Campeonatu del Mundu d'axedrez de 2021

De Wikipedia
Saltar a navegación Saltar a la gueta
Defensor del títulu Aspirante
Magnus Carlsen
Ian Nepomniachtchi Satka 2018
Bandera de Noruega Magnus Carlsen Bandera de ? Ian Nepomniachtchi
Nacencia: 30 de payares de 1990
30 años
Nacencia: 14 de xunetu de 1990
31 años
Ganador del Campeonatu del Mundu d'axedrez de 2018 Ganador del Tornéu de Candidatos de 2020-21
Puntos Elo: pte. Puntos Elo: pte.
2018 2022 →

El Campeonatu del Mundu d'axedrez de 2021 será una serie de partíes d'axedrez que va xugase del 24 de payares al 16 d'avientu de 2021 en Dubái (Emiratos Árabes Xuníos) al abeyugu de la FIDE, ente l'anguaño campeón Magnus Carlsen y un aspirante al títulu que va decidise nel Tornéu de Candidatos de 2020-21. Anque dambes competiciones taben programaes pal añu 2020, les feches tuvieron que camudase pol andanciu de la COVID-19.

Tornéu de Candidatos[editar | editar la fonte]

L'aspirante al títulu mundial será Ian Nepomniachtchi, como ganador del Tornéu de Candidatos, una competición na que participaron ocho xugadores con un sistema de toos escontra toos a doble vuelta. El tornéu tenía de xugase en Ekaterimburgu (Rusia) del 15 de marzu al 5 d'abril de 2020[1] pero'l 26 de marzu, cola primera mitá del tornéu acabada, la FIDE decició posponer la segunda vuelta dempués de que Rusia anunciara que tolos vuelos internacionales con salida o llegada nel país diben suspendese dende'l día siguiente pol andanciu de la COVID-19 [2]. La segunda mitá del tornéu nun se xugaría fasta trece meses dempués, ente'l 19 y el 28 d'abril de 2021.

Los xugadores clasificaos pal tornéu yeren:[1]

Forma de clasificación Xugador
Finalista del Campeonatu del Mundo d'axedrez de 2018 Bandera de Estaos Xuníos d'América Fabiano Caruana
Finalistes de la Copa del Mundu d'axedrez de 2019 Bandera d'Azerbaixán Teimour Radjabov (ganador)
Bandera de la República Popular China Ding Liren (finalista)
Meyor clasificáu del Tornéu Gran Suizu de la FIDE de 2019 (non clasificáu pelos métodos anteriores y que nun seya Carlsen). Bandera de la República Popular China Wang Hao (ganador)
Dos meyores clasificaos del Gran Premiu de la FIDE de 2019 (non clasificaos pelos métodos anteriores). Bandera de Rusia Alexander Grischuk (ganador)
Bandera de Rusia Ian Nepomniachtchi (2u clasificáu)
Meyor ELO mediu, de febreru de 2019 a febreru de 2020 (non clasificáu pelos métodos anteriores). Bandera de Países Baxos Anish Giri
Bandera de Francia Maxime Vachier-Lagrave (na plaza de Radjabov)
Convite de la organización, teniendo en cuenta dellos criterios. Bandera de Rusia Kirill Alekseenko (meyor nel Tornéu Gran Suizu de la FIDE de 2019 entá non clasificáu)

Les regles preveíen que si dalgún xugador arrenunciaba a la so plaza nel so llugar participaría'l xugador non clasificáu con meyor ELO mediu (de febreru de 2019 a xineru de 2020). La FIDE emplegó esta regla'l 6 de marzu de 2020 pa seleicionar a Maxime Vachier-Lagrave dempués de que Teimour Radjabov arrenunciara a participar por paece-y un riesgu pergrande viaxar y xugar el tornéu en mediu del andanciu de la COVID-19. En mayu de 2021 fízose público que, pa compensar la pérdida de la plaza, la FIDE convidaría a Radjabov al Tornéu de Candidatos 2022.

