Alcuéntrase a namái 38,6 años lluz del Sistema Solar.

Nome[editar | editar la fonte]

El nome de Deneb Algedi provién del árabe ذنب الجدي, ðanab[o] al-jadiyy, que significa «la cola de la cabra», indicando la so posición na constelación. El mesmu orixe tien la denominación alternativa Scheddi, como apaez en delles llistes d'estrelles, nome igualmente utilizáu pa designar a Nashira (γ Capricorni). Al pie de esta postrera yera conocida polos antiguos árabes como Al Sa'd al Nashirah, «la afortunda» o «la que trai marees aparentes».[3]

Carauterístiques físiques[editar | editar la fonte]

Deneb Algedi ye una estrella blanca de tipu espectral A5-A7 con una temperatura de 7700 K. De mala clasificación, foi catalogada indistintamente como xigante, subxigante o como estrella de la secuencia principal, anque lo más probable ye que s'atope nes últimes fases de la fusión de hidróxenu.[4] Ye una estrella con llinies metáliques (Am) —la so espectru presenta llinies d'absorción fuertes de dellos metales y débiles d'otros, como calciu—, siendo una de les más brilloses dientro d'esti grupu. 8,5 vegaes más lluminosa qu'el Sol, tien, sicasí, una compañera de tipu desconocíu, siendo una binaria espectroscópica y una variable eclipsante. La magnitú respeutiva de cada componente ye +3,2 y +5,2, tando separaes 0,0018 segundos d'arcu. Dambes estrelles completen una órbita alredor del centru de mases común cada 1,0228 díes, produciéndose un amenorgamientu de rellumu de 0,2 magnitúes mientres el eclís. A lo último, abarrúntase que Deneb Algedi ye, por sigo mesma, una variable intrínseca del tipu Delta Scuti.[4]

Piénsase qu'otres dos estrelles pueden tar rellacionaes col par anterior. Deneb Algedi B —de magnitú 16— ta visualmente a 1 minutu d'arcu, ente que Deneb Algedi C —de magnitú 13— ta a 42 segundos d'arcu.[2]

Ver tamién[editar | editar la fonte]

Referencies[editar | editar la fonte]