Resultaos[editar | editar la fonte]

Ver: Tornéu de Candidatos de 2020-21.

Campeonatu del Mundu[editar | editar la fonte]

Normes[editar | editar la fonte]

La organización del campeonatu cuerri a cargu de la FIDE, que ye la que decide les normes del tornéu[3].

Formatu[editar | editar la fonte]

Dende'l Campeonatu del Mundu d'axedrez de 2006 la serie final xugábase al meyor de 12 partíes. Por embargu, el fechu de que toles partíes del Campeonatu del Mundu d'axedrez de 2018 resultaran en tables fizo que pal 2021 la serie final vaya a ser al meyor de 14 partíes, con desempates.

Los xugadores tendrán pa cada partía: 120 minutos pa los primeros 40 movimientos, 60 minutos pa los 20 siguientes y pal resto la partía 15 minutos con un aumentu de 30 segundos por movimientu. Antes del movimientu númberu 40 de les negres nun tán permitíes les tables por alcuerdu, na más podrán pidise-y al árbitru por repetición de la mesma posición tres vegaes.

Premios[editar | editar la fonte]

El bote total pa premios ye de 2.000.000 d'euros netos y repártense de la siguiente forma:

- Un adelantu de 200.000 euros pa caún de los xugadores.

- En casu de que'l campeonatu se xuegue nel país d'ún de los xugadores, l'otru recibe 100.000 euros más.

- Si'l campeonatu fina nes 14 partíes regulares, el restu del fondu repártese el 60% pal ganador y 40% pal perdedor. Pero si'l campeonatu llega al desempate, el ganador lleva el 55% y el perdedor el 45%.

Sede[editar | editar la fonte]

Les candidatures pa la sede del campeonatu de 2020 teníen que tar presentaes antes del 1 de marzu de 2019 y ente'l 1 de xunetu y el 15 d'agostu de 2019 diben ser inspeccionaes.

Yá en 2018, Mónaco, Viena y San Petersburgu ficieron anuncia de la so intención de ser candidates al eventu. Tamien la ciudá noruega de Stavanger lo fizo en marzu de 2019, anque tres meses dempués arrenunciaba dempués de sabese que Carlsen nun taba mui conforme con xugar la final nel so propiui país (por incompatibilidá de tar patrocináu por una casa apuestes y la llei noruega). En payares de 2019, na ceremonia d'apertura del Gran Premiu d'axedrez de la FIDE de 2019 n'Hamburgu, el presidente de la FIDE Arkady Dvorkovich comentaba que tamién se recibieran candidatures de Dubái y Buenos Aires p'acoyer el campeonatu.

El 29 de xunu de 2020, col Tornéu de Candidatos yá suspendíu por cuenta l'andanciu, la serie de partíes del Campeonatu del Mundu foi oficialmente retrasada fasta 2021. Y en xineru de 2021 la FIDE confirmó que, como yá se suponía, Dubái yera la ciudá elexida. Asina, el campeonatu cellebraráse del 24 de payares al 16 d'avientu nel marcu de la Esposición Universal de Dubái.

Sanciones escontra Rusia[editar | editar la fonte]

Tres de la ratificación pol Tribunal d'Arbitraxe Deportivu de la espulsión de Rusia de los campeonatos del mundu, implementada pola Axencia Mundial Antidopaxe como rempuesta al programa de dopaxe de atletes que sofitaba'l propiu estáu rusu, la FIDE confirmó que Nepomniachtchi diba competir baxo la bandera federativa.

Referencies[editar | editar la fonte]

  1. 1,0 1,1 «FIDE Candidates 2020» (inglés) (1 de febreru de 2020). Consultáu'l 20 d'abril de 2020.
  2. «Chess: Candidates stopped at midway point after Russia suspends air traffic» (inglés). The Guardian (26 de marzu de 2020). Consultáu'l 20 d'abril de 2020.
  3. «Regulations for the FIDE World Championship Match 2020» (inglés). FIDE. Consultáu'l 21 d'abril de 2020